ဩဂုတ် ၁၈
မဇ္ဈိမ။ ။ စစ်ကိုင်းတိုင်း၊ ရေဦးမြို့ အနောက်တောင်ဘက် ခြောက်မိုင်ခန့်အကွာရှိ ဇေယျာဝတီကျေးရွာကို စစ်ကောင်စီတပ်က သြဂုတ်လ ၁၃ရက် နံနက် ၇နာရီအချိန်ခန့်တွင် မီးတင်ရှို့ခဲ့ကြောင်း သိရသည်။
အဆိုပါမီးရှို့မှု ဖြစ်စဥ်တွင် ဇေယျာဝတီကျေးရွာရှိ ပြည်သူပိုင်နေအိမ် ၅၉ လုံး မီးလောင်ပြာကျသွားကြောင်း ဒေသခံ ပြည်သူတစ်ဦးက ဆိုသည် ။
" စစ်ကောင်စီတပ် ခန့်မှန်း အင်အားကတော့ ၁၄ဝ လောက် ရှိမယ် ၊ သြဂုတ်လ ၁၃ရက်နေ့ နံနက်ခင်း ၇နာရီလောက်ကနေ စရှို့တာ တစ်နေကုန်ပဲ ၊ အိမ်ခြေကတော့ ၅၉လုံး မီးလောင်ပြာကျသွားတယ် " ဟု ဒေသခံပြည်သူ တစ်ဦးက ဆိုသည် ။
ယင်းကျေးရွာကို မီးရှို့သွားသည့် စစ်ကောင်စီစစ်ကြောင်းသည် ဒီပဲယင်းမြို့နယ် အတွင်းသို့ ရောက်ရှိသွားပြီး ကျေးရွာများကို ဆက်လက်မွှေနှောက် မီးရှို့ မှုများ လုပ်နေကြောင်း သိရသည်။
စာတည်း - သန့်ဇော်(သန်လျင်)
