တရုတ်သည် နယ်စပ်ထိန်းချုပ်မျဉ်းအနီး တိဗက်နှင့် ရှင်ကျန်းဒေသတို့တွင် လေဆိပ်နှင့်ရဟတ်ယာဉ်ကွင်း ၃၇ ခုအထိ တည်ဆောက်ထားကြောင်း Financial Express သတင်းဝက်ဘ်ဆိုက်၌ ဖော်ပြထားသည်။ ၎င်းတို့အနက် ၂၂ ခုမှာ အရပ်ဘက်နှင့်စစ်ဘက် နှစ်မျိုးသုံးအတွက် ရည်ရွယ်သည်။
တရုတ်သည် ၂၀၂၀ ခုနှစ်တွင် အဆောက်အဦ အသစ် ၇ ခုနှင့် လေတပ်အခြေစိုက်စခန်း ၇ ခုတို့ကို တိုးမြှင့်တည်ဆောက်ခဲ့သည်။ တရုတ် တည်ဆောက်ထားသောလေတပ်စခန်းများသည် လေကြောင်းချီ ထောက်လှမ်းရေးစွမ်းရည်ကို မြှင့်တင်ရန်နှင့် တရုတ်စစ်တပ်၏ တခြားသောပလက်ဖောင်းများမှ တိုက်ခိုက်မှုနှင့် တန်ပြန်တိုက်ခိုက်မှုများတွင် အထောက်အကူဖြစ်စေရန် ရည်ရွယ်ပုံရသည်။
၂၀၁၇ ခုနှစ်မှစ၍ လေဆိပ် ၅ ခုကို အဆင့်မြှင့်တင်ခဲ့သလို လေယာဉ်ရုံများ၊ ဂိတ်များနှင့် ပြေးလမ်းအသစ်များကို လည်း တည်ဆောက်ထားသည်။
လေဆိပ်အသစ် ၄ ခုအနက် ရှီဂတ်ဆဲတင်ဂရီ၊ လန်ဆဲနှင့် ဂါရီဘူရန်လေဆိပ် ၃ ခုမှာ အိန္ဒိယနယ်စပ်များအနီးမှ ၆၀ ကီလိုခန့်သာ ကွာဝေးသည်။
တရုတ်သည် တိဗက်တွင် ရဟတ်ယာဉ်ကွင်းအသစ် ၅ ခုကိုလည်း တည်ဆောက်ထားပြီး ကွင်းဟောင်း ၂ ခုကို လည်း အဆင့်မြှင့်တင်ထားသည်။
ထို့ပြင် ရှင်ကျန်းပြည်နယ်တွင် ၂၀၁၇ ခုနှစ်မှစ၍ လေဆိပ် ၁၅ ခုကို အဆင့်မြှင့်တင်ခဲ့ပြီး ၎င်းတို့အနက် ၇ ခုမှာ အရပ်ဘက်နှင့် စစ်ဘက်သုံးဖြစ်သည်။ ဟိုတန်လေဆိပ်သည် အရေးပါဆုံးဖြစ်ပြီး နယ်စပ်ထိန်းချုပ်မျဉ်းမှ ၂၄၀ ကီလိုမီတာသာဝေးကာ လေဆိပ်စခန်း၌ အစားထိုးပြေးလမ်းကိုလည်း ပြင်ဆင်ထားသည်။
ထိုလေဆိပ်မှ ၅ ကီလိုမီတာအကွာရှိ တရုတ်စစ်တပ်၏ မြေပြင်မှဝေဟင်ပစ်ဒုံးစခန်းကိုလည်း စစ်အတွင်း အိန္ဒိယလေတပ်၏ တိုက်လေယာဉ်များမှ ကာကွယ်နိုင်စေရန် အဆင့်မြှင့်တင်ထားသည်။
အာရူနာချားပြည်နယ်တစ်ဖက်ရှိ လန်ဂီကောင်တီ နီဂါချီလေတပ်စခန်း၏ လေယာဉ်ပြေးလမ်းအရှည်မှာ ၃ ၀၀၀ မီတာရှည်လျားပြီး ၅၀၀ မီတာ ထပ်မံတိုးချဲ့ထားသည်။
