မတ်လ ၂၃ ရက်
စစ်ကိုင်းတိုင်း၊ မုံရွာမြို့ရှိ မြန်မာနိုင်ငံ လူမှုကယ်ဆယ်ရေးအသင်း (မုံရွာမြို့) အသင်း၏ ကားအား မှားယွင်း ဖောက်ခွဲမိသည့်အတွက် ဝမ်းနည်းညိုးငယ်စွာ ဝန်ချတောင်းပန်ကြောင်း ပြည်သူ့ ကာကွယ်ရေးတပ်ဖွဲ့- ယက္ခညီနောင်မှ ယနေ့ မတ်လ ၂၃ရက်တွင် ထုတ်ပြန်သည်။
မတ်လ ၂၂ရက် ည ၁၀နာရီ ၂၅မိနစ်တွင် စစ်ကောင်စီအား တိုက်ခိုက်ရန်အတွက် စောင့်ဆိုင်းနေစဉ် မြန်မာနိုင်ငံ လူမှုကယ်ဆယ်ရေးအသင်း ၏ ကျန်းမာရေးကားအား မှားယွင်း ဖောက်ခွဲမိကြောင်းဆိုသည်။
ယင်းကိစ္စသိသိချင်း ၎င်းတို့အနေဖြင့် များစွာစိတ်မကောင်းဖြစ်ရကြောင်း၊ လူမှုကယ် ဆယ်ရေးအသင်းကြီး၏ လူမှုကွန်ရက်တွင် တိုက်ရိုက်ထုတ်လွှင့်နေမှုများအား မကြည့်ခဲ့ရကြောင်းနှင့် မီးပျက်နေသောအခြေအနေများကြောင့် ဖြစ်ခဲ့ရကြောင်း သိရသည်။
အသင်းကြီး၏ လူများထိခိုက်မှုမရှိသည့် သတင်းကြားရသည့်အတွက်ဝမ်းမြောက်ခဲ့ရပြီး ယခုကဲ့သို့မှားယွင်းမှုအတွက် အများပြည်သူ သိအောင် ဝန်ချတောင်းပန်ပြီး မြန်မာနိုင်ငံလူမှုကယ်ဆယ်ရေးအသင်း (မုံရွာမြို့) ကျေနပ်သည်အထိ ကိစ္စအဝဝ အား တာဝန်ယူဖြေရှင်းသွားမည်ဖြစ်ကြောင်းဆိုသည်။
နောက်နောင် ယခုကဲ့သို့ ကိစ္စများ မဖြစ်ပေါ်စေရန် အထူးဂရုစိုက်လုပ်ဆောင် သွားမည်ဖြစ်ပြီး စစ်ကောင်စီ အမြစ်ပြတ်သည်အထိ တိုက်ပွဲဝင်သွားမည်ဖြစ် ကြောင်း ထုတ်ပြန်ချက်တွင်ဖော်ပြပါရှိသည်။
တာဝန်ယူမှု၊ တာဝန်ခံမှု ရှိစွာဖြင့် စာထုတ်တောင်းပန်ခြင်းအား ကျေးဇူးတင်ကြောင်းနှင့် မကြာခင် အကောင်းဆုံးများနှင့် ပြန်လာမည်ဖြစ်ကြောင်း မြန်မာနိုင်ငံ လူမှုကယ်ဆယ် ရေးအသင်း ဥက္ကဌ ကိုစိန်ကိုကိုမှ ၎င်း၏ လူမှုကွန်ရက်စာမျက်နှာတွင် ရေးသား ထားသည်။
၎င်းတို့၏ ပျက်စီးသွားသော ကားနှင့် အတူ အခြားကားများအားလည်း စစ်ဆေး ပြုပြင်ရန် အချိန်အနည်းငယ်ယူပြီးနောက်တွင် ယခင်ကဲ့သို့ ဝန်ဆောင်မှုများ ပြန်လည်ပေးအပ်သွားမည်းဖြစ်ကြောင်း မဇ္ဈိမက တစ်ဆင့်အသိပေးပြောကြားသည်။
လူမှုကယ်ဆယ်ရေးအသင်းပိုင်ကား ဖောက်ခွဲခံရခြင်း နှင့် အသင်းသားများ၏ လုံခြုံရေး အသက်အန္တရာယ် စိုးရိမ်ရခြင်းကြောင့် အကြောင်းတစုံတရာမသိရသေးသည့် အချိန်အတွင်း မတ်လ ၂၃ရက်မှစ၍ ကူညီ မှုများကိုအကန့်အသတ်မရှိ ရပ်နားမည်ဖြစ်ကြောင်း အသင်းဥက္ကဋ္ဌက ပြောကြားလိုက်သည့်နောက်တွင် ထိုကဲ့သို့ တောင်းပန်လာခြင်းဖြစ်ကြောင်း သိရသည်။
ဓာတ်ပုံ - မြန်မာနိုင်ငံ လူမှုကယ်ဆယ်ရေးအဖွဲ့ (မုံရွာမြို့)
