အာဖဂန်နစ္စတန်တွင် ဆင်းရဲမွဲတေမှု၊ စားနပ်ရိက္ခာနှင့် လောင်စာဆီ ပြတ်လပ်မှုများ အကြီးအကျယ် ကြုံတွေ့နေရပြီး ရုတ်တရက်အအေးလွန်ကဲမှုကြောင့် ပြည်သူများကို ဆိုးဆိုးရွားရွား ထိခိုက်ခဲ့ကာ လူ ၂၀ ထက်မနည်း သေဆုံးခဲ့ကြောင်း TOLO သတင်းက ဇန်နဝါရီလ ၁၆ ရက်တွင် ဖော်ပြထားသည်။
အအေးဒဏ်ကြောင့် ဘက်ဂျစ်ပြည်နယ်နှင့် အခြားပြည်နယ်များတွင်လည်း ကျွဲနွား ကောင်ရေ ၄ ၀၀၀  ထက်မနည်း သေဆုံးခဲ့သည်။
ဟေရတ်မြို့ခံတစ်ဦးဖြစ်သူ ဟူစိန်က အီရန်နိုင်ငံသို့ တရားမဝင် ရွှေ့ပြောင်းနေထိုင်ရန် သွားရာလမ်းတွင်  အအေးလွန်ကဲမှုဒဏ်ခံစားခဲ့ရပြီးနောက် ဆေးရုံတက်ခဲ့ရကြောင်း ပြောသည်။
ဟေရတ်ဒေသဆိုင်ရာ ဆေးရုံမှစာရင်းဇယားများတွင် လူ ၇၀ ခန့်မှာ ကိုယ်အပူချိန်အလွန်အမင်းကျဆင်းမှုကြောင့် ဆေးရုံတင်ထားရပြီး မူးယစ်ဆေးစွဲနေသူ ၄ ဦးသေဆုံးခဲ့ကြောင်း ဖော်ပြထားသည်။ ကိုယ်အပူချိန်ကျဆင်းမှု ကြောင့် ဘက်ဂျစ်ပြည်နယ်တွင် လူ ၅ ဦး ထက်မနည်းသေဆုံးခဲ့ပြီး အားလုံးသည် သိုးထိန်းများ ဖြစ်ကြောင်း ဒေသဆိုင်ရာ တာဝန်ရှိသူများက ပြောကြားခဲ့သည်။
ကိုယ်အပူချိန်အလွန်အမင်းကျဆင်းမှုကြောင့် သိုးထိန်း ၁ ဦးနှင့် ကလေး၄ ဦး သေဆုံးခဲ့ကြောင်း ဘက်ဂျစ်ပြည်နယ်အုပ်ချုပ်ရေးမှူး၏ ပြောရေးဆိုခွင့်ရှိသူက ပြောကြားခဲ့သည်။ 
အအေးလွန်ကဲမှုကြောင့် ခို့စ်ပြည်နယ်တွင် လူ ၅ ဦး၊ ဖာရီယက်ဘ်တွင် ၂ ဦးနှင့် ဂျော်ဇန်တွင် နောက်ထပ် ၂ ဦး သေဆုံးခဲ့ကြောင်း ဒေသဆိုင်ရာအာဏာပိုင်များက ပြောသည်။ ထို့ပြင် ဆာ-အီ-ပူးရ်မြို့တွင် ၁ ဦးသေဆုံးပြီး ဘဂ္ဂလန်ပြည်နယ်တွင် မူးယစ်ဆေးစွဲနေသူ ၅ ဦး သေဆုံးခဲ့ကြောင်း TOLO News တွင် ဖော်ပြခဲ့သည်။
တာလီဘန်တို့ ယမန်နှစ်က ကဘူးလ်မြို့တွင် အာဏာသိမ်းပြီးနောက်ပိုင်း အမေရိကန်ဒေါ်လာ သန်း ၄၀ တန် အကူအညီ ၁၈ ခု နှင့် ရန်ပုံငွေ အမေရိကန်ဒေါ်လာ ၃၂ သန်းကျော်တန် အကူအညီ ၃၀ ကျော်ကိုရရှိခဲ့ကြောင်း  အာဖဂန်ဗဟိုဘဏ် (DAB) ၏ မှတ်တမ်းများကို ကိုးကား၍ Khaama Press က ဖော်ပြခဲ့သည်။
ယင်းသို့ထောက်ပံ့ကူညီမှုများရရှိသော်လည်း အာဖဂန်နစ္စတန်၏ ဆင်းရဲမွဲတေမှု၊ အာဟာရချို့တဲ့မှုနှင့် အလုပ် လက်မဲ့ အခြေအနေသည် အဆိုးရွားဆုံးအနေအထားတွင် ရှိနေဆဲဖြစ်သည်။
နိုင်ငံ၏သမိုင်းတွင် အကြီးကျယ်ဆုံး လူသားချင်းစာနာထောက်ထားမှုဆိုင်ရာ အကျပ်အတည်းနှင့် ရင်ဆိုင် နေရသည့် အာဖဂန်ပြည်သူများသည် သဘာဝကပ်ဘေးများကြောင့် အခြေအနေကို ပိုဆိုးလာစေခဲ့သည်။