ဩဂုတ် ၁၇
စစ်ကိုင်းတိုင်းဒေသကြီး၊ မြောင်မြို့နယ် သုခဒီပကျေးရွာ (ဒေသအခေါ် သူဌေးကုန်းကျေးရွာ)တွင် စစ်ကောင်စီခန့် အုပ်ချုပ်ရေးမှူး ဦးအောင်မြင့်စိန်သည် ဩဂုတ်လ ၁၆ ရက်နေ့ ညပိုင်းတွင် ခေါင်းဖြတ်အသတ်ခံလိုက်ရသည်။
ယင်း သို့ဖြစ်ပွားအပြီး စစ်ကောင်စီတပ်ဖွဲ့ဝင်များ ရောက်ရှိလာကာ ဝင်ရောက်မွှေနောက်ရှာ ဖွေနေသည့်အတွက် ကျေးရွာဒေသခံများ ဘေးလွတ်ရာကို ထွက်ပြေးတိမ်းရှောင်နေကြရကြောင်း ဒေသခံများက မဇ္ဈိမကို ပြောသည်။
ဒေသခံများ၏အဆိုအရ သတ်ဖြတ်ခံရသည့် စစ်ကောင်စီခန့် အုပ်ချုပ်ရေးမှူး ဦးအောင်မြင့်စိန်သည် ပျူစောထီးအဖွဲ့ဝင် သင်တန်းဆင်း တစ်ဦးဖြစ်ကြောင်းသိရပြီး ဩဂုတ်လ ၁၆ ရက်နေ့ ည ၇ နာရီ မိနစ် ၂၀ ဝန်းကျင်က ၎င်း၏နေအိမ်တွင် ခေါင်းဖြတ်သတ်ဖြတ်ခံလိုက်ရခြင်း ဖြစ်သည်။
သုခဒီပကျေးရွာအနီးရှိ ကျောက်ရစ်ကျေးရွာဒေသခံတစ်ဦးက “သတ်တော့ ခေါင်းဖြတ်သတ်သွားတာ။ သတ်သွားတော့ အနီးက အော်တဲ့သူ နှစ်ယောက် သုံးယောက်လည်း အပစ်ခံရတယ်လို့ သိရတယ်” ဟု မဇ္ဈိမကို ပြောသည်။
ထိုသို့သုခဒီပကျေးရွာအုပ်ချုပ်ရေးမှူး အသတ်ခံရပြီးနောက် ယနေ့ ဩဂုတ်လ ၁၇ ရက်နေ့ မနက်ပိုင်း ၁၀ နာရီကျော်ခန့်တွင် ကျေးရွာကို စစ်ကောင်စီတပ်ဖွဲ့ဝင် စစ်ကား သုံးစီး ရောက်ရှိလာပြီး နေအိမ်များကို ဝင်ရောက်ရှာဖွေကာ ဖမ်းဆီးမှုများ ပြုလုပ်ခဲ့သည်။
ယင်းနောက် သုခဒီပကျေးရွာသား ဒေသခံ သုံးဦးကို အာဏာသိမ်း စစ်ကောင်စီတပ်ဖွဲ့ဝင်များမှ ဖမ်းဆီးခေါ်ဆောင်သွားကြောင်း မျက်မြင် ဒေသခံတစ်ဦးက မဇ္ဈိမကို ပြောသည်။
“အခုစစ်ကားသုံးစီးရောက်နေလို့ တစ်ရွာလုံး ရှောင်နေရတယ်။ သုံးယောက်တောင်ပါသွားတယ်။ ဝင်မွှေမယ်လို့ကြားလို့ အကုန်လုံး ရှောင်နေရတယ်။ သုခဒီပက လူမရှိတဲ့အိမ်တွေတော့ ဝင်မွှေနေတယ်” ဟု ဒေသခံတစ်ဦးက ပြောသည်။
လက်ရှိတွင် အာဏာသိမ်း စစ်ကောင်စီတပ်ဖွဲ့ဝင်များ ရောက်ရှိနေသည့်အတွက် သုခဒီပကျေးရွာနှင့် မြစ်သာကျေးရွာက ဒေသခံအများအပြား ဘေးလွတ်ရာသို့ ထွက်ပြေးတိမ်းရှောင်နေကြရကြောင်း သိရသည်။
အဆိုပါ သုခဒီပကျေးရွာအုပ်ချုပ်ရေးမှူးကို ၎င်းတို့အဖွဲ့က ခေါင်းဖြတ်သတ်ဖြတ်ခဲ့ကြောင်း မြင်းခြံနှလုံးလှလူမိုက်ကြီးများအဖွဲ့က ဩဂုတ်လ ၁၆ ရက်နေ့ ညပိုင်းတွင် ထုတ်ပြန်ခဲ့သည်။
“စစ်ကိုင်းတိုင်း၊ မြောင်မြို့နယ်၊ သူဌေးကုန်းကျေးရွာမှ စစ်ကောင်စီခန့် အုပ်ကြီး (အောင်မြင့်စိန်) ဆိုသူကို နောင်တက်လာမည့် ဥက္ကဌများ စံနမှူနာယူနိုင်ရန်အတွက် ခေါင်းကို ဖြတ်၍ ဘောလုံးကန်ခဲ့သည်” ဟု မြင်းခြံနှလုံးလှလူမိုက်ကြီးများအဖွဲ့က ထုတ်ပြန်ထားသည်။
