စစ်ကိုင်းတိုင်း၊ မြောင်မြို့နယ်တွင် မြေပြင်လူဦးရေစာရင်းကောက်သည့် စစ်ကောင်စီလက် အောက်ခံဝန်ထမ်းလေးဦးကို ဖမ်းဆီးရမိခဲ့ပြီး အကြမ်းဖက်မှုတိုက်ဖျက်ရေးဉပဒေဖြင့်အရေးယူရန် စီစဉ် နေကြောင်း NUG ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနက ဇန်နဝါရီလ ၁၅ ရက်နေ့တွင် ထုတ် ပြန်ထားသည်။
စစ်ကောင်စီလက်အောက်ခံ အထွေထွေအုပ်ချုပ်ရေးဦးစီးဌာနမှ အမျိုးသမီးဝန်ထမ်းသုံးဦး၊ အမျိုးသား တစ်ဦးတို့ကို ဇန်နဝါလ ၁၄ ရက်နေ့က စစ်ကိုင်းခရိုင် တပ်ရင်း(၅) MRA က ဖမ်းဆီးရမိခဲ့ခြင်းပြီး စစ်ကိုင်းခရိုင် ပြည်သူ့အုပ်ချုပ်ရေးအဖွဲ့မှ အကြမ်းဖက်မှုတိုက်ဖျက်ရေးဉပဒေနှင့်အညီ အပြစ်ပေးအရေးယူနိုင် ရေး စီစဉ်ဆောင်ရွက်နေကြောင်း သိရသည်။
“ကျွန်တော်တို့ မိတာကတော့ ခြေရာတော်ကျော် မင်းရွာသစ်ကျောင်းမှာ၊ မဲစာရင်းတွေ မြင်းမူမှာသွားပြီး ပြုစုတာနေမှာပေါ့။ အဲ့ဒီဘက်ကနေ သတင်းအရစောင့်ဖမ်းတာ။ သူတို့က မြောင်မြို့နယ် ကျင်းကျေးရွာ ကပါ” မြောင်မြို့နယ် ပြည်သူ့လုံခြုံရေးတပ်ဖွဲ့(ပလဖ) တာဝန်ခံ ဦးမြင့်တင်ကပြောသည်။
လက်ရှိတွင် ဖမ်းဆီးရမိသူလေးဦးကို လုံခြုံသည့်နေရာတွင် ထိန်းသိမ်းထားကာ စစ်ဆေးမှုများဆောင်ရွက် ပြီး အမျိုးသားညီညွတ်ရေးအစိုးရထံ အမှုတွဲတင်ပေးသွားမည်ဖြစ်ကြောင်း ၎င်းကဆိုသည်။
စစ်ကောင်စီက ဇန်နဝါရီလ ၉ ရက်နေ့မှ ၃၁ ရက်နေ့အထိ တိုင်းနှင့် ပြည်နယ်များတွင် မြေပြင်လူဦးရေ စာရင်းကောက်ခံခြင်းများ လိုက်လံဆောင်ရွက်နေပြီး အဆိုပါလုပ်ငန်းစဉ်များတွင် ပူးပေါင်းဆောင်ရွက် ခြင်းမပြုရန် တော်လှန်ရေးအင်အားစုများက တိုက်တွန်းထားသည်။
စစ်ကောင်စီကိုအားပေးအားမြှောက်ပြုပြီး မြေပြင်လူဦးရေစာရင်းကောက်ယူမည့် အုပ်ချုပ်ရေးအဖွဲ့များ၊ လဝကအဖွဲ့များနှင့် အခြားမည်သည့်ထောက်တိုင်မဆို အကြမ်းဖက်မှုတိုက်ဖျက်ရေးဉပဒေဖြင့် ပြင်းပြင်း ထန်ထန် တရားစွဲဆို အရေးယူဆောင်ရွက်မည်ဖြစ်ကြောင်း NUG က ဇန်နဝါရီလ ၉ ရက်နေ့က သတိပေး ထားသည်။
မြေပြင်ကွင်းဆင်းကောက်ယူမှုများဆောင်ရွက်ရာတွင် တိုက်ခိုက်ခံရပြီး ဒုရဲအုပ်တစ်ဦးနှင့် ရဲ ဒုတပ်ကြပ် တစ်ဦးသေဆုံးမှုလည်းရှိခဲ့ကြောင်း စစ်ကောင်စီက ဇန်နဝါရီလ ၁၄ ရက်နေ့တွင် ထုတ်ပြန်ထားသည်။
စာတည်း။ ။စောဖေ
စာမူတည်းဖြတ်။ ။စောဖေ
#စစ်ကိုင်းတိုင်း
#မြိုင်မြို့နယ်
#လူဦးရေစာရင်း
#ထွေအုပ်ဝန်ထမ်း
