ဩဂုတ် ၂၂
(မဇ္ဈိမ)။ ။ စစ်ကိုင်းတိုင်းအတွင်းရှိ စစ်ကိုင်း၊ မုံရွာနှင့် ရွှေဘိုခရိုင်များရှိ လမ်းပိုင်းများတွင် ပြည်သူများ သတိပြုသွားလာရမည့်အချက်များအား ဒေသတွင်း PDFအဖွဲ့များက အသိပေးကြေညာထားသည်။
ယနေ့ ဩဂုတ်လ ၂၂ ရက်မှ စက်တင်ဘာလ ၁ ရက်အထိ ရွှေဘို-ဆိပ်ခွန်-မူးကမ်းကြီး-နောင်ကြီးအိုင် လမ်းတစ်လျှောက်အား ည ၇နာရီ မှ နံနက် ၅ နာရီအတွင်း ဖြတ်သန်းသွားလာခြင်းမပြုကြရန် ရွှေဘို ခရိုင်အခြေစိုက် C&T SHWEBO အဖွဲ့က အသိပေးထားသည်။
“မဖြစ်မနေ ဖြတ်သန်းသွားလာရမည်ဆိုပါက သက်ဆိုင်ရာအဖွဲ့အစည်းများအား သတင်းပို့၊ ချိတ်ဆက်၍ သွားလာကြရန်” ဟု C&T SHWEBO အဖွဲ့က ဆိုထားသည်။
အဆိုပါ သတိပေးထုတ်ပြန်ချက်များအား မလိုက်နာဘဲ မောင်းနှင်လာသောယာဉ်များ၊ ယာဉ်မောင်းများ အန္တရာယ်တစ်စုံတစ်ရာတွေ့ရှိပါက တာဝန်ယူမည်မဟုတ်ကြောင်း C&T SHWEBO အဖွဲ့က သတိပေးထား သည်။
ထို့အပြင် မုံရွာ-မြင်းမူ-မန္တလေး လမ်းပိုင်းအသုံးပြု၍ ခရီးသွားကြမည့်ပြည်သူများအနေဖြင့် စစ်ကောင်စီ နှင့်ပတ်သက်သော "အာကာသယာဉ်လိုင်း" အား လုံးဝအသုံးပြုခြင်း မပြုလုပ်ကြရန် မြင်းမူအခြေစိုက် Knight Commanders(MMU) PDF အဖွဲ့က ယနေ့ ဩဂုတ်လ ၂၂ ရက်တွင် ထုတ်ပြန်သည်။
အဆိုပါ စစ်ကောင်စီထောက်တိုင် ယာဥ်လိုင်းသည် လမ်းကြောင်းပေါ်တွင် ပေါက်ကွဲမှုများဖြစ်ပေါ်နိုင်ပါ သဖြင့် သတိပေးချက်ကို လိုက်နာပေးကြရန် ထပ်မံသတိပေးထားသည်။
စာတည်း ။ ။ ဖူးသိမ်ကျ
စာမူတည်းဖြတ် ။ ။ စောဖေ