ဇွန် ၁
အခြေခံပညာရေးညီလာခံက တောင်းဆိုထားသည့် စစ်ကောင်စီလက်ထက်တွင် ထွက်ပေါ်လာသောပညာရေးရလဒ်များကို ပယ်ဖျက်ပေးရန် တောင်းဆိုမှုများအပေါ်တွင် အမျိုးသားညီညွတ်ရေးအစိုးရ (NUG)မှ ပြန်လည် တုံ့ပြန်မှုမရှိ သေးကြောင်း သိရသည်။
ထို့ကြောင့် ကျောင်းသားအစုအဖွဲ့များဖြစ်သည့် အခြေခံပညာကျောင်းသားများသမဂ္ဂ (အကသများကွန်ရက်နှင့်အခြားသမဂ္ဂများနှင့်အခြေခံပညာကျောင်းသားလူငယ်များအစည်းအရုံး(အကလ-ဗဟို)လူငယ်များမှ စုပေါင်းပြီး ဇွန်၁ရက်နေ့တွင် အဆိုနှင့်ပတ်သက်ပြီး အမြန်ဆုံးအကောင်အထည်ဖော်ပေးရန် အသိပေးထုတ်ပြန်ခဲ့သည်။
“ကျောင်းသားတွေဘက်က တောင်းဆိုတဲ့ အခြေခံပညာအဆင့်ပြီးမြောက်ကြောင်း ရလဒ်များကို ပယ်ဖျက်ရေးအဆိုကို အခုထိသူတို့ (NUG) ဘက်က တုံ့ပြန်လာတာ မရှိသေးဘူး” ဟု အခြေခံပညာကျောင်းသားများ သမဂ္ဂမှ တာဝန်ရှိသူ တစ်ဦးက မဇ္ဈိမကိုပြောသည်။
တစ်နိုင်ငံလုံးရှိ CDM ဆရာ၊ ဆရာမများ နှင့် ကျောင်းသား၊ ကျောင်းသူ အစုအဖွဲ့များပါဝင်သည့် အခြေခံပညာရေးညီလာခံတစ်ခုကို ပြီးခဲ့သည့်မေလ၁၀ နေ့မှ ၁၃ရက်နေ့အထိ ကျင်းပခဲ့သည်။
ညီလာခံတွင် ကျောင်းသားကျောင်းသူများမှ စစ်ကောင်စီ၏အခြေခံပညာရေး ရလဒ်များ ကို ပယ်ဖျက်ပေးရန်တိုက်တွန်းခဲ့ပြီး အဆိုပါတိုက်တွန်းချက်ကို အမျိုးသားညီညွတ်ရေးအစိုးရ၊ အမျိုးသားညီညွတ်ရေးအတိုင်ပင်ခံကောင်စီနှင့် သက်ဆိုင်ရာ ပြည်နယ် အတိုင်ပင်ခံကောင်စီများ ထံသို့ ပေးပို့ခဲ့သည်။
ထိုသို့ပေးပို့ထားသော်လည်း အစည်းအဝေးအပြီး လဝက်နီးပါး ကျော်လာသည်အထိ NUG အစိုးရဘက်မှ တုံ့ပြန်ခြင်းမရှိသေးကြောင်းသိရသည်။
စနစ်တစ်ခုကို တွန်းဖြိုရန်ကြိုးစားရာတွင် ရန်သူ၏စနစ်များကို တရားမဝင်ကြောင်း ကြေညာမှုသည် အရေးပါသည်ဟု မြင်သဖြင့် ယခုကဲ့သို့တောင်းဆိုရခြင်းဖြစ်ကြောင်း ထုတ်ပြန်ချက်တွင် ဆိုထားသည်။
မြန်မာနိုင်ငံတွင် စစ်တပ်အာဏာသိမ်းပြီးနောက် စစ်ကောင်စီကို သပိတ်မှောက်ကြောင်း ပြသသည့် အနေဖြင့် ကျောင်းသား ၊ ကျောင်းသူအများစုသည် စစ်ကောင်စီ ဖွင့်လှစ်သော ကျောင်းများသို့သွားရောက်ခြင်း မပြုဘဲ လက်ရှိအချိန်ထိ ဆက်လက် သပိတ်မှောက် နေကြဆဲဖြစ်သည်။
