မန္တလေး(မဇ္စျိမ)။ ။ မန္တလေးတွင် မြို့နယ်လျှပ်စစ်အင်ဂျင်နီယာရုံးအစောင့်များဖြစ်ကြသည့် စစ်ကောင်စီတပ်မှ တပ်ကြပ်ကြီးနှစ်ဦး အချင်းချင်းပစ်ခတ်မှုဖြစ်ပြီး၊ တစ်ဦး ပွဲချင်းပြီး သေဆုံးသွားကြောင်း သတင်းရရှိသည်။
မဟာအောင်မြေမြို့နယ်၊ မြတောင်ကျောင်းတိုက်ဘေး ၃၅ လမ်း၊ ၈၆ လမ်းနှင့် ၈၇ လမ်းကြားရှိ မြို့နယ်လျှပ်စစ်အင်ဂျင်နီယာရုံးတွင် အောက်တိုဘာ ၉ ရက် နေ့လယ် ၃ နာရီခန့်၌ အရက်မူး၊ စကားများရန်ဖြစ်ရာမှ ပစ်ခတ်မှုဖြစ်ပွားခဲ့ခြင်း ဟုသိရသည်။
“ တပ်ကြပ်ကြီးနှစ်ယောက် အရက်မူးပြီးရန်ဖြစ်တာကနေ လက်ထဲသေနတ်အသင့်ရှိနေတော့ အပြန်အလှန်ပစ်ကြတာပါ။ တစ်ယောက်က တပ်ကြပ်ကြီးကျော်မျိုးထွန်းတဲ့၊ ပွဲချင်းပြီးသေတယ်။ နောက်တစ်ယောက်က မြတ်နိုးအောင်၊ သူက ဒဏ်ရာနဲ့လို့ပြောတာပဲ။ နန်းတွင်းထဲ သယ်သွားတာတွေ့လိုက်ရတယ်” ဟု ရဲတပ်ဖွဲ့အသိုက်အ၀န်းနှင့် နီးစပ်သူတစ်ဦးကပြောသည်။
ပစ်ခတ်မှုဖြစ်ပွားခဲ့သည့် အဆိုပါလျှပ်စစ်ရုံးသည် မန္တလေးမြို့၏အထင်ကရ မြတောင်ဘုန်းကြီးကျောင်းနှင့်လမ်းတစ်ဘက်ခြားတွင်တည်ရှိသည်။
ထို့အပြင် လျှပ်စစ်ရုံး၀င်းအတွင်းမှနေ၍ နေ့စဉ်နှင့်အမျှ အော်ဟစ်ဆဲဆိုသံများကြားနေရကြောင်းနှင့် တစ်ရံတစ်ခါတွင် သေနတ်ပစ်ဖောက် ခြောက်လှန့်သံများလည်းကြားရလေ့ရှိကြောင်း ဒေသခံများထံမှသိရသည်။
စာတည်း ။ ။ Alden
စာမူတည်းဖြတ်။ ။ သန့်ဇော်(သန်လျင်)
