ဇွန်လ ၁၂ ရက်
ကရင်ပြည်နယ်၊ မြဝတီမြို့၊ ကြံ့ခိုင်ဖွံ့ဖြိုးရေးပါတီရုံးရှေ့တွင် ပြင်းထန်သည့် ပေါက်ကွဲမှုတစ်ခု ဖြစ်ပွားခဲ့ကြောင်း သိရသည်။
မြဝတီမြို့ ဈေးကြီးလမ်းမနှင့် မွန်ကျောင်းလမ်းထောင့်ရှိ ကြံ့ခိုင်ဖွံ့ဖြိုးရေးပါတီရုံး ခြံစည်းရိုးရှေ့တွင် ဇွန်လ၁၁ရက်နေ့ ည၁၀နာရီခွဲအချိန်၌ ဗုံးပေါက်ကွဲမှုဖြစ်ပွားခဲ့ကြောင်း ဒေသခံများထံက သိရသည်။
“ဗုံးပေါက်တာ အသံလည်းကျယ်တယ် ။ မြေပါတုန်တယ် ။ ဟိုတခါ အမှတ် (၁) တံတားပေါက်သလိုမျိုးပေါက်တာ အတော်ကြီးကြမ်းတယ် ။ လူထိခိုက်တာတော့ မကြားမိသေးဘူး ။ ဒီနေ့မနက်တော့ အပျက်အစီးတွေ လာရှင်းနေတယ် ။ မနက်ကတည်းက စစ်တပ်နဲ့ BGFတွေ ခြေရှုပ်နေကျတယ်”ဟု မြဝတီဒေသခံတစ်ဦးက ပြောသည်။
ဗုံပေါက်ကွဲမှုကြောင့် ဆိုင်ခန်းများ၊ခြံစည်းရိုးများ ပျက်စီးမှုရှိခဲ့ပြီး လူထိခိုက်မှုမရှိခဲ့ကြောင်းသိရသည်။ ဗုံးပေါက်ကွဲမှုကို မည်သည့်အဖွဲ့က လုပ်ဆောင်ခဲ့ကြောင်း မသိရှိရသေးပေ။
ပေါက်ကွဲမှုဖြစ်စဉ် ဖြစ်ပွားခဲ့ပြီးနောက် ရပ်ကွက်အချို့ကို ဧည့်စာရင်းဝင်ရောက်စစ်ဆေးခြင်းများ စစ်ကောင်စီနှင့်BGFတို့ ပြုလုပ်ခဲ့ကြသည်။
အာဏာသိမ်းပြီးနောက်ပိုင်း မြဝတီမြို့တွင် အကြိမ်၂၀နီးပါး ဗုံးပေါက်ကွဲမှုဖြစ်ပွားခဲ့ပြီး ယင်းသို့ဖြစ်ပွါးခဲ့သည့် ပေါက်ကွဲမှုများတွင် လူထိခိုက်သေဆုံးမှုမရှိခဲ့ပေ။
