တောင်တရုတ်ပင်လယ်၌ ဒီဇင်ဘာ ၂၁ ရက်တွင် အမေရိကန်ထောက်လှမ်းရေးလေယာဉ်က အန္တရာယ်များသော စစ်ရေးလေ့ကျင့်မှုလုပ်ဆောင်ခဲ့သည်ဟူသော တရုတ်စွပ်စွဲချက်ကို အမေရိကန်က ပယ်ချလိုက်ကာ လေယာဉ် ၂ စီး တိုက်မိလုနီးပါးဖြစ်အောင်လုပ်ခဲ့သည်မှာ တရုတ်တိုက်လေယာဉ်သာဖြစ်သည်ဟု ပြောခဲ့ကြောင်း RFA  က ဖော်ပြသည်။

အမေရိကန် အင်ဒို-ပစိဖိတ်စစ်ဌာနချုပ် (INDOPACOM) ၏ ဒီဇင်ဘာ ၂၉ ရက်ထုတ် မူရင်းထုတ်ပြန်ချက်တွင် တရုတ် J-11 တိုက်လေယာဉ်၏ လေယာဉ်မှူးသည် ဒီဇင်ဘာ ၂၁ ရက်က အမေရိကန်လေတပ်၏ RC-135 လေယာဉ်အား နှောင့်ယှက်ကာ အန္တရာယ်မကင်းသည့် လေ့ကျင့်မှုတစ်ခုပြုလုပ်ခဲ့သဖြင့် မတိုက်မိအောင် ရှောင်တိမ်းခဲ့ရကြောင်း ဖော်ပြထားသည်။

INDOPACOM က ၎င်း၏ ပြောကြားချက်ကို အခိုင်အမာသက်သေပြရန် အမေရိကန်လေယာဉ်မှူး ရိုက်ကူးထား သည့် ဗီဒီယိုကို ထုတ်ပြန်ခဲ့သည်။

တရုတ်စစ်တပ်တောင်ပိုင်းစစ်ဌာနချုပ်ကလည်း ၎င်းတို့ ရိုက်ကူးထားသည့် ဗီဒီယိုဖိုင်ကို ဇန်နဝါရီ ၁ ရက်တွင် ထုတ်ပြန်ခဲ့သည်။

“အမေရိကန်က ပြည်သူတွေကို ရည်ရွယ်ချက်ရှိရှိ လှည့်ဖြားခဲ့ပြီး အမေရိကန် RC-135 လေယာဉ်ကသာ ရုတ်တရတ် လမ်းကြောင်းပြောင်းလဲခဲ့ပြီး တရုတ်လေယာဉ်ကို ဘယ်ဘက်ကို တွန်းပို့ခဲ့တာပါ” ဟု တရုတ်က စွပ်စွဲခဲ့သည်။

INDOPACOM ၏ နောက်ဆုံးတုံ့ပြန်မှုတွင် တရုတ်စစ်တပ်၏ ကြေညာချက်ကို ပယ်ချခဲ့ပြီး လေယာဉ် ၂ စင်း တိုက်မိလုနီးပါးအခြေအနေအတွက် တရုတ် J-11 တိုက်လေယာဉ်တွင်သာ တာဝန်ရှိကြောင်း အလေးအနက် ပြောကြားခဲ့သည်။

အငြင်းပွားနေသော တောင်တရုတ်ပင်လယ်အတွင်းတွင် ပြီးခဲ့သည့် သီတင်းပတ်က အမေရိကန်လေတပ်လေ ယာဉ် ၁ စင်းမှ ၁၀ ပေ (၃ မီတာ) အကွာသို့ တရုတ်စစ်လေယာဉ် ၁ စင်း ချဉ်းကပ်လာခဲ့သဖြင့် နိုင်ငံတကာ လေပိုင်နက်အတွင်း မတိုက်မိစေရန် ရှောင်တိမ်းခဲ့ရကြောင်း အမေရိကန်စစ်တပ်က ဒီဇင်ဘာ ၂၉ရက်တွင် ပြောကြားခဲ့သည်။

တရုတ်ဂျက်လေယာဉ်သည် အမေရိကန်လေယာဉ်တောင်ပံမှ ပေ ၁၀ အကွာသို့ ချဉ်းကပ်လာကာ ဦးပိုင်းနှင့် ပေ ၂၀ သာ ကွာဝေးတော့သဖြင့် အမေရိကန်လေယာဉ်သည် မနည်း ရှောင်လွှဲခဲ့ရသည်ဟု အမေရိကန် စစ်ဘက်ပြောရေး ဆိုခွင့်ရှိသူတစ်ဦးက ပြောကြားခဲ့သည်။