ဇူလိုင်လ ၃၀ ရက်
ရန်ကုန်တိုင်း၊ ဒဂုံမြို့သစ်တောင်ပိုင်းမြို့နယ်၊ (၁၉) ရပ်ကွက်၊ မြိတ်လမ်းတွင် ယနေ့ ဇူလိုင်လ ၃၀ ရက် ညနေ ၃ နာရီကျော်အချိန်၌ ဆန္ဒပြသပိတ်မှအပြန်လမ်းတွင် စစ်ကောင်စီ၏ အရပ်ဝတ်များက ဂျပန်နိုင်ငံသားတစ်ဦးအပါအဝင် သုံးဦးကို ဖမ်းဆီးသွားကြောင်း သိရသည်။
တောင်ဒဂုံမြို့နယ်တွင် “အမှန်တရားကို အမှားတစ်ရာက ဖမ်းထားသည်”ဟူသော သပိတ်ကို ယနေ့ ညနေ ၃ နာရီတွင် ပြုလုပ်ပြီး အပြန်တွင် ယခုကဲ့သို့ ဖမ်းဆီးသွားခဲ့ခြင်း ဖြစ်သည်။
“ညနေသပိတ်က အပြန်မှာ ပရိုဘောက်ပေါ်ကနေ အရပ်ဝတ်တွေနဲ့ ဖမ်းသွားတာဗျ” ဟု သပိတ်အဖွဲ့များနှင့် နီးစပ်သူတစ်ဦးက အတည်ပြုပြောကြားသည်။
ဖမ်းဆီးသွားချိန်တွင် ဂျပန်နိုင်ငံသား Toru Kubota ၊အမျိုးသားတစ်ဦးနှင့် အမျိုးသမီးတစ်ဦးတို့ဖြစ်ကြပြီး ကျန်သူများမှာလွတ်မြောက်သွားခဲ့သည်ဟု သိရသည်။
ဖမ်းဆီးသွားသူများကို မည်သည့်နေရာသို့ ဖမ်းဆီးသွားကြောင်းမသိရသေးကြောင်း သပိတ်အဖွဲ့ဝင်များက ဆိုသည်။