ဘတ်(စ်)ကားရောက်ရှိချိန်ပြ မျက်နှာပြင်နှင့် ဖုန်းအားသွင်းပေါက်များ ပါဝင်မည့် မှတ်တိုင်များ တည်ဆောက်မည်

ကမ္ဘာ့ခေတ်မီမြို့ပြက ဘတ်(စ်)ကား သယ်ယူပို့ဆောင်ရေးစနစ်တွေမှာ ပါဝင်တဲ့ ဘတ်(စ်)ကားမှတ်တိုင်တွေကို ပွင့်ထွန်းစမြန်မာနိုင်ငံရဲ့ စီးပွားရေးမြို့တော်ရန်ကုန်မြို့မှာ နှစ်အနည်းအငယ်အတွင်း မြင်တွေ့သွားရဖို့ရှိနေပါတယ်။

ဒီလိုအဆင့်မြင့် ဘတ်(စ်)ကားမှတ်တိုင် ၅၀၀ ကို တည်ဆောက်ဖို့ အမေရိကန်ဒေါ်လာ ၁၃ သန်းတန်ကြေးရှိတဲ့ သက်တမ်း နှစ် ၂၀ ရှိတဲ့ စာချုပ်တစ်ခုကို ပြင်သစ်-မြန်မာ နှစ်နိုင်ငံအကျိုးတူပူးပေါင်းထားတဲ့ FMIDecaux နဲ့ ရန်ကုန်မြို့ တော်စည်ပင် သာယာရေး ကော်မတီတို့က ရန်ကုန်တိုင်းဒေသကြီး အစိုးရအဖွဲ့အရှေ့မှာ ယနေ့ (၂၀.၁.၂၀၁၈) ချုပ်ဆိုခဲ့ပါတယ်။ စာချုပ်အရ အဆင့်မြင့် ဘတ်(စ်)ကား မှတ်တိုင် ၅၀၀ ကို အချိန် ၃ နှစ်အတွင်း အပြီးသတ်တည်ဆောက်သွားမှာဖြစ်တယ်လို့ သိရပါတယ်။

ဒီစီမံကိန်းအတွက်  အကောင်အထည်ဖော်လိုသူ ကုမ္ပဏီတွေကို ရန်ကုန်မြို့တော်စည်ပင်သာယာရေးကော်မတီက   ၂၀၁၇ ခုနှစ်၊ ဇန်န၀ါရီလ ၃ ရက်နေ့ကနေ ၇ ရက်နေ့အထိ နိုင်ငံပိုင်သတင်းစာတွေကနေ တင်ဒါခေါ်ယူခဲ့တာဖြစ်ပြီး အဆိုပြုခဲ့တဲ့ ကုမ္ပဏီ ၅ ခုအနက် FMI နဲ့ JCDecaux ကုမ္ပဏီတို့ အကျိုးတူ ပူးပေါင်းထားတဲ့ FMIDecaux ကို ဘတ်(စ်)ကား မှတ်တိုင် အဆင့်မြှင့်တင်တဲ့ လုပ်ငန်းလုပ်ကိုင်ဖို့ အတည်ပြုရွေးချယ်ခဲ့တာဖြစ်ပါတယ်။