ချက်နိုင်ငံရောက် တက်ကြွလှုပ်ရှားသူ မြန်မာလူငယ်တစ်စုက ဦးစီး၍ ပရာဟာမြို့၊ စစ်ကောင်စီသံရုံး အနီးတွင် “Shedding Light on Untold Stories of Burma“အမည်ရှိ ဆန္ဒပြပွဲ ဧပြီလ ၂၈ ရက်နေ့တွင် ပြုလုပ်ခဲ့ကြသည်။

အကြမ်းဖက်စစ်ကောင်စီအား ကိုယ်စားပြုလျက်ရှိသည့် မြန်မာသံရုံးအား အရှက်ရစေရန်နှင့် မြန်မာ့အရေးအား နိုင်ငံတကာ လူထုအား ပညာပေးသိရှိစေရန် ပရာဟာမြို့၏ ပြည်တွင်းပြည်ပ ခရီးသွားအများဆုံးနေရာတစ်ခုတွင်ပြုလုပ်ခဲ့ခြင်းဖြစ်သည်။

ဆန္ဒပြပွဲတွင် အမျိုးသားညီညွတ်ရေးအစိုးရ၊ ချက်သမ္မတနိုင်ငံ ကိုယ်စားလှယ် ဦးလင်းသန့်လည်း တက်ရောက်ခဲ့သည်။ ဆန္ဒပြသူများက မြန်မာ့အရေး လက်ကမ်းစာစောင်များ မျှဝေခြင်း၊ မြန်မာ ဒီမိုကရေစီအရေးနှင့် အကြမ်းဖက်စစ်တပ်၏ ပြည်သူအား ဖိနှိပ်မှုများကို လူမှုကွန်ယက်မှ တဆင့်ကြည့်ရှုနိုင်သည့် QR code များမျှဝေခြင်း၊ နွေဦးတော်လှန်ရေးအကြောင်း ရှင်းလင်းပြောပြခြင်း၊ ကျဆုံးသူများနှင့် မတရား အသက်ဆုံးရှုံးခဲ့ရသည့်ပြည်သူများအား ရည်စူး ဆုတောင်းခြင်း၊ လူရမ်းကားစစ်တပ်၏ အကြမ်းဖက်မှုများအား ဖော်ညွှန်းသည့် ပြဇာတ်တို ကပြမှုတို့ ပါဝင်ခဲ့ပါသည်။