ကျန်းမာရေးဝန်ထမ်းများသည် တရုတ်နိုင်ငံတစ်ဝန်းတွင် ကိုဗစ်-၁၉ အိုမီခရွန်မျိုးကွဲ တစ်ကျော့ပြန် ကူးစက်ခံထားရသူအများအပြားကို တွေ့မြင်နေရကာ အခက်ကြုံနေသော ကျန်းမာရေးစောင့်ရှောက်မှုစနစ်အပေါ် ပိုမိုဝန်ပိလာနေကြောင်း သတင်းရင်းမြစ်အများအပြားက RFA သို့ ပြောသည်။
ကိုဗစ်-၁၉ ကြောင့် ကိုယ်ခံအားစနစ် ပျက်စီးကာ ဒုတိယကူးစက်မှုလှိုင်းကို ကြုံတွေ့လာရသည်ဟု မြောက်ပိုင်း ရှီးကျားကျွမ်းမြို့မှ ကျန်းမာရေးဝန်ထမ်းဖြစ်သူ လီက ပြောသည်။
"ကိုဗစ်-၁၉ ပထမအကြိမ်ကူးစက်ခံရချိန်မှာ ကိုယ်ခံအားစနစ်ထိခိုက်ပျက်စီးသွားတာကြောင့် မြို့ပြင် ဒေသတွေမှာ တစ်ကျော့ပြန် ကူးစက်မှုအများအပြားဖြစ်နေတယ်လို့ ကြားနေရပါတယ်။
" လူတွေဟာ ပထမအကြိမ် ကူးစက်ခံရမှုထက် ၅ ဆကနေ ၁၀ ဆလောက် ပိုဆိုးတဲ့ ဝေဒနာကို ခံစားနေကြရ ပါတယ်။" ဟု လီက ပြောကြားခဲ့သည်။
လူနာများသည် ပထမအကြိမ် ကူးစက်မှုမှ ပြန်လည်ကောင်းမွန်လာပြီးနောက် အစောဆုံး ၁ လခန့်အတွင်း တစ်ကျော့ပြန်ကူးစက်ခံရကြောင်းနှင့် ဗိုင်းရပ်စ်ကြောင့် ကိုယ်ခံအားစနစ် အားနည်းသွားကြောင်း အမည်မဖော်လိုသော ဆရာဝန်တစ်ဦးက ပြောကြားခဲ့သည်။
"အိုမီခရွန် တစ်ကျော့ပြန်ကူးစက်မှု ဖြစ်ပွားနှုန်းက သိသိသာသာ တိုးလာပါတယ်" ဟု ဟူနန်တရုတ်တိုင်းရင်း ဆေးတက္ကသိုလ်၏ အမှတ် ၂ တွဲဖက်ဆေးရုံမှ ဆရာဝန်ချန်က ပြောကြားခဲ့သည်။
"ရောဂါဖြစ်ပွားသူ ၃ သန်းမှာ ၃ ရာခိုင်နှုန်းဖြစ်တဲ့ လူ ၁ သိန်းလောက်က တစ်ကျော့ပြန်ကူးစက်ခံရတယ်လို့ အချက်အလက်တွေက ဖော်ပြနေပါတယ်" ဟု ချန်က ပြောကြားခဲ့သည်။
တရုတ်နိုင်ငံဒေသအများစုတွင် မကြာသေးမီရက်များအတွင်း ကူးစက်မှုနှုန်း ၇၀ ရာခိုင်နှုန်းခန့်ရှိကြောင်း အစီရင်ခံစာများက ဖော်ပြခဲ့ခြင်းကြောင့် အိုမီခရွန် အနည်းဆုံးတစ်ကြိမ် ကူးစက်ခံထားရသူ သန်း ၉၀ဝ ခန့်ရှိသည်။
အိုမီခရွန် တစ်ကျော့ပြန် ကူးစက်ခြင်းများနှင့် ဆက်နွှယ်သော ပြင်းထန်သောရောဂါကူးစက်မှုများကို တရုတ် ဆေးဝန်ထမ်းများ သတိပေး
အိုမီခရွန် တစ်ကျော့ပြန် ကူးစက်ခြင်းများနှင့် ဆက်နွှယ်သော ပြင်းထန်သောရောဂါကူးစက်မှုများကို တရုတ် ဆေးဝန်ထမ်းများ သတိပေး
