အောက်တိုဘာလ ၃၁ ရက်
ပဲခူးတိုင်းဒေသကြီး၊ ပေါင်းတည်မြို့နယ်၊ ကြို့ပင်အုပ်ချုပ်ရေးမှူးရုံးကို အောက်တိုဘာလ ၃၀ရက်နေ့ ည ၈နာရီ၄၀မိနစ်ခန့်တွင် ပေါင်းတည်ပြည်သူ့ကာကွယ်ရေးတပ်ဖွဲ့ တပ်ရင်း(၃၆၀၁)၊တပ်ခွဲ(၅)နွေဦးအဖွဲ့က ပထမအကြိမ် မိုင်းဆွဲတိုက်ခိုက်ခဲ့ကြောင်း သိရသည်။
အုပ်ချုပ်ရေးမှူးရုံး မိုင်းဆွဲတိုက်ခိုက်ခံရပြီးနောက် ယင်းနေရာကို လာရောက်စစ်ဆေးသည့် စစ်ကောင်စီတပ်နှင့် ရဲတပ်ဖွဲ့ဝင်များပါဝင်သော ကားတစ်စီး၊ ဆိုင်ကယ် လေးစီးကို တာပွန်လမ်း ၊ ၃၄လမ်းထိပ်အနီးတွင် ည ၁၀နာရီ ၁၀မိနစ်အချိန်၌ ဒုတိယအကြိမ် ထပ်မံမိုင်းဆွဲတိုက်ခိုက်ခဲ့ကြောင်း သိရသည်။
“အသေအဆုံးတော့ မရှိဘူးပြောတယ်၊ အထိအခိုက်တော့ရှိတယ်၊ ဘယ်နှစ်ယောက်ရှိလဲတော့မသိဘူး၊ စစ်ဆေးဖို့လာတဲ့ကားကတော့ မှန်တွေကွဲသွားတယ်” ဟု တပ်ရင်း(၃၆၀၁)မှ ဆက်သွယ်ရေးနှင့် သတင်းတာဝန်ခံတစ်ဦးက ပြောသည်။
အဆိုပါ တိုက်ခိုက်မှုကို နန်းထိုက်အောင်စစ်ဆင်ရေးအနေဖြင့် ပြုလုပ်ခဲ့ခြင်းဖြစ်ကြောင်း ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်ထားသည်။
စာတည်း။ ။ ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)
