ဆော်ဒီအာရေးဗျ အိမ်ရှေ့စံ မိုဟာမက် ဘင် ဆော်လ်မန်၏ ပါကစ္စတန်ခရီးစဉ် ရွှေ့ဆိုင်းမှုနှင့်ပတ်သက်ပြီး ပါကစ္စတန် ညွန့်ပေါင်းအစိုးရနှင့် အဓိက အတိုက်အခံပါတီ တေရက်-အီ-အင်ဆက်ဖ် (PTI) အကြား ငြင်းခုံမှုများ ဖြစ်ပေါ်လာသည်။

ဆော်ဒီ အိမ်ရှေ့မင်းသား မိုဟာမက် ဘင် ဆော်လ်မန် ပါကစ္စတန်ခရီးစဉ် ရွှေ့ဆိုင်းရခြင်း၏ အကြောင်းရင်းက ပါကစ္စတန်တွင် PTI ပါတီ၏ အစ္စလမ်မာဘတ်သို့ ခရီးဝေးချီတက်မှု ရှိနေ၍ ဖြစ်ကြောင်း ပါကစ္စတန် မွတ်စလင် အဖွဲ့ချုပ်-နာဝက်ဇ် (PML-N) ပါတီ အကြီးတန်းခေါင်းဆောင်၊ ကာကွယ်ရေးဝန်ကြီး ခါဝါဂျာ အာဆစ်ဖ်က နိုဝင်ဘာ ၁၃ ရက်တွင် ပြောဆိုပြီးနောက် အဆိုပါ အငြင်းအခုံများ စတင်ပေါ်ပေါက်လာခြင်း ဖြစ်သည်ဟု The News International က ဖော်ပြသည်။

“လွန်ခဲ့တဲ့ ၇ နှစ်က အီမရန် ခန်း ပထမဆုံးအကြိမ် ထိုင်သပိတ်လုပ်တုန်းကလည်း တရုတ်သမ္မတ ရှီကျင့်ဖျင်ရဲ့ ပါကစ္စတန် ခရီးစဉ် ဖျက်သိမ်းမှုကို ဖြစ်စေခဲ့တယ်။ ခုတစ်ကြိမ် ဆော်ဒီ အိမ်ရှေ့စံရဲ့ ခရီးစဉ် ရွှေ့ဆိုင်းတာကလည်း လာမယ့် နိုဝင်ဘာ ၂၁ ရက်မှာ လုပ်မယ်လို့ PTI က ကြေညာထားတဲ့ ထိုင်သပိတ်ကြောင့် ဖြစ်ပါတယ်။ ဒီလူ (အီမရန် ခန်း) က နိုင်ငံကို ဆန့်ကျင်မယ့် အစီအစဉ် လုပ်နေတာပါ” ဟု အာဆစ်ဖ်က တွစ်တာတွင် ရေးသည်။

ဆော်ဒီ အိမ်ရှေ့မင်းသား၊ ဝန်ကြီးချုပ် မိုဟာမက် ဘင် ဆော်လ်မန်၏ ပါကစ္စတန် ခရီးစဉ်ကို ရွှေ့ဆိုင်းလိုက်သည်ဟု ဆော်ဒီ နိုင်ငံခြားရေးရုံး (FO) က နိုဝင်ဘာ ၁၂ ရက်တွင် အတည်ပြုကြောင်း သတင်းတစ်ရပ်တွင် ဖော်ပြသည်။

ထို့ပြင် PTI ပါတီ ခေါင်းဆောင်တစ်ဦးဖြစ်သည့် ဖာဝက်ဒ် ချောက်ဟ်ရီသည် ယခုကိစ္စနှင့်ပတ်သက်ပြီး ကာကွယ်ရေးဝန်ကြီး ခါဝါဂျာ အာဆစ်ဖ်နှင့် တွစ်တာတွင် အချင်းများခဲ့ကြောင်း The News International က ဖော်ပြသည်။

“ပထမဆုံး ပြောရရင် ခါဝါဂျာ အာဆစ်ဖ်ဟာ ပါကစ္စတန်ရဲ့ ကာကွယ်ရေး ဝန်ကြီးဖြစ်ပေမယ့် ကျင့်ဝတ်ပိုင်းမှာတော့ တော်တော်လေး နိမ့်တဲ့သူပါပဲ။ သူ့အနေနဲ့ အလိမ်အညာ စကားပြောဖို့ ဝန်မလေးတဲ့ ပုံပဲ။ တကယ်တော့ မိုဟာမက် ဘင် ဆော်လ်မန်ဟာ ပါကစ္စတန်မှ မဟုတ်ပါဘူး၊ အာရှ ဒေသတစ်ခုလုံးကို လာမယ့်ခရီးကို ရွှေ့ဆိုင်းခဲ့တာပါ” ဟု ချောက်ဟ်ရီက တွစ်တာတွင် ရေးသည်။