ဧရာဝတီတိုင်းဒေသကြီး ပုသိမ်မြို့တွင် အမှတ်(၂) တံတားကျိုးကျ၍ လူထိခိုက်သေဆုံးမှုများနိုင်ဆိုသည့် သတင်းများ ယနေ့ ဩဂုတ်လ ၈ ရက်နေ့တွင် လူမှုကွန်ရက် သုံးစွဲသူများကြား ပျံ့နှံ့မှုရှိနေသည်ကို တွေ့ရှိရ သည်။ ထိုအကြောင်းအရာမှာ မှားယွင်းနေသည်။
"#Breaking_News ပုသိမ်အမှတ်(၂)တံတား ကျိုးကျ။ (နေ့လည် ၁၂:၁၇ မိနစ်) လူထိခိုက်သေဆုံးမှု များနိုင်။ အရေးပေါ်ကယ်ဆယ်ရေးများ အမြန်လိုအပ်နေ။ Credit- Myint Than Htun " ဟု တံတား ကျိုးကျနေသည့်ဓာတ်ပုံနှင့်တွဲ၍ ထပ်ဆင့်ကူးယူဖော်ပြနေကြပြီး မူရင်းရေးသားသူကို ရှာဖွေရှာတွင် မတွေ့ရှိခဲ့ပေ။
အဆိုပါ ပို့စ်ကို " Ven Vannita" အမည်ရှိအကောင့်မှ ပြန်လည်ကူးယူဖော်ပြထားကာ ဝေမျှသူ ၄၂၀ နီးပါးရှိခဲ့သည်။ ထိုရေးသားမှုကို ပြန်လည်ကူးယူပြီးဖြန့်ဝေမှု များစွာရှိနေဆဲပင်ဖြစ်သည်။
အဆိုပါသတင်းမှားပို့စ့်များကို အောက်ပါလင့်တွင်ကြည့်နိုင်သည်။
မဇ္ဈိမ၏ အချက်အလက်စစ်ဆေးသူများမှ အဆိုပါသတင်းတွင် အသုံးပြုထားသည့် သတင်းဓါတ်ပုံကို ရှာဖွေခဲ့ရာ ၂၀၁၉ ခုနှစ်က ထိုင်ဝမ်နိုင်ငံရှိ "Nanfangao" တံတားကျိုးကျခဲ့သည့်ပုံသာ ဖြစ်ကြောင်း စစ်ဆေးတွေ့ရှိခဲ့သည်။
အဆိုပါသတင်းလင့်ကို အောက်တွင်ကြည့်နိုင်သည်။
ပုသိမ်မြို့တွင် နေထိုင်သည့် ဒေသခံတစ်ဦးနှင့် ဆက်သွယ်မေးမြန်းရာတွင်လည်း " ပုသိမ်တံတားက မကျိုး ပါဘူး၊ ကျွန်တော်တို့ ဖြတ်သွားဖြတ်လာရင်းနဲ့တွေ့ပါတယ် ကောလဟာလသာဖြစ်ပါတယ်ခင်ဗျ" ဟု ပြန်လည်ဖြေကြားခဲ့သည်။
ထို့ပြင် မဇ္ဈိမ၏ ဧရာဝတီတိုင်း နယ်ခံ သတင်းထောက်မှ ပေးပို့လာသည့် သတင်းဓါတ်ပုံများအရ ပုသိမ်တံတား ကျိုးခြင်းမရှိပဲ မူလအတိုင်းသာ ရှိနေသည်ကို တွေ့ရသည်။
ထို့အပြင် အဆိုပါသတင်းမှာ သတင်းအမှားသာဖြစ်ကြောင်း မြန်မာနိုင်ငံလူမှုကယ်ဆယ်ရေးအဖွဲ့-ဧရာဝတီတိုင်းဒေသကြီး ၏ ဖေ့ဘွတ်ခ်စာမျက်နှာတွင်လည်း ဖော်ပြထားသည်။
အဆိုပါ ပို့စ့်ကိုအောက်တွင်ကြည့်နိုင်သည်။
ထို့ကြောင့် ပုသိမ် အမှတ်(၂) တံတားကျိုးကျ၍ လူထိခိုက် သေဆုံးမှုများနိုင်ဆိုသည်မှာ အခြားဖြစ်စဉ်မှ ပုံကို အသုံးပြုထားပြီး လုပ်ဇာတ်ခင်းထားသည့် သတင်းအမှားသာဖြစ်သည်။
မဇ္ဈိမ၏သတင်းဖတ်ရှုသူများအနေဖြင့် သတင်းတုဟုသံသယရှိသည့်အချက်အလက်များ၊ သတင်းဆောင်း ပါးများ၊ သတင်းမှားများကို ယခုလင့်သို့ - https://bit.ly/3x5qnf5 ဝင်ရောက်ဖြည့်စွက် ရေးသားပေးပို့ မေးမြန်းနိုင်ပါသည်။