မတ်လ ၂၃ ရက်
ကရင်နီပြည်နယ်တွင် မြန်မာဘီယာ အပါအဝင် အာဏာသိမ်း စစ်တပ်ပိုင် ကုန်ပစ္စည်းများကို မသိုလှောင်ထားရန်နှင့် စစ်ဘေးရှောင်ဒေသများတွင် ကုန်ပစ္စည်းများအား ၁၀ ရာခိုင်နှုန်းထက် အမြတ်တင် မရောင်းရန် ကရင်နီအမျိုးသားကာကွယ်ရေးတပ်ဖွဲ (KNDF) တပ်ရင်း (၁၅) က ယနေ့ မတ်လ ၂၃ ရက်နေ့တွင် သတိပေးတားမြစ် ထုတ်ပြန်လိုက်သည်။
KNDF တပ်ရင်း (၁၅) လှုပ်ရှားနယ်မြေအတွင်း စစ်တပ်ထုတ်ကုန်များဖြစ်သော Mytel၊ Premium Gold၊ Red Ruby ၊ အန်ဒမန်၊ မြန်မာဘီယာ၊ မန္တလေးတံဆိပ်ဘီယာများ၊ ဆင်မင်၊ ဒဂုံ၊ ကြံတံဆိပ် ဘိလပ်မြေ၊ Milky နို့ဆီများနှင့် ရွှေဖီဦး တီးမစ်လက်ဖက်ရည်ထုတ် အစရှိသည့် မည်သည့်ထုတ်ကုန်ပစ္စည်းမဆို မရောင်းချရန် KNDF က သတိပေး ထုတ်ပြန်ထားခြင်း ဖြစ်သည်။
ယင်းအပြင် ထိုပစ္စည်းများအား လက်ဝယ်သိုလှောင်ထားခြင်းနှင့် သယ်ယူပို့ဆောင်ခြင်းများ မလုပ်ကြရန်လည်း ပြောဆိုထားသည်။
KNDF နှင့် KA တပ်ဖွဲ့ဝင်များ လှုပ်ရှားရာနယ်မြေအတွင်းရှိ ကျေးရွာများနှင့် စစ်ဘေးရှောင်ဒေသများတွင် စားသောက်ကုန် ပစ္စည်းများ ရောင်းချနေသော ကုန်စုံဆိုင်များနှင့် ဈေးဆိုင်များ သတိပေးခြင်းဖြစ်သည်။
KA တပ်ဖွဲ့က အကြီးအကဲများ ၊ KNDF တပ်ရင်း(၁၅)မှ တပ်ဗိုလ်တပ်မှူးများနှင့် ကျေးရွာလူထုအကြီးအကဲများ၏ ဆုံးဖြတ်ချက်အရ ထိုသို့ တားမြစ်ထားခြင်း ဖြစ်ကြောင်း KNDF က ဆိုသည်။
စစ်အာဏာရှင်တော်လှန်ရေး အားကောင်းရာ ဒေသအများစုနှင့် တိုင်းရင်းသား လက်နက်ကိုင် တော်လှန်ရေးနယ်မြေများတွင် အာဏာသိမ်းစစ်တပ်ပိုင် ထုတ်ကုန်များကို သပိတ်မှောက်ထားပြီး ရောင်းဝယ်ဖောက်ကားပါက ပြင်းပြင်းထန်ထန်အရေးယူမည်ဟု သတိပေးထားမှုများ ရှိသည်။