အရှေ့တောင်အာရှ လာအိုနိုင်ငံသည် တရုတ်က ငွေကြေးထောက်ပံ့သည့် မြန်နှုန်းမြှင့်ရထားပြေးဆွဲမှုကို အကောင်အထည်ဖော်ပြီးနောက် အကြွေးဆပ်ရန်ပျက်ကွက်မည့်အခြေအနေရှိနေသဖြင့် တရုတ်ကြွေးမြီ ထောင်ချောက် သံခင်းတမန်ခင်းအတွက် အရှိန်အဟုန်အသစ်ဖြစ်လာစေသည်။

လာအိုသည် ပြင်းထန်သော စီးပွားရေးနှင့်ဘဏ္ဍာရေးအကျပ်အတည်းများကို ရင်ဆိုင်နေရကာ တရုတ်က ငွေကြေး အကူအညီပေးခြင်း သို့မဟုတ်  အကြွေးလျှော်ခြင်းမရှိပါက ထွက်ပေါက်ရှိမည့်ပုံမပေါ်ကြောင်း RFA က ဖော်ပြသည်။

ဗီယင်ကျန်းမှ ကွန်မြူနစ်များသည် ကြွေးမြီအထောက်အပံ့ကို မျှော်လင့်ရာတွင် အကြောင်းရှိသည်။

၎င်းတို့၏ အဓိက မဟာမိတ် မြီရှင်မှာ တရုတ်ဖြစ်ပြီး တရုတ်သည် အရှေ့တောင်အာရှ၌ ၎င်း၏ ခါးပတ်လမ်းရပ်ဝန်းစီမံကိန်း (BRI) မျှော်မှန်းချက်အတွက် အဓိက တွန်းအားတစ်ခုဖြစ်သည့် အမေရိကန်ဒေါ်လာ ၅ ဒသမ ၉ ဘီလီယံတန်ဖိုးရှိ ရထားလမ်းအပြီး များမကြာမီတွင် လာအိုအား အကြွေးဆပ်ရန်ပျက်ကွက်ခွင့်ပြုလိုက်ပါက လာအိုသည် ပထဝီ နိုင်ငံရေးအရ ထိခိုက်နိုင်သည်။

လာအိုအနေဖြင့် တရုတ်ကို ပေးရမည့် ကြွေးမြီပမာဏအတိအကျမှာ အငြင်းပွားဖွယ်ဖြစ်သည်။

ကြွေးမြီသည် နိုင်ငံ၏တရားဝင်ကြွေးမြီ ၁၄ ဒသမ ၅ ဘီလီယံ ၏ ထက်ဝက်နီးပါး အမေရိကန်ဒေါ်လာ ၇ ဒသမ ၂ ဘီလီယံခန့်ရှိနိုင်ကြောင်း ကမ္ဘာ့ဘဏ်က ခန့်မှန်းထားသည်ဟု Asia Times ကဖော်ပြသည်။

William & Mary's Global Research Institute မှ သုတေသနဌာန AidData ၏ အဆိုအရ တရုတ်ကြွေးမြီသည် အမေရိကန်ဒေါ်လာ ၁၂ ဒသမ ၂ ဘီလီယံရှိပြီး လူသိရှင်ကြားမထုတ်ပြန်သော သဘောတူညီချက်များ ပါဝင်နေသည်ဟု ဆိုသည်။

ကိန်းဂဏန်း မည်မျှပင်ဖြစ်ပါစေ လာအို၏ကြွေးမြီသည် တရုတ်အတွက်မူ အသေးအဖွဲပင်ဖြစ်သည်။

တရုတ်နိုင်ငံနှင့် ၎င်း၏လုပ်ငန်းခွဲများသည် တိုက်ရိုက်ချေးငွေနှင့် ကုန်သွယ်မှုအကြွေး အမေရိကန်ဒေါ်လာ ၁ ဒသမ ၅ ထရီလျံခန့်ကို ကမ္ဘာတစ်ဝန်းရှိ နိုင်ငံပေါင်း ၁၅၀ ထက်မနည်းကို ချေးငှားထားသည်ဟု ဟားဗတ်စီးပွားရေးသုံးသပ်ချက် ၂၀၂၀ တွင် ခန့်မှန်းဖော်ပြထားသည်။

ကမ္ဘာ့ဘဏ်၏ ဇန်နဝါရီလ အစီရင်ခံစာအရ ကမ္ဘာ့ဝင်ငွေအနည်းဆုံး နိုင်ငံ ၇၄ နိုင်ငံသည် ယခုနှစ်တွင် ကြွေးမြီ ၃၅ ဘီလီယံ ပြန်ဆပ်ရန်ရှိနေပြီး ၁၃ ဒသမ ၁ ဘီလီယံမှာ တရုတ်ကုမ္ပဏီများကို ပေးရမည်ဖြစ်သည်ဟု ဆိုသည်။

တရုတ်၏ ကမ္ဘာလုံးဆိုင်ရာချဲ့ထွင်ရေးနှင့် အခြေခံအဆောက်အအုံဆိုင်ရာ နိုင်ငံခြားရေးမူဝါဒအပေါ် ဝေဖန်သူများ က လာအိုကဲ့သို့ ဆင်းရဲသောနိုင်ငံများသည် တရုတ်၏ကြွေးမြီထောင်ချောက်ထဲ ကျရောက်နိုင်ကြောင်း နှစ်ပေါင်း များစွာ သတိပေးခဲ့ကြသည်။

တရုတ်သည် အခြေခံအဆောက်အုံစီမံကိန်းများကို အလျင်အမြန်အကောင်အထည်ဖော်ပေးကာ ချေးငွေ မဆပ်နိုင်သောနိုင်ငံများကို တိုင်းပြည်၏ အဓိကအဖိုးတန်ပစ္စည်းများ သိမ်းယူခြင်းဖြင့် ဆင်းရဲသောနိုင်ငံများကို ထောင်ချောက်ဆင်လျက်ရှိသည်။