တရုတ်စစ်ရေးလေ့ကျင့်မှုကို ထိုင်ဝမ်သား ၇၈ ရာခိုင်နှုန်းသည် မကြောက်ကြောင်း ဩဂုတ် ၁၆ ရက်က ထုတ်ပြန်သည့် သဘောထားစစ်တမ်း၌ ဖော်ပြထားသည်။
ထိုင်ဝမ်နိုင်ငံသား ၅၂ဒသမ ၉ ရာခိုင်နှုန်းသည် ကိုယ်ပိုင်အုပ်ချုပ်ခွင့်ရကျွန်းသို့ မကြာသေးမီက လာရောက်ခဲ့သည့် အမေရိကန် အောက်လွှတ်တော်ဥက္ကဋ္ဌ နန်စီပလိုစီ၏ ခရီးစဉ်ကို ကြိုဆိုကြောင်း ထိုင်ဝမ်လူထုအမြင်ဖောင်ဒေးရှင်း (TPOF) ၏ စစ်တမ်းကို ကိုးကား၍ Taiwan News သတင်းက ဖော်ပြခဲ့သည်။
တရုတ်၏ စစ်ရေးလေ့ကျင့်မှုကို ကြိုတင်သိရှိထားသည့်တိုင် ခရီးစဉ်ကို စော၍လာသင့်ခဲ့ကြောင်း စစ်တမ်းတွင် အများစုက ဖြေဆိုခဲ့သည်။
ပလိုစီ၏ ခရီးစဉ်အပြီး ထိုင်ဝမ်အနီး၌ တရုတ်၏ ဒုံးကျည်ပစ်လွှတ်မှုများနှင့် စစ်ရေးလေ့ကျင့်မှု များနှင့် ပတ်သက်ပြီး ၅၂ ဒသမ ၉ ရာခိုင်နှုန်းက ခရီးစဉ်ကို စော၍လာသင့်ကြောင်း ဖြေဆိုခဲ့သလို ၃၃ ဒသမ ၆ ရာခိုင်နှုန်း က ထိုင်ဝမ်အနေဖြင့် ခရီးစဉ်ကို ဖျက်သိမ်းသင့်သည်ဟု ပြောသည်။ ထိုင်ဝမ်အပေါ် ပဲ့ထိန်းဒုံးကျည်များ ပစ်လွှတ်သော်လည်း တရုတ်၏ စစ်ရေးလေ့ကျင့်မှုကို မကြောက်ကြကြောင်း ထိုင်ဝမ်သားအများစုဖြစ်သည့် ၇၈ ဒသမ ၃ ရာခိုင်နှုန်းက ဖြေဆိုခဲ့သလို စစ်ရေးလေ့ကျင့်မှုကို ကြောက်သူ ၁၇ ဒသမ ၂ ရာခိုင်နှုန်းရှိသည်။
ကိုယ်ပိုင်အုပ်ချုပ်ခွင့်ရကျွန်းသို့ နောက်ထပ် အမေရိကန်လွှတ်တော်ကိုယ်စားလှယ်အဖွဲ့ လာရောက်ချိန်တွင် အဆိုပါ စစ်တမ်း ထွက်ပေါ်လာခြင်း ဖြစ်သည်။
အမေရိကန်ကွန်ဂရက်လွှတ်တော်အမတ်များက ထိုင်ဝမ်သမ္မတ စိုင်အင်ဝမ်နှင့်တွေ့ဆုံစဉ်အတွင်း တရုတ်စစ်တပ် က ထိုင်ဝမ်၏ ပန်ဂူကျွန်းစုများအနီးတွင် စစ်ရေးလေ့ကျင့်မှုများ ထပ်မံပြုလုပ်ခဲ့ကြောင်း ပြောခဲ့သည်။
