တရုတ်သည် ထိုင်ဝမ်ကို အင်အားသုံးကိုင်တွယ်မည်ဟူသောအချက်ကို မစွန့်လွှတ်ကြောင်း သမ္မတရှီကျင့်ဖျင်၏ ပြောဆိုမှုအပေါ် ထိုင်ဝမ်ပြည်သူ ၉၀ ရာခိုင်နှုန်းနီးပါးက လက်မခံကြောင်း အောက်တိုဘာ ၂၇ ရက်တွင် ပြုလုပ်သော တရုတ်ပြည်မရေးရာကောင်စီ (MAC) စစ်တမ်းတွင် ဖော်ပြထားသည်။
ကွန်မြူနစ်ပါတီ၏ အကြိမ် ၂၀ မြောက် ညီလာခံ၌ ရှီ၏ပြောကြားချက်အပေါ် MACစစ်တမ်းဖြေဆိုသူ ၈၅ ဒသမ ၆ ရာခိုင်နှုန်းက ပယ်ချခဲ့ကြသည်။ ရှီက တရုတ်သည် ထိုင်ဝမ်လွတ်လပ်ရေးလိုလားသော ခွဲထွက်သူများနှင့် ပြည်ပအင်အားစုများအပေါ် အင်အားအသုံးပြုမှုကို လုံးဝစွန့်လွှတ်မည်မဟုတ်ကြောင်းနှင့် ထိုင်ဝမ်နှင့်တရုတ်ပေါင်းစည်းရေး သန္နိဋ္ဌာန်ကိုလည်း ထပ်မံအတည်ပြုခဲ့သည်။
အလားတူ စစ်တမ်းဖြေဆိုသူ ၉၁ ဒသမ ၆ ရာခိုင်နှုန်းသည် ထိုင်ဝမ်ပေါ် တရုတ်ကွန်မြူနစ်ပါတီ၏ စစ်ရေးအရ ခြိမ်းခြောက်မှုကို လက်မခံခဲ့ကြပေ။
ထိုင်ဝမ်ရေလက်ကြားဖြတ်ကျော် ဆက်ဆံရေးနှင့်ပတ်သက်၍ စစ်တမ်းဖြေဆိုသူ ၈၃ ဒသမ ၉ ရာခိုင်နှုန်းက ထိုင်ဝမ်ပြဿနာကို ဖြေရှင်းမည့် တရုတ်၏ အလုံးစုံသော မဟာဗျူဟာကို သဘောမတူခဲ့ကြပေ။ ဖြေဆိုသူ ၈၂ ဒသမ ၃ ရာခိုင်နှုန်းကလည်း တရုတ်တစ်နိုင်တည်းမူဝါဒအရ ၁၉၉၂ သဘောတူညီမှုချက်အပေါ် တရုတ်၏ အခိုင်အမာပြောဆိုနေမှုကို ဆန့်ကျင်ခဲ့ကြသလို ၇၉ ဒသမ ၃ ရာခိုင်နှုန်းက ပြန်လည်ပေါင်းစည်းရေးအတွက် တစ်နိုင်ငံ စနှစ်နှစ်မျိုး က အကောင်းဆုံးဖြစ်သည်ဟူသော ယူဆချက်ကိုလည်း ငြင်းပယ်ခဲ့ကြသည်။
ထိုင်ဝမ် အချုပ်အခြာအာဏာနှင့် ဒီမိုကရေစီကို ကာကွယ်ရင်း ကိုယ်ပိုင်ကာကွယ်ရေးအတွက် ကြိုးပမ်းအားထုတ်မှုများ ဆက်လက်လုပ်ဆောင်မည်ဆိုသော ထိုင်ဝမ်အစိုးရကို စစ်တမ်းဖြေဆိုသူအနက် ၈၉ ဒသမ ၇ ရာခိုင်နှုန်းက ထောက်ခံခဲ့သည်ဟု MACစစ်တမ်းတွင် ဖော်ပြထားသည်။
ထိုင်ဝမ်ရေလက်ကြားတွင် စစ်ရေးအရ ထိပ်တိုက်ရင်ဆိုင်မှုသည် လုံးဝရွေးချယ်စရာမဟုတ်ကြောင်းနှင့် ထိုင်ဝမ်ပြည်သူများ၏ အချုပ်အခြာအာဏာ၊ ဒီမိုကရေစီနှင့် လွတ်လပ်မှုကို လေးစားမှသာလျှင် ထိုင်ဝမ်ရေလက်ကြားတစ်လျှောက် အပြုသဘောဆောင်သော အပြန်အလှန်ဆက်ဆံရေးများ စတင်နိုင်လိမ့်မည်ဟူသော ထိုင်ဝမ်သမ္မတ စိုင်အင်ဝမ်၏ အမျိုးသားနေ့မိန့်ခွန်းကို ၈၄ ဒသမ ၃ ရာခိုင်နှုန်းက ထောက်ခံခဲ့ကြသည်။
အဆိုပါစစ်တမ်းကို အသက် ၂၀ နှစ် နှင့်အထက် ထိုင်ဝမ်ပြည်သူများနှင့် အောက်တိုဘာ ၁၉ ရက်မှ ၂၃ ရက်အကြားတွင် ပြုလုပ်ခဲ့ခြင်းဖြစ်သည်။
