အောက်တိုဘာလ ၂၂ ရက်
စစ်ကိုင်းတိုင်း၊ မြောင်မြို့နယ် ရွှေပေါက်ပင်ရွာကို ယနေ့နံနက်ပိုင်းက၊ စစ်ကောင်စီတပ်၀င်ရောက်စီးနင်းပြီး၊ စစ်ဘေးရှောင်ပြည်သူကိုပါ လိုက်လံပစ်ခတ်တာကြောင့်၊ လှေတစ်စီးနစ်မြုပ်ကာ ပြည်သူငါးဦးပျောက်ဆုံးနေကြောင်း သတင်းရရှိသည်။
"စစ်တပ်က စစ်ကြောင်းနှစ်ကြောင်းနဲ့ ထိုး၀င်လာတာ၊ အချိန်မီထွက်ပြေးသူတွေလွတ်တယ်၊ စက်လှေတစ်စီးကတော့ လက်နက်ကြီးနဲ့ လှမ်းပစ်ခံလိုက်ရတယ်" ဟု ဒေသခံတစ်ဦးက ပြောသည်။
ယနေ့ အောက်တိုဘာ ၂၂ ရက် နံနက် ၄ နာရီ၀န်းကျင်ခန့်က၊ စစ်ကိုင်းတိုင်း မြောင်မြို့နယ်အတွင်းသို့ စစ်ကောင်စီတပ် စစ်ကြောင်းနှစ်ကြောင်းဖြင့်စစ်ကြောင်းထိုး၀င်ရောက်လာပြီး၊ စစ်ဘေးရှောင်ပြည်သူကိုပါ လက်နက် ကြီးများဖြင့် လိုက်လံပစ်ခတ်ခဲ့ခြင်းဖြစ်ကြောင်းလည်း ဒေသခံများကဆိုသည်။
ဖြစ်စဉ်နှင့်ပတ်သက်၍၊ စစ်ကောင်စီတပ်များသည် မြင်းမူမြို့နယ်မှ ရွှေပေါက်ပင်ရွာသို့တစ်ကြောင်း၊ ကျောက်ရစ်စခန်းမှ နနွင်းကိုင်း ဆူးလေကုန်းနှင့် သနပ်ကုန်းရွာတို့သို့ တစ်ကြောင်း၊ စစ်ကြောင်းနှစ်ကြောင်း အပြိုင်ထိုး၀င်ခဲ့ခြင်း ဖြစ်ကြောင်း မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM)ထံက တစ်ဆင့်သိရသည်။
"စစ်ကြောင်းလာသဖြင့်၊ စက်လှေဖြင့်ထွက်ပြေးသော လူခြောက်ဦးပါ စက်လှေအား၊ စစ်ကောင်စီမှ လက်နက်ကြီးဖြင့် ပစ်ခတ်သဖြင့်၊ စက်လှေပေါ်တည့်တည့်ကျ၍၊ စက်လှေမှာနစ်မြုပ်ပျက်စီးကာ၊ ငါးဦးမှာလည်း ရေတွင်နစ်မြုပ် ပျောက်ဆုံးပြီး၊ တစ်ဦးသာ အသက်ရှင်လျက်တွေ့ရှိရသည်" ဟု CDSOM က ဆိုသည်။
စစ်ကောင်စီတပ်သည် အောက်တိုဘာ ၉ ရက်နေ့ကလည်း၊ မြောင်မြို့နယ် ရွှေဘုံသာရွာသို့ ၀င်စီးပြီး၊ အသက်ငါးဆယ်၀န်းကျင် ဒေသခံအမျိုးသားတစ်ဦးကို သတ်ဖြတ်ခဲ့သေးကြောင်း သိရသည်။
ပုံစာ - စစ်ကောင်စီတပ်က ရွှေဘုံသာရွာသို့၀င်စီးပြီး၊ ဒေသခံအမျိုးသား တစ်ဦးကို သတ်ဖြတ်ခဲ့သည်။
စာတည်း - သန့်ဇော်(သန်လျင်)
