ဩဂုတ်လ ၂၃ ရက်
အကြမ်းဖက်စစ်ကောင်စီလက်အောက်ခံ ဗဟိုဘဏ်က အမေရိကန်တစ်ဒေါ်လာလျှင် ၂,၁၀၀ ကျပ်သတ်မှတ်ထားသော်လည်း ပြင်ပတွင် ယနေ့ ဩဂုတ်လ ၂၃ရက်၌ ၂,၉၀၀ ကျပ်ဝန်းကျင်ဖြင့် အရောင်းအဝယ်ပြုလုပ်ကြကြောင်း သိရသည်။
ယမန်နေ့ ဩဂုတ်လ ၂၂ရက်နေ့တွင် အမေရိကန်တစ်ဒေါ်လာလျှင် ၂,၈၀၀ ကျပ်ဖြင့်အရောင်းအဝယ်ပြုလုပ်ရာမှ တစ်ရက်အတွင်း ၂,၉၀၀ကျပ်သို့ မြင့်တက်ခဲ့ကြောင်း ပြင်ပဒေါ်လာဈေးကွက် အရောင်းအဝယ်ပြုလုပ်သူများထံမှ စုံစမ်းသိရှိရသည်။
" ပြီးခဲ့တဲ့ အပါတ်မှာ ၃,၀၀၀ အထိဈေးတက်ခဲ့ပြီးတော့ မနေ့က ဩဂုတ်လ ၂၂ရက်မှာ ၂,၈၀၀ ကနေ ဒီနေ့ ၂,၉၀၀ ဝန်းကျင်အထိ ဈေးတက်သွားတယ်၊ ထပ်တက်လာမလားဆိုတာ နောက်ရက်တွေစောင့်ကြည့်ရမှာပဲ" ဟု ပြင်ပဒေါ်လာဈေးကွက်တွင် အရောင်းအဝယ်ပြုလုပ်သူတစ်ဦးက မဇ္ဈိမကိုပြောသည်။
လက်ရှိဒေါ်လာဈေးကွက်မှာ ကြိုက်ရောင်းကြိုက်ဝယ်ဈေးကွက်သာဖြစ်သော်လည်း အရောင်းအဝယ်မရှိသလောက် နည်းပါးကြောင်းလည်း ၎င်းကပြောသည်။
" နှစ်ပတ်လောက်ရှိပြီ၊ ဒေါ်လာအရောင်းအဝယ်အေးနေတယ်၊ တကယ်လိုအပ်လို့ အရောင်းအဝယ်လုပ်တဲ့သူပဲရှိတယ်၊ ဘာလို့လဲဆိုတော့ လူတွေက အခု စက်သုံးဆီဘက် အာရုံရောက်နေကြတယ်" ဟု ၎င်းကဆိုသည်။
ထို့အပြင် နိုင်ငံခြားငွေလဲနှုန်း တစ်ဒေါ်လာ ၂,၁၀၀ ကျပ်ဝန်းကျင်ဖြင့် စျေးဖွင့်လှစ်ခဲ့သည့် ငွေလဲကောင်တာအများစုတွင် ဒေါ်လာ အရောင်းအဝယ်ပြုလုပ်ခြင်းမရှိဘဲ ပြင်ပစျေးကွက်တွင်သာ အရောင်းအဝယ်ပြုလုပ်မှုရှိကြောင်း သိရသည်။
စာတည်း - သန့်ဇော်(သန်လျင်)
