ရေဖြူ၊ ဩဂုတ်လ၊ ၃
တနင်္သာရီတိုင်း၊ ရေဖြူမြို့နယ်ရှိ ဝက်ချောင်းရွာတံတားအနီးတွင် ဇူလိုင်လ ၃၁ ရက်နေ့ ည ၇ နာရီခွဲခန့်က မြေတင်ကားတစ်စီးနှင့် Vigo ကား လေးစီးပါဝင်သည့် စစ်ကောင်စီယာဉ်တန်းကို ကာကွယ်ရေး ပူးပေါင်း တပ်ဖွဲ့တို့က မိုင်းခွဲတိုက်ခိုက်ခဲ့ရာ စစ်ကောင်စီတပ်သား ၃၀ ဦး သေဆုံးသွားကြောင်း ထားဝယ်ပြည်သူ့ ကာကွယ်ရေးအဖွဲ့ DGRFက ဩဂုတ်လ ၂ ရက်နေ့တွင် ထုတ်ပြန်သည်။
အဆိုပါ စစ်ကောင်စီတပ်ဖွဲ့ယာဉ်တန်းသည်ရေဖြူမြို့နယ် ဧကနီနှင့် ခမောင်းချောင်းရွာရှိ လူနေအိမ်ရှစ် လုံးခန့်ကို မီးရှို့ဖျက်ဆီးပြီးအပြန်တွင် မိုင်းဆွဲတိုက်ခိုက်ခံရခြင်းဖြစ်သည်ဟု ဒေသခံတစ်ဦးက ပြောသည်။
ခမောင်းချောင်းရွာနေဒေသခံတစ်ဦးက “စစ်ကားတွေကိုမိုင်းဆွဲခံရတော့ သူတို့ဖက်က ထိသွားလို့ ဖြစ်မယ် လက်နက်ကြီးတွေနဲ့ ရမ်းသန်းပစ်တော့ နှစ်ဖက်အပြန်အလှန်တိုက်ပွဲဖြစ်ပွားခဲ့တယ်”ဟု ပြောသည်။
ထို့အပြင် သြဂုတ်လ ၁ ရက်နေ့ မွန်းလွဲ ၂ နာရီခွဲခန့်ကလည်း သဗြေဇွန်းရွာအနီးတွင် ကားခုနစ်စီးပါ စစ်ကောင်စီယာဥ်တန်းကို ပြည်သူ့ကာကွယ်ရေးအဖွဲ့က အဝေးထိန်းမိုင်းဖြင့်ဖောက်ခွဲတိုက်ခိုက်ရာတွင် ထိချက်လွဲချော်သွားခဲ့ကြောင်း ယင်းအဖွဲ့များထံမှ သိရ သည်။
အဆိုပါ တိုက်ခိုက်မှုများကို ထားဝယ်ပြည်သူ့ကာကွယ်ရေးအဖွဲ့ (DGRF)၊ လောင်းလုံး ပြည်သူ့ကာကွယ် ရေးအဖွဲ့ (LLPDF)၊ T-PDF တို့ အဖွဲ့သုံးဖွဲ့ အတူပူးပေါင်း တိုက်ခိုက်မှု ပြုလုပ်ခဲ့ကြောင်း သိရသည်။
ဓာတ်ပုံ - ရေဖြူမြို့ လမ်းပိုင်းတစ်နေရာ
