ပြည်ပသို့ အရေးကြီးသတင်းများ ပေးပို့သည်ဟုဆိုကာ တိဗက်အရှေ့ပိုင်း ကာဇီစီရင်စုမှ တိဗက်လူငယ်တစ်ဦးကို တရုတ်အာဏာပိုင်များက ထောင်ဒဏ် ၂ နှစ် ချမှတ်လိုက်သည်။
အသက် ၂၈ နှစ်အရွယ် သပ်ဆမ်သည် မေလ ၃ ရက်က စားသောက်ဆိုင်တစ်ဆိုင်တွင် အဖမ်းခံခဲ့ရသည်။ သပ်ဆမ်သည် မိသားစုနှင့် ဆက်သွယ်ခွင့်မရဘဲထိန်းသိမ်းခံထားရကာ နိုင်ငံတော်လျှို့ဝှက်ချက် ပေါက်ကြား စေမှုနှင့် နိုင်ငံတော်လုံခြုံရေးအန္တရာယ်ဖြစ်စေမှုအပါအဝင် စွဲချက်များဖြင့် နိုဝင်ဘာလတွင် ကာဇီတရားရုံး၌ ရုံးတင်စစ်ဆေးခံခဲ့ရကြောင်း Phayul သတင်းက ဖော်ပြသည်။
တရုတ်တရားရုံးသည် အမှုမစစ်ဆေးမီ မိသားစုအား ကြိုတင်အသိမပေးခဲ့ဘဲ သပ်ဆမ်၏ဇနီးနှင့်အစ်ကိုအား နိုဝင်ဘာ ၂၁ ရက်က တရားရုံးသို့ ဆင့်ခေါ်ကာ သပ်ဆမ်အား ထောင်ဒဏ် ၂ နှစ် ချမှတ်ခဲ့လိုက်ကြောင်း ပြောသည်။
" သပ်ဆမ်ဟာ WeChat အက်ပလီကေးရှင်းကတစ်ဆင့် ဥရောပနဲ့ အိန္ဒိယတို့ဆီ တိဗက်အကြောင်း အချက်အလက်တွေ ပေးပို့ခဲ့တယ်လို့ အာဏာပိုင်တွေက သူ့ကို ဖမ်းချိန်မှာ စွပ်စွဲခဲ့ပါတယ်။ သူဟာ ၅ လထိန်းသိမ်းခံရပြီး အဲဒီကာလမှာညှဉ်းပန်းနှိပ်စက်မှုတွေလည်း ခံခဲ့ရပါတယ်" ဟု သတင်းရင်းမြစ်က ဒေသတွင်းအဆက်အသွယ်များကို ကိုးကား၍ Tibet Post သို့ ပြောသည်။
တရုတ်အာဏာပိုင်များသည် အစိုးရ၏အရေးပါသော အချက်အလက်များပေါက်ကြားစေခြင်းဟူသော စွဲချက်ကို ကြိမ်ဖန်များစွာ အသုံးပြုသည်။
အောက်တိုဘာလတွင် တိဗက်ပညာတတ်နှင့် တက်ကြွလှုပ်ရှားသူ ၆ ဦးကို ခွဲထွက်ရေး လှုံ့ဆော်မှုနှင့် နိုင်ငံတော်လုံခြုံရေးကို အန္တရာယ်ဖြစ်စေမှု စသည့် စွဲချက်များအတွက် ထောင်ဒဏ် ၄ နှစ်မှ ၁၄ နှစ်အထိ ချမှတ်ခဲ့သည်။
တိဗက်လူမျိုးများသည် တရုတ်နိုင်ငံ၏ စည်းမျဉ်းစည်းကမ်းများနှင့်အညီ ဖိအားများဖြင့်နေထိုင်ကြရသည်။ အပြစ်မရှိသော ဘုန်းတော်ကြီးများပင် ဗုဒ္ဓဘာသာနှင့်ထုံးတမ်းဓလေ့ကို ကျင့်သုံးခွင့်မရှိပေ။ တိဗက်တစ်ဝန်းမှ
အပြစ်မဲ့ဘုန်းကြီးများနှင့် သီလရှင်များမှာ စောင့်ကြည့်ခံနေရပြီး ၎င်းတို့၏ ယဉ်ကျေးမှုနှင့် ဘာသာရေး၏ အရေးပါသော အစိတ်အပိုင်းဖြစ်သည့် သင်္ကန်းများကို ချွတ်ရန် ဖိအားပေးခံရသည်။
