အာဂမိန်းမများ (ပြင်သစ်ရုပ်ရှင်)

ငြိမ်းချမ်းငြိမ်း

အင်္ဂါနေ့၊ အောက်တိုဘာလ 07 2008 17:35 - မြန်မာစံတော်ချိန်

၁၉၄၄ ခုနှစ် ပြင်သစ်နိုင်ငံကို နာဇီဂျာမဏီတို့ သိမ်းပိုက်ထားချိန်တွင် ဖြစ်သည်။ ဂျာမဏီများကို ခုခံတိုက်ခိုက်ရန်အတွက် နန်းရင်းဝန် ဝန်စတန် ချာချီ ကိုယ်တိုင် ဖွဲ့စည်းထားသည့် SOE ခေါ် Special Operation Executive မှာ နာဇီတို့၏ ဖမ်းဆီးထိန်းသိမ်းခြင်း ခံထားရသည့် ပြင်သစ် ဘူမိဗေဒပညာရှင်အား ကယ်တင်ရန်အတွက် တာဝန် ပေးအပ်ခြင်း ခံရသည်။ (ပြင်သစ် ဘူမိဗေဒ ပညာရှင်ထံမှ ပြင်သစ်နိုင်ငံ၏ ဆိပ်ကမ်းများနှင့် ပတ်သက်၍ သတင်း အချက်အလက်များ ရရှိမှသာ မဟာမိတ်တို့မှာ နော်မန်ဒီကမ်းခြေကို တက်နိုင်မည်။) ပြင်သစ်နိုင်ငံ မြောက်ပိုင်းရှိ မြို့တခုတွင် ဖမ်းဆီးခံထားရသည့် ဘူမိဗေဒပညာရှင်အား ကယ်တင်ရန်အတွက် SOE အဖွဲ့မှ လက်ရွေးစင် ပြင်သစ်၊ ဂျာမန်စကား ကျွမ်းကျင်သည့် အမျိုးသမီး ၅ ဦးနှင့်အတူ ဗြိတိသျှ စစ်ဗိုလ်တဦး ပါရှိသော အဖွဲ့မှာ ညဘက်တွင် ပြင်သစ်နိုင်ငံထဲသို့ လေထီးဖြင့် ခုန်ဆင်းပြီး ဂျာမန်တို့ စခန်းချရာ ဆေးရုံဆီသို့ သူနာပြု ဆရာမအဖြစ် အယောင်ဆောင်ကာ ဝင်ရောက် ကယ်တင်ရသည်။ လျှို့ဝှက် အမျိုးသမီးအဖွဲ့၏ ခေါင်းဆောင်ဖြစ်သူမှာ ဂျာမန်အရာရှိအား သေနတ်ဖြင့် ပစ်သတ်သော်လည်း လွတ်မြောက်သွားခဲ့သည်။ ဘူမိဗေဒပညာရှင်အား လျှို့ဝှက်ချိန်းဆိုထားသည့် နေရာတွင် ဗြိတိသျှ လေယာဉ်ပေါ်သို့ တင်ပေးလိုက်ပြီးနောက် ထိုအမျိုးသမီး ၅ ဦးကပါ လေယာဉ်ပေါ်သို့ တက်မည်ပြုစဉ် ဗြိတိသျှစစ်ဗိုလ်က တာဝန် မပြီးဆုံးသေးသဖြင့် ပြန်လိုက်ရန် မဖြစ်နိုင်သေးကြောင်း ပြောဆိုလေသည်။ ထို့အပြင် ဂျာမန်တို့၏ သတင်းများ ရရှိရေးနှင့် ပါရီမြို့ရှိ မြေအောက်လှုပ်ရှားမှုအဖွဲ့နှင့် ချိတ်ဆက်နိုင်ရေးအတွက် ပါရီသို့ ခရီးဆက်ရမည်ဖြစ်ကြောင်း ပြောဆိုပြီး လူစုခွဲရာတွင် နာဇီများက ဝိုင်းထားလိုက်ကြသည်။   ဗြိတိသျှစစ်ဗိုလ်မှာ ဒဏ်ရာဖြင့် အဖမ်းခံခဲ့ရပြီး လျှို့ဝှက် အမျိုးသမီးအဖွဲ့မှာ လွတ်မြောက်သွားခဲ့သည်။ ဂျာမန်တို့၏ စစ်ကြောရေး စခန်းအတွင်းသို့ ရောက်ရှိနေသည့် ဗြိတိသျှစစ်ဗိုလ်အား