မဇ္ဈိမ ။ ။တနင်္သာရီတိုင်း ၊ ထားဝယ်မြို့နယ်တွင် စစ်ကောင်စီက ယနေ့ အောက်တိုဘာလ ၉ ရက်တွင် စည်ကား သိုက်မြိုက်စွာ ကျင်းပမည်ဟု စီစဉ်ထားသည့် ထားဝယ်ရိုးရာသပိတ်မျှောပွဲသို့ မြို့ခံများပါဝင်ခြင်းမရှိ၍ စစ်ကောင်စီတပ် အသိုင်းဝိုင်းမှ လူများဖြင့်သာ ကျင်းပခဲ့ကြောင်း သိရသည်။
စစ်ကောင်စီက ဦးဆောင် ကျင်းပခဲ့သည့် ထားဝယ်ရိုးရာ သပိတ်မျှောပွဲတော် ဖွင့်ပွဲ အခမ်းအနားကို ယနေ့ နံနက်ပိုင်းက ထားဝယ်မြို့၊ တလိုင်းမရပ်၊ ဆိပ်ကမ်းသာလမ်း၊ ပြည်သူ့ အပန်းဖြေ ရင်ပြင်၊ ထားဝယ်မြစ်ကမ်းတွင် ပြုလုပ်ခဲ့ခြင်းဖြစ်သည်။
အဆိုပါ ထားဝယ်ရိုးရာ သပိတ်မျှောပွဲကို လုံခြုံရေး တင်းကျပ်ထားပြီး မြို့ခံပြည်သူများ ပါဝင်ခြင်းမရှိခြင်းကြောင့် စစ်ကောင်စီခန့် ဝန်ကြီးချုပ်နှင့် စစ်ကောင်စီတပ် အသိုင်းဝိုင်းမှ လူအနည်းငယ်သာ တက်ရောက်ခဲ့ကြောင်းကို စစ်ကောင်စီ၏ ဝါဒဖြန့် လူမှုကွန်ရက်များတွင် ဖော်ပြထားချက်အရ သိရသည်။
"စစ်တပ် အသိုင်းဝိုင်းက လူတွေနဲ့ မြို့ထဲက လူတချို့ ပါဝင်ပေမယ့် အားလုံး ပေါင်းမှ ၁၀၀ တောင် မပြည့်ပါဘူး"ဟု ထားဝယ်မြို့ခံ တစ်ဦးက ပြောသည်။
စစ်ကောင်စီ၏ ထားဝယ်ရိုးရာ သပိတ်မျှောပွဲ မကျင်းပမီ ပြီးခဲ့သည့် အောက်တိုဘာလ ၆ ရက်နေ့ ညပိုင်းက ပွဲစီစဉ်ထားသည့် နေရာအနီးတွင် ဗုံးပေါက်ကွဲမှု ဖြစ်ပွားခဲ့ပြီး ပြည်သူ့ကာကွယ်ရေး တပ်ဖွဲ့ဝင်များက ပြည်သူများ ပါဝင်ဆင်နွှဲခြင်း မပြုလုပ်ဘဲ သပိတ်မှောက်ကြရန် တိုက်တွန်း နိုးဆော်ခဲ့သည်။
စာတည်း။ ။မောင်ကောင်း
စာမူတည်းဖြတ်။ ။ အောင်ကျော်ဖြိုး
