မဇ္စျိမ ။။တူမီးထီ အပတ်စဉ် (၅) မှ ရရှိလာသော တော်လှန်ရေး ရန်ပုံငွေ ကို ချင်းကာကွယ်ရေးတပ်ဖွဲ့နှင့် စစ်ဘေးရှောင်ကူညီရေးအဖွဲ့များသို့ ခွဲဝေပေးခဲ့ကြောင်း အောက်တိုဘာ ၉ရက်နေ့တွင် ထုတ်ပြန်သည်။
ထီရောင်းငွေစုစုပေါင်း အမေရိကန်ဒေါ်လာ ၁,၄၉၅ ရရှိခဲ့ပြီး တောင်ပိုင်းချင်းအမျိုးသား ညီညွတ်ရေးကော်မတီ (SCPUC – USA) မှ တူမီးထီသို့ ကန်ဒေါ်လာ ၅၀၀ လှူဒါန်းခဲ့ ကြောင်းနှင့် ဆုကြေးငွေ ဒေါ်လာ ၄၀၀ နှင့် အေးဂျင့် အတွက် ၃၄ဒေါ်လာ အသုံးပြုခဲ့ ကြောင်းဖော်ပြထားသည်။
ရရှိထားသော ရန်ပုံငွေများထဲမှ ချင်းလဲန်းပူးပေါင်းကာကွယ်ရေးကော်မတီ(CJDC) သို့ ဒေါ်လာ ၅၆၀ ၊ မတူပီ စစ်ဘေးရှောင်များ အတွက် ဒေါ်လာ ၅၀၀နှင့် တီးတိန် စစ်ဘေးရှောင်များအတွက် ဒေါ်လာ ၅၀၀ အသီးသီးခွဲဝေပေးအပ်ထားကြောင်း သိရသည်။
တူမီးထီ အပတ်စဉ်(၅) တွင် ထီထိုးသူဦးရေ လျော့နည်းသည့်အတွက် ရန်ပုံငွေရရှိမှု နည်းပါးသွားကြောင်း ထောက်ပို့ပြည်သူ ၊ တော်လှန်ပြည်သူများအနေဖြင့် တော်လှန်ရေး အမြန်အောင်မြင်နိုင်ဖို့ အတွက် များများထောက်ပံ့ဖို့ လိုအပ်မည်ဖြစ်ကြောင်း ဆိုသည်။
တူမီးထီ က ရရှိလာသော ရန်ပုံငွေများသည် ချင်းတော်လှန်ရေး အင်အားစု အသီးသီးထံသို့ စီးဆင်နေခြင်းဖြစ်ပြီး ချင်းတော်လှန်ရေးအင်အားစုများ၏ ဘဏ္ဍာငွေ လိုအပ်ချက်များ ပိုအားဖြည့်နိုင်ဖို့ တူမီးထီကို အားပေးကြရန်တိုက်တွန်းထားသည်။
အာဏာရှင်စနစ်အား အပြည့်အဝ တော်လှန်နိုင်ရမည်ဟူသည့် ယုံကြည်ချက်ဖြင့် တူမီးထီကို တစ်စိုက်မတ်မတ်အားပေးကြသည့် အယောက်စီတိုင်းအား ချင်းရန်ပုံငွေအဖွဲ့ - တူမီးထီမှ ကျေးဇူးတင်ကြောင်း ဖော်ပြထားသည်။
တူမီးထီအပတ်စဉ် (၆) အတွက် ထီလက်မှတ်များ ရောင်းချနေပြီဖြစ်ပြီး အောက်တိုဘာလ ၃၁ရက်နေ့တွင် ကံထူးရှင်များကို ပြန်လည်ရွေးချယ်သွားမည် ဖြစ်ကြောင်းသိရသည်။
တူမီးထီသည် ၂၀၂၁ ခုနှစ်တွင်စတင်သည့် မြန်မာနွေဦးတော်လှန်ရေးအတွက် လိုအပ်သည့် တော်လှန်ရေးရန်ပုံငွေရှာဖွေရန် ဖွဲ့စည်းထားသော ချင်းရန်ပုံငွေအဖွဲ့ (Chin Relief Funding Program - CRFP ) မှရောင်းချသော ချင်းဒီဂျစ်တယ် ထီဖြစ်သည်။
စာတည်း - သန့်ဇော်(သန်လျင်)
