ဇူလိုင်လ ၂၀ ရက်
ရှမ်းပြည်အရှေ့ပိုင်း တာချီလိတ်မြို့ တာလေမြို့နယ်ခွဲအတွင်းရှိ နားဟိုင်းလုံကျေးရွာတွင် ယနေ့ ဇူလိုင်လ ၂၀ ရက် မနက်ပိုင်း၌ မိုးသည်းထန်စွာရွာသွန်းပြီး ကျေးရွာအတွင်းရှိ နေအိမ်များ ရေလွှမ်းမိုးမှု ဖြစ်ပွားခဲ့ကြောင်းသတင်းရရှိသည်။
နားဟိုင်းလုံကျေးရွာပတ်ဝန်းကျင်တွင် ရွှေတူးဖော်မှု လုပ်ကွက်အများအပြားရှိပြီး ဒေသခံများက စတင်တူးဖော်သည့် ၂၀၁၂ခုနှစ်ကတည်းက အပြင်းအထန်ကန့်ကွက်ခဲ့ကြသော်လည်း အစိုးရအဆက်ဆက် တူးဖော်မှုကိုရပ်တန့်ခဲ့ခြင်းမရှိရာ နှစ်စဥ်ရေလွှမ်းမိုးမှုကို ပြင်းထန်စွာခံစားရကြောင်းဒေသခံတစ်ဦးက ပြောသည်။
"အဓိက က ချောင်းထဲ သူတို့ရွှေတူးပြီးပါလာတဲ့ မြေစာတွေကြောင့် ရေကြီးရတာပါ၊ မိုးနည်းနည်းလေးများလိုက်တာနဲ့ ရေကဝင်လာတယ်၊ အရင်ရွှေမတူးခင်ကတော့ တစ်ခါမှမကြုံဖူးဘူး၊ ကျမတို့ကန့်ကွက်ပြောဆိုလည်း ကျမတို့ရွာကို ဘယ်သူမှအရေးမလုပ်ဘူး " ဟု ယင်းဒေသခံက ပြောသည်။
နားဟိုင်းလုံကျေးရွာသူ ရွာသားများ အဓိကအားထားရာဖြစ်သော နမ့်ခမ်းချောင်းတွင် ရွှေတူးဖော်နေသည့် ကုမ္ပဏီမှာ ရှစ်ခုခန့်အထိ ရှိနေပြီး နားဟိုင်းလုံပြည်သူများ၏ လယ်ယာမြေများမှာ နှစ်စဥ် ရွေတူးဖော်မှုမှ စွန့်ပစ်မြေစာကြောင့် ပျက်စီးနေရသည်။
