ပါကစ္စတန်နိုင်ငံတွင် ပြီးခဲ့သည့် ဇူလိုင်လက နိုင်ငံသုံးရူပီးငွေတန်ဖိုးကျဆင်းပြီး အစားအစာဈေးနှုန်းများ တစ်ဟုန်ထိုး မြင့်တက်မှုနှင့်အတူ ငွေကြေးဖောင်းပွမှုနှုန်းက ၁၄ နှစ်တာအတွင်း အမြင့်ဆုံးကို ရောက်ရှိခဲ့ကြောင်း ဩဂုတ် ၁ ရက်တွင် ထုတ်ပြန်သည့် တရားဝင် ကိန်းဂဏန်းအချက်အလက်များက ဖော်ပြသည်။
စားသုံးသူ ဈေးဆနှုန်း (CPI) ဖြင့် တိုင်းတာသည့် ငွေကြေးဖောင်းပွမှုနှုန်းက ယခုနှစ် ဇူလိုင်လတွင် ၂၄ ဒသမ ၉၃ ရာခိုင်နှုန်း မြင့်တက်ခဲ့ရာတွင် ၂၀၂၁ ခုနှစ် ဇူလိုင်လ၏ ၈ ဒသမ ၄ ရာခိုင်နှုန်း မြင့်တက်ခဲ့မှုနှင့် နှိုင်းယှဉ်ကြည့်နိုင်ကြောင်း ပါကစ္စတန် စာရင်းအင်းဗျူရိုက ထုတ်ပြန်သည့် ဒေတာအချက်အလက်များက ဖော်ပြသည်။
ထို့ပြင် အဆိုပါ ငွေကြေးဖောင်းပွမှုနှုန်းကို ဇွန်လက ၂၁ ဒသမ ၃ ရာခိုင်နှုန်း မြင့်တက်ခဲ့မှုနှင့်လည်း နှိုင်းယှဉ်ထားပြီး ယခု အဆင့်ကို လွန်ခဲ့သည့် ၂၀၀၈ ခုနှစ် ဩဂုတ်လက နောက်ဆုံး မြင်တွေ့ခဲ့ရခြင်းဖြစ်သည်။
တစ်လထက်တစ်လ အခြေခံအားဖြင့် CPI အခြေပြု ငွေကြေးဖောင်းပွမှုနှုန်းသည် ၂၀၂၂ ဇူလိုင်လတွင် ၄ ဒသမ ၃ ရာခိုင်နှုန်း မြင့်တက်ခဲ့ရာတွင် အစောပိုင်းလက ၆ ဒသမ ၃ ရာခိုင်နှုန်း မြင့်တက်မှု၊ ၂၀၂၁ ခုနှစ် ဇူလိုင်လက ၁ ဒသမ ၃ ရာခိုင်နှုန်း မြင့်တက်မှုနှင့် နှိုင်းယှဉ်နိုင်သည်။
ပြီးခဲ့သည့် ဆယ်စုနှစ် တစ်စုကျော်အကြာ ၂၀၀၉ ဘဏ္ဍာနှစ်ကာလအတွင်း ပါကစ္စတန်သည် တည်ငြိမ်မှု မရှိဘဲ မြင့်မားသော ငွေကြေးဖောင်းပွမှုကို တွေ့ကြုံခဲ့ရသည်။ ၂၀၀၈ ခုနှစ် ဇူလိုင်လတွင် CPI ငွေကြေးဖောင်းပွမှုနှုန်းက ၂၄ ဒသမ ၃ ရာခိုင်နှုန်း မြင့်တက်ပြီး ထို့နောက် အလားတူနှစ်၏ ဩဂုတ်လတွင် ငွေကြေးဖောင်းပွမှုနှုန်းက ၂၅ ဒသမ ၃ ရာခိုင်နှုန်း မြင့်တက်ခဲ့သည်။ ပါကစ္စတန်၏ ငွေကြေးဖောင်းပွမှုနှုန်းသည် ယခုနှစ် ၂၀၂၂ ဇူလိုင်လတွင် အဆိုပါ အဆင့်သို့ တစ်ဖန် ရောက်ရှိခဲ့ခြင်း ဖြစ်သည်။
ပါကစ္စတန်အစိုးရသည် ချေးငွေ ဒေါ်လာ ၁ ဒသမ ၂ ဘီလီယံကို ရယူနိုင်ရန် နိုင်ငံတကာငွေကြေးရန်ပုံငွေအဖွဲ့ထံ ပေးအပ်ထားသည့် ကတိကဝတ်တစ်ရပ်အောက်တွင် ထောက်ပံ့ကြေးများကို ဖယ်ရှားကာ စွမ်းအင်ဈေးနှုန်းများကို အတက်ဘက်တွင် ဆက်ရှိစေခြင်းနှင့်အတူ ငွေကြေးဖောင်းပွမှုနှုန်းက ဆက်လက် မြင့်တက်နေလိမ့်မည် ဖြစ်ကြောင်း Spectrum Securities Ltd ၏ သုတေသနဌာန အကြီးအကဲ အဗ္ဘဒူလ် အာဇင်းမ်က ပြောသည်။