ဩဂုတ် ၁၉
ကနီ(မဇ္ဈိမ)။ ။ စစ်ကိုင်းတိုင်း မင်းကင်းမြို့နယ်မှ အိမ်ခြေ ၅၀၀ ခန့်ရှိ သင်တောကျေးရွာကို စစ်ကောင်စီတပ်က ယမန်နေ့ သြဂုတ်လ ၁၈ ရက် နံနက် ၈ နာရီ အချိန်ခန့်တွင် ရွာကိုမီးတင်ရှို့နေကြောင်း သိရသည်။
လက်ရှိတွင် သင်တောကျေးရွာရှိဒေသခံပြည်သူများမှာ စစ်ကောင်စီတပ်ရန်မှ ထွက်ပြေးတိမ်ရှောင်နေရ သဖြင့် မီးလောင်ပြာကျသွားသည့် အိမ်အရေအတွက်ကို အသေးစိတ်မသိရှိရသေးကြောင်း ဒေသခံပြည်သူ တစ်ဦးကပြောသည်။
“စစ်ကောင်စီရေယာဥ်အုပ်စု ချင်းတွင်းမြစ်ကြောင်းအတိုင်းအောက်ကိုစုန်လာပြီဆိုကတည်းက ကျနော်တို့ ထွက်ပြေးနေရတယ်။ မနေ့ကဆိုရင် အသက်(၇၀)လောက် အဘိုးတစ်ဦး အမောဖောက်ပြီးသေသွားတယ်။ အကုန်လုံး ထွက်ပြေးနေရတယ်။ မိုးကလည်းရွာနေတော့ ကျန်းမာရေးကအစချက်ရေးပြုတ်ရေးအထိ အခက်အခဲတွေရှိတာပေါ့” ဟု လုံခြုံရေးအရအမည်မဖော်လိုသည့် ဒေသခံပြည်သူတစ်ဦးကဆိုသည်။
ချင်းတွင်းမြစ်ကြောင်းအတိုင်းစုန်ဆင်းလာသည့် စစ်ကောင်စီရေယာဥ်အုပ်စုသည် သင်တောကျေးရွာအနီး တွင် ကျောက်ချတပ်စွဲထားကြောင်း သိရသည်။
စာတည်း။ ။ စောဖေ
စာမူတည်းဖြတ် ။ ။ စောဖေ