မဇ္ဈိမ(မန္တလေး)။ ။မန္တလေးတိုင်း၊ ပုသိမ်ကြီးမြို့နယ်တွင် ယနေ့နံနက်ပိုင်းက၊ ကျေးရွာအုပ်ချုပ်ရေးမှူးတစ်ဦးအား၊ ပြည်သူ့ကာကွယ်ရေး ပြောက်ကျားတပ်ဖွဲ့နှစ်ဖွဲ ပူးပေါင်းပြီး ပစ်ခတ်ရှင်းလင်းခဲဲ့ကြောင်း သိရသည်။
"အုပ်ကြီးကို တောတွင်ကျေးရွာနဲ့ အိုင်ကြီးကျေးရွာကြားမှာ ပစ်သွားတာပါ၊ ထိတော့ထိတယ်၊ ဒါပေမဲ့ မသေသေးပါဘူး" ဟု ဒေသခံသတင်းရင်းမြစ်တစ်ဦးက ပြောသည်။
ပုသိမ်ကြီးမြို့နယ် တောတွင်ကျေးရွာက စစ်ကောင်စီခန့်ကျေးရွာအုပ်ချုပ်ရေးမှူး ဦးခင်မောင်စိုးဆိုသူကို၊ ယနေ့ အောက်တိုဘာ ၂၇ ရက် နံနက် ၁၀ နာရီခန့်တွင်၊ Generation Z Power-GZP(Mandalay) နှင့် ပုသိမ်ကြီးမြို့ နယ်ပြည်သူ့ကာကွယ်ရေးတပ်ဖွဲ့(ပကဖ)တို့ ပူးပေါင်းပြီးပစ်ခတ်ရှင်းလင်းခဲ့ခြင်းဖြစ်ကြောင်း GZP(Mandalay) က သတင်းထုတ်ပြန်သည်။
ကျေးရွာတစ်ရွာနှင့် တစ်ရွာအကူးတွင် ပစ်ခတ်ရှင်းလင်းခဲ့ခြင်းဖြစ်ကြောင်းလည်းသိရပြီး၊ ပြည်သူကိုအနိုင်ကျင့် ဗိုလ်ကျဆက်ကြေးကောက်ခံနေတာကြောင့် ပစ်ခတ်ရှင်းလင်းခဲ့ခြင်းဖြစ်ကြောင်း ထုတ်ပြန်ချက်တွင်ဖော်ပြသည်။
"ယနေ့ ၂၀၂၂ ခုနှစ်၊ အောက်တိုဘာလ ၂၇ ရက်နေ့၊ နံနက် ၁၀ နာရီ၀န်းကျင်ခန့်၌ မန္တလေးမြို့ ပုသိမ်ကြီးမြို့နယ် ငွေတောင်ကျေးရွာအုပ်စု၊ တောတွင်ရွာတွင် ပြည်သူများအပေါ် အနိုင်ကျင့်ဗိုလ်ကျ ဆက်ကြေးကောက်နေပြီး၊ စစ်ကောင်စီခန့်အုပ်ချုပ်ရေးမှူး ခင်မောင်စိုးဆိုသူ ဒလန်အား၊ ကျွန်ုပ်တို့ Generation Z Power-GZP(Mandalay) ပြည်သူ့ကာကွယ်ရေးမြို့ပြပြောက်ကျားတပ်ဖွဲ့နှင့် ပုသိမ်ကြီးမြို့နယ် ပြည်သူ့ကာကွယ်ရေးတပ်ဖွဲ့(ပကဖ)တို့ ပူးပေါင်းကာ လှုပ်ရှားဆောင်ရွက်ခဲ့ကြောင်း ဟူ၍ ထုတ်ပြန်ချက်တွင် ပါရှိသည်။
စာတည်း - သန့်ဇော်(သန်လျင်)