ဂျာမန် လျှို့ဝှက်ပုလိပ်အဖွဲ့က အပြင်းအထန် နှိပ်စက်ကာ စစ်ဆေး မေးမြန်းသော်လည်း ထိုစစ်ဗိုလ်က ဘာတခုမျှ ဖွင့်မပြောဘဲ အနှိပ်စက်သာ ခံနေခဲ့သည်။ လျှို့ဝှက် အမျိုးသမီးအဖွဲ့ ပါရီမြို့သို့ ရောက်ရှိချိန်တွင် အသင့် စောင့်ဆိုင်းနေသော ဂျာမန် လျှို့ဝှက်ရဲအဖွဲ့၏ ရှာဖွေမှုကြောင့် တဦးမှာ အဖမ်းခံခဲ့ရပြီး ကျန်လူများ လွတ်မြောက်သွားခဲ့သည်။ အမျိုးသမီးနှစ်ဦးကမူ ၎င်းတို့ လျှို့ဝှက်ချိတ်ဆက်မှု လုပ်ထားသော ပါရီရှိ ဘုရားရှိခိုးကျောင်းသို့ သွားရောက်ပြီး ဝှက်ထားသော လက်နက်များနှင့် မြေအောက် တော်လှန်ရေးသမားများကို ချိတ်ဆက်ရန် ကြိုးစားလေသည်။ ထိုအမျိုးသမီးအဖွဲ့ထဲမှ တဦးမှာ အလွန်ကြောက်တတ်သည်။ သူက ပြင်သစ်နိုင်ငံ ပါရီမြို့သို့ သွားရောက်ရာ လမ်းမှာပင် ထွက်ပြေးရန် ကြိုးစားသဖြင့် အဖွဲ့ခေါင်းဆောင် အမျိုးသမီးက ပြန်လည်ချော့မော့ကာ ခေါ်လာခဲ့ရသည်။ နာဇီစစ်ပုလိပ်တို့၏ နှမသားချင်း ကိုယ်ချင်းစာနာမှု ကင်းမဲ့သော စစ်ဆေးမေးမြန်းမှုကြောင့် အဖမ်းခံထားရသော အမျိုးသမီးက ဖော်ကောင် လုပ်လိုက်သဖြင့် ဘုရားကျောင်းအတွင်းမှ လက်နက်များ သယ်ထုတ်ရန် ကြိုးစားနေသည့် အမျိုးသမီးနှစ်ဦးမှာ မြေအောက်ဥမင်မှတဆင့် ကိုယ်လွတ်ရုန်း ထွက်ပြေးခဲ့ရသည်။ ၎င်းတို့နှစ်ဦး ထွက်ပြေးလွတ်မြောက်စေရန် ကူညီဆောင်ကျဉ်းပေးခဲ့သည့် ဘုရားကျောင်းတာဝန်ခံ အမျိုးသမီးကြီးကိုမူ နာဇီတို့က သတ်ပစ်ခဲ့သည်။ ကျန်ရှိနေသေးသော အမျိုးသမီး ၄ ဦး၏ တာဝန်မှာ ပါရီတွင် တာဝန်ကျသော နာဇီတို့၏ ဗိုလ်မှူးကြီးတဦးအား သတ်ပစ်ရန် ဖြစ်သည်။ ထိုအရာရှိမှာ နာဇီတို့၏ အနောက်ဘက် စစ်မျက်နှာတွင်  အတော်ဆုံး ဗိုလ်မှူးတဦး ဖြစ်သည်။ သူသည် မဟာမိတ်တို့၏ ထိုးစစ်ကို ဟန့်တားနိုင်စွမ်းရှိသူလည်း ဖြစ်သည်။ အမျိုးသမီး အဖွဲ့ခေါင်းဆောင်မှာ ပြင်သစ်နိုင်ငံ မြောက်ပိုင်းတွင် ဘူမိဗေဒ ပညာရှင်အား သွားရောက် ကယ်တင်စဉ်က သူ့ကို အိမ်သာထဲတွင် ပစ်သတ်ခဲ့သော်လည်း လွတ်မြောက်သွားခဲ့သည်။ အမျိုးသမီးနှစ်ဦးမှာ ရထားပေါ်တွင် သိကျွမ်းခဲ့သော နာဇီဆရာဝန်တဦး၏ အိမ်တွင် ခြေရာဖျောက်နေကာ မြေအောက်အဖွဲ့ဝင် ပြင်သစ်ပြတိုက်မှူး တဦးထံမှ ရိုင်ဖယ်သေနတ် တလက်ကို ရရှိခဲ့သည်။ လက်ဖြောင့် သေနတ်သမား တဦးဖြစ်သော အမျိုးသမီးအဖွဲ့ ခေါင်းဆောင်မှာ အခွင့်သာသောအချိန်တွင် ဂျာမန် ဗိုလ်မှူးကြီးအား လုပ်ကြံရန် စီစဉ်ထားသည်။ နာဇီ လျှို့ဝှက်ပုလိပ် အဖွဲ့၏ ညှဉ်းပန်းနှိပ်စက်မှုဒဏ်ကို မခံနိုင်သည့် အမျိုးသမီးအဖွဲ့ဝင်မှာ ၎င်းတို့၏ လျှို့ဝှက် အစီအစဉ်များကို တခုပြီးတခု ထုတ်ဖော် ပြောကြားနေသည်ကို အတူ အဖမ်းခံထားရသည့် ၎င်းတို့၏ ခေါင်းဆောင် ဗြိတိသျှစစ်ဗိုလ်က ရွံရှာလာသဖြင့် နာဇီတို့မရှိခိုက် သတ်ပစ်ရန် ကြိုးစားစဉ် မအောင်မြင်ခဲ့ချေ။ ၎င်းတို့အဖွဲ့ထဲမှ ကြောက်တတ်သော အမျိုးသမီးတဦးမှာ နာဇီ ဆရာဝန်အိမ်တွင် ပြန်ဆုံတွေ့ခိုက် SOE အဖွဲ့ကို သိရှိသွားသည့် နာဇီဆရာဝန်၏ တပည့်မှာ ၎င်း၏ ဆရာဖြစ်သူထံ သတင်းပို့မည်ပြုစဉ် အဖွဲ့ခေါင်းဆောင် အမျိုးသမီးကပင် စည်းရုံးနိုင်ခဲ့သည်။ တနေ့တွင် ၎င်းတို့အဖွဲ့သည် အခြားမြို့သို့သွား၍ မြေအောက်တော်လှန်ရေး အဖွဲ့များကို ချိတ်ဆက်မည်ပြုစဉ် သူမတို့ ရထားစီးမည့် ဘူတာရုံ၌ ဖမ်းဆီးခံထားရသည့် အမျိုးသမီးကို တည်ကြက်အဖြစ် နာဇီတို့က နာဇီတို့က အသုံးချ၍ အခြားအဖွဲ့ဝင်များကိုပါ ဖမ်းဆီးရန် ကြိုးစားခဲ့သည်။ အဖွဲ့ခေါင်းဆောင် အမျိုးသမီးက ပစ်လိုက်သော ကျည်ဆန်မှာ နာဇီဗိုလ်မှူးကြီး၏ နားထင်သို့ ကပ်ထိခဲ့သော်လည်း ရထားပေါ်ရှိ ၎င်းတို့အဖွဲ့ဝင် အမျိုးသမီးနှစ်ဦးကိုမူ နာဇီတို့က ပစ်သတ်ခဲ့သည်။ လုပ်ကြံသတ်ဖြတ်မှု မအောင်မြင်ခဲ့သည့် အဖွဲ့ခေါင်းဆောင် အမျိုးသမီးမှာလည်း နာဇီတို့၏ ဖမ်းဆီးခြင်းကို ခံခဲ့ရသည်။ ခေါင်းဆောင် အမျိုးသမီးအား နာဇီတို့က ပြင်းထန်စွာ နှိပ်စက်ပြီးနောက် အခန်းအပြင်သို့ ထွက်သွားချိန်၌ ၎င်းတွင် ပါရှိလာသော အဆိပ်ဆေးပြားကို ပထမဦးဆုံး အဖမ်းခံထားရသည့် အမျိုးသမီးအား ပေးလိုက်သည်။ ထိုအမျိုးသမီးမှာ သူ၏ အမှားကို နောင်တရပြီး ထိုဆေးပြားကို သောက်ကာ အဆုံးစီရင်လိုက်သည်။ ဗြိတိသျှ စစ်ဗိုလ်ကလည်း နာဇီတို့ရှေ့မှာပင် မိမိကိုယ်ကို အဆုံးစီရင်လိုက်သည်။ လွတ်မြောက်နေသေးသော အမျိုးသမီး နှစ်ဦးမှာ နာဇီဆရာဝန်အိမ်တွင် ပုန်းရှောင်နေရင်း နာဇီဗိုလ်မှူးဖြစ်သူအား သတ်ပစ်ရန်အတွက် ဟိုတယ်သို့ ကြေးစားမိန်းမ အသွင်ဖြင့် သွားရောက် စောင့်ဆိုင်းနေသည်။ ကျန်တဦးမှာ ဟိုတယ်ဝန်ထမ်း အယောင်ဆောင်ပြီး လက်နက် စီစဉ်ပေးခဲ့သည်။ နာဇီဗိုလ်မှူး ရောက်လာသောအခါ ကြေးစားအသွင် ဆောင်ထားသော အမျိုးသမီးမှာ သေနတ်ဖြင့် ထုတ်ချိန်ပြီး ဖြစ်သော်လည်း ကြောက်တတ်သဖြင့် ဗိုလ်မှူးကသာ လက်ဦးမှု ရယူခဲ့သည်။ ခဏကြာသောအခါ သေနတ်သံ ကြားလိုက်ရသည်။ သို့သော် ဟိုတယ်ထဲမှ ထုတ်လာသော ရုပ်အလောင်းမှာ မိမိအဖွဲ့ဝင် အမျိုးသမီး ဖြစ်နေသောကြောင့် အကြံမအောင်ဘဲ ဆုတ်ခွါလာခဲ့ရသည်။ နာဇီတို့ ဖမ်းဆီးထားသော အဖွဲ့ခေါင်းဆောင်အား ဂျာမန်နာဇီ ဌာနချုပ်သို့ လွှဲပြောင်းပေးပို့ရာတွင် ကျန်ရှိနေသော အမျိုးသမီးတဦးက လမ်းတွင် ဂျာမန်စစ်တပ်အရာရှိ အယောင်ဆောင်၍ ကယ်တင်နိုင်ခဲ့သည်။ နော်မန်ဒီ ကမ်းခြေသို့ တက်ရန် မဟာမိတ်တို့က ပြင်ဆင်နေချိန်တွင် ကျန်ရှိနေသော အမျိုးသမီးနှစ်ဦးမှာ လန်ဒန်သို့ ပြန်ရန်အတွက် ဘူတာရုံ၌ ရောက်ရှိနေစဉ် နာဇီအရာရှိ အယောင်ဆောင်ထားသော အမျိုးသမီး အဖွဲ့ခေါင်းဆောင် လွတ်မြောက်ရန်အတွက် အာရုံလွှဲသည့်အနေဖြင့် ၎င်းတို့၏ ရန်သူနံပါတ် (၁) ဖြစ်သော ဂျာမန်ဗိုလ်မှူးကြီးအား ပစ်သတ်နိုင်ခဲ့သည်။ Female Agents ဇာတ်ကားကို BBC ရုပ်သံဌာနမှ ဒုတိယကမ္ဘာစစ် အမှတ်တရအဖြစ် ထုတ်လုပ်ဖြန့်ချိ၍ ပြင်သစ်ဒါရိုက်တာ ယန်းပေါလ် ဆာလ်ဆမ်က ရိုက်ကူးသည်။ Annakaranina, The World is Not Enough, Brave heart ဇာတ်ကားများတွင် သရုပ်ဆောင်ထားသည့် ပြင်သစ်မင်းသမီး ဆိုဖီမားဆိုး က အဖွဲ့ခေါင်းဆောင် အမျိုးသမီးအဖြစ် သရုပ်ဆောင်သည်။ ဂျူလီဒီပရာဒျူ၊ မေရီဂီဒီယန်ဒီဘိုရာ ဖရန်ဆွာနှင့် မေဆန်ဆာတို့ ပါဝင် သရုပ်ဆောင်ထားသည်။ ဒုတိယကမ္ဘာစစ်အတွင်းက အမျိုးသမီးတို့၏ စွန့်လွှတ်စွန့်စားမှုကို နောင် နှစ်ပေါင်း ၆ဝ ကျော်အကြာမှသာ ရုပ်ရှင်အဖြစ် မှတ်တမ်းတင် ရိုက်ကူးနိုင်ခြင်း ဖြစ်သည်။ မိမိတိုင်းပြည် လွတ်မြောက်ရေးအတွက် မိန်းမသားများ ဖြစ်သော်လည်း စစ်မှန်သော ခံယူချက်ဖြင့်  ဘဝရော၊ အသက်ပါ စတေးခဲ့သူများဖြစ်သည်။ လွတ်မြောက်ရေးတိုက်ပွဲ ဆင်နွဲနေကြသည့် ကမ္ဘာတဝှမ်းမှ အမျိုးသမီးများအတွက် BBC ရုပ်သံဌာနမှ ရိုက်ကူးတင်ဆက်ခြင်း ဖြစ်သည်။ < Prev   Next >