အမေရိကန်အောက်လွှတ်တော်ဥက္ကဋ္ဌ နန်စီပလိုစီထွက်ခွါအပြီး နာရီပိုင်းအကြာ၌ တရုတ်သည် ထိုင်ဝမ် ပင်မကျွန်းဝန်းကျင်တွင် ဩဂုတ် ၃ ရက်က စစ်ရေးလေ့ကျင့်မှုများ စတင်လိုက်ကြောင်း တရုတ်နိုင်ငံပိုင်မီဒီယာ ဆင်ဟွာသတင်းဌာနက ဖော်ပြသည်။
ဒေသစံတော်ချိန် မွန်းတည့်ချိန်၌ ထိုင်ဝမ်ကျွန်းပတ်လည်ရှိ သတ်မှတ်ဇုန် ၆ ခုတွင် ကျည်ဆန်အစစ်ဖြင့် စစ်ရေးလေ့ကျင့်မှုစတင်ခဲ့ကြောင်း တရုတ်နိုင်ငံပိုင်မီဒီယာကို ကိုးကား၍ Al Jazeera သတင်းဌာနက ဖော်ပြခဲ့သည်။
တရုတ်စစ်တပ်၏ အရှေ့ပိုင်းကွပ်ကဲမှုဌာနချုပ်သည် ထိုင်ဝမ်အနီးရှိ မြောက်ပိုင်း၊ အနောက်တောင်နှင့် အရှေ့တောင်ဘက် ရေပြင်နှင့် လေပိုင်နက်တို့တွင် ပူးတွဲတိုက်ခိုက်ရေးလေ့ကျင့်မှုများကို ဩဂုတ် ၃ ရက်က ပြုလုပ်ခဲ့ကြောင်း ဆင်ဟွာသတင်းဌာနက ဖော်ပြသည်။
အရှေ့ပိုင်းကွပ်ကဲရေးဌာနချုပ်၏ လေ့ကျင့်မှုတွင် ရေတပ်၊ လေတပ်၊ ဒုံးပျံတပ်ဖွဲ့၊ ဗျူဟာမြောက် ပံ့ပိုးရေးတပ်ဖွဲ့နှင့် ထောက်ပံ့ပို့ဆောင်ရေးတပ်ဖွဲ့တို့မှ တပ်ဖွဲ့ဝင်များ ပါဝင်သည်။ အဆိုပါ စစ်ရေးလေ့ကျင့်မှုများတွင် တာဝေးပစ် ကျည်အစစ်ဖြင့်ပစ်ခတ်မှုနှင့် သမားရိုးကျ ဒုံးကျည်စမ်းသပ် ပစ်လွှတ်မှုများ ပါဝင်ကြောင်း တရုတ်စစ်တပ် ရေတပ်သုတေသနဌာနမှ စီနီယာသုတေသီ ကျန်းဂျန်ရှဲက ပြောသည်။
နိုင်ငံတကာသဘောတူညီချက်များအရ စစ်ရေးလေ့ကျင့်မှုဧရိယာများကို ၃ ရက်ကြိုတင်၍ ကြေညာ ရမည်ဖြစ်သလို အရေးပေါ်အခြေအနေ၌ ၂၄ နာရီကြိုတင်၍ သတိပေးရမည်ဖြစ်သည်။
ဖွံ့ဖြိုးပြီးနိုင်ငံ ၇ နိုင်ငံအုပ်စု (ဂျီ-၇) က ပလိုစီ၏ ခရီးစဉ်အပေါ် တရုတ်နိုင်ငံ၏ တုံ့ပြန်မှုကို စိုးရိမ်ကြောင်း ထုတ်ဖော်ပြောဆိုခဲ့ပြီး တရုတ်၏ လှုပ်ရှားမှုများသည် မလိုအပ်သောအရှိန်မြင့်မှုများဖြစ်လာစေနိုင်သဖြင့် တည်တည်ငြိမ်ငြိမ် လုပ်ဆောင်ရန် တောင်းဆိုလိုက်သည်။ အမေရိကန်အောက်လွှတ်တော်ဥက္ကဋ္ဌ နန်စီပလိုစီသည် ထိုင်ဝမ်မှ ထွက်ခွာပြီး နာရီပိုင်းအကြာတွင် တရုတ်က ထိုင်ဝမ်လေကြောင်းရန်ကာကွယ်ရေးသတ်မှတ်ဇုန် (ADIZ) သို့ လေယာဉ် ၂၇ စီး စေလွှတ်ခဲ့ကြောင်း ထိုင်ဝမ်ကာကွယ်ရေးဝန်ကြီးဌာနက ပြောသည်။
