မေ ၂၃
စစ်ကိုင်းတိုင်း ကနီမြို့နယ် လင်ပုန်းရည်ကျေးရွာသို့ စစ်ကောင်စီတပ်သား ၁ဝဝ ဝန်းကျင်ခန့်က မေလ ၂၂ ရက် နံနက် ၁ဝ နာရီခန့်တွင် ကျေးရွာအတွင်းသို့ ဝင်ရောက်ကာ နေအိမ်များကိုဝင်ရောက်မွှေနှောက်ပြီး ကျေးရွာရန်ပုံငွေနှင့် ရွှေ၊ ငွေများကို ခိုးယူသွားကြောင်း ဒေသခံများကပြောကြားသည်။
“ ကျွန်မတို့က တောင်သူတွေဆိုတော့ မိုးလေရှိတုန်း တောထဲမှာ ပဲလေးဘာလေးစိုက်နေကြတာပေါ့၊ ဖုန်း လိုင်းတွေကလည်းဆက်မရတော့ ရွာထဲကို စစ်သားတွေရောက်လာတာ တစ်ယောက်စကား တစ်ယောက် ကြားပြီးမှ သိလိုက်ရတယ်။ အိမ်ကိုလည်း ရစရာမရှိအောင် မွှေနှောက်သွားတယ်။ တစ်ကျပ်သား ဆွဲကြိုး လေး တစ်ကုံး၊ သမီးနားကပ်လေးတွေ ၊ မိဘအမွေရထားတဲ့ လက်စွပ်လေးတွေနဲ့ ငွေသား ၂၅ သိန်းကို စခ (စစ်ကောင်စီတပ်သား)တွေ ခိုးသွားတယ်။ ကျွန်မတစ်ဦးတည်း မဟုတ်ပါဘူး ရွာကဒေသခံတွေလည်း သတင်းမရတော့ သိမ်းချိန် မရလိုက်လို့ တော်တော်လေး ပါသွားကြတယ်။ ကျေးရွာလူငယ့်ရန်ပုံငွေကအစ ပါသွားတယ်” ဟု ဒေသခံတစ်ဦးက ဆိုသည်။
ကနီမြို့နယ်ကို စစ်ကောင်စီတပ်က စစ်ကြောင်းစတင်ထိုးသည့်အချိန်မှစ၍ မြို့နယ်အတွင်းရှိ နေရာအနှံ အပြားတွင် ဖုန်းလိုင်းများပိတ်ထားကြောင်း ၎င်းဒေသခံများ၏ပြောကြားချက်အရ သိရသည်။