တိဗက်၊ လာဆာမြူနီစီပယ် ပြည်သူ့လုံခြုံရေးဗျူရိုက "တည်ငြိမ်မှု သံမဏိတံတိုင်း တစ်ခုတည်ဆောက်ရန်" "နိုင်ငံတော်လုံခြုံရေး" ကို ဆန့်ကျင်သည့် ရာဇဝတ်မှုများကို တိဗက်လူမျိုးများက ကျူးလွန်ကြောင်း သတင်းပေးပို့ပါက ဆုကြေးများပေးမည်ဟု ကမ်းလှမ်းထားကြောင်း ဝါရှင်တန်အခြေစိုက် လူ့အခွင့်အရေးအဖွဲ့တစ်ခုက ပြောကြားလိုက်သည်။
တိဗက်ဘာသာရေးခေါင်းဆောင် ဒလိုင်းလားမားမွေးနေ့ဖြစ်သည့် ဇူလိုင် ၆ ရက် မတိုင်မီတွင် ဒေသဆိုင်ရာ အာဏာပိုင်များက တိဘက်မြို့တော် လာဆာရှိ တိဗက်လူမျိုးများအတွက် ငွေကြေးမက်လုံးအဖြစ် တရုတ်ယွမ် ၃၀ဝ,ဝဝဝ (အမေရိကန်ဒေါ်လာ ၄၄,၈၄၀) အထိ ကမ်းလှမ်းခဲ့သည်။
နိုင်ငံတကာ တိဗက်လှုပ်ရှားမှုအဖွဲ့(ICT) ၏ အဆိုအရ အဆိုပါ သတိပေးချက်တွင် ဖော်ပြထားသော အချက် ၁၂ ချက်အနက် ၈ ချက်သည် တရုတ်အစိုးရက “တရားမဝင်၊ ရာဇဝတ်မှုလှုပ်ရှားမှုများ” ဟု သတ်မှတ်ထား သော တိဗက်လှုပ်ရှားမှုများနှင့် တိုက်ရိုက်သက်ဆိုင်နေသည်။
ဥပမာ တိဗက်ဘာသာရေး ခေါင်းဆောင် ဒလိုင်းလားမားအကြောင်း နိုင်ငံခြားသတင်းစာ ဆောင်းပါးများ သို့မဟုတ် ထုတ်လွှင့်မှုများ ဖတ်ရှုခြင်း သို့မဟုတ် ပြောဆိုခြင်းတို့ ပါဝင်နိုင်သည်။
“ဗျူရိုကို အစီရင်ခံရမယ့် ကဏ္ဍကို အသေးစိတ်ဖော်ပြထားတဲ့ အချက် ၁၂ ချက်ထဲမှာ၊ အချက် ၈ ချက်က အတွေးအ ခေါ်နဲ့ သဘောထားကို အကာအကွယ်ပေးထားတယ်လို့ ယူဆနိုင်တဲ့ အချက်တွေနဲ့ တိုက်ရိုက်သက်ဆိုင်နေပါတယ်” ဟု ICT က ပြောကြားခဲ့သည်။
“နိုင်ငံတကာ တိဗက်လှုပ်ရှားမှုအဖွဲ့(ICT) က ဒီအစီအမံတွေနဲ့ ပတ်သက်ပြီး အရမ်းစိုးရိမ်နေပါတယ်” ဟု ICT က ဇူလိုင် ၈ရက်တွင် ပြောကြားခဲ့သည်။
ယင်းရလဒ်များသည် တိဗက်လူမျိုးများ၏ ဘဝများကို နက်ရှိုင်းစွာ ထိခိုက်စေပြီး ငြိမ်းချမ်းသော သဘော ထားကွဲလွဲမှုများနှင့် နိုင်ငံတကာဥပဒေဖြင့် အကာအကွယ်ပေးထားသည့် လုပ်ရပ်များကို ရာဇဝတ်မှုအဖြစ် သတ်မှတ်သည့် အာဏာရှင်စနစ်၏ လုပ်ဆောင်ချက်အစီအမံများကို ကိုယ်စားပြုထားကြောင်း ဆိုသည်။
အများပြည်သူသတိပေးချက်အတွက် အခြေခံများအဖြစ် တရုတ်နိုင်ငံနှင့် တိဗက်ကိုယ်ပိုင်အုပ်ချုပ်ခွင့်ရဒေသ၏ ဥပဒေများနှင့် စည်းမျဉ်းများကို ကိုးကားပြီး ပြည်သူ့လုံခြုံရေးဗျူရိုက အတိအလင်းဖော်ပြထားသည်။
