သန်လျင်နှင့် ကျောက်တန်းဒေသခံအများစု သီလ၀ါအထူးစီးပွားရေးဇုန်တွင် ၀င်ရောက် အလုပ်လုပ်ကိုင်နေ

၂၀၁၅ ခုနှစ်၊ စက်တင်ဘာလ ၂၃ ရက်နေ့တွင် ရန်ကုန်တောင်ပိုင်းခရိုင်ရှိ သီလ၀ါအထူးစီးပွားရေးဇုန်၏ တရားဝင်ဖွင့်လှစ်ခြင်း အခမ်းအနားကို ဂျပန်-မြန်မာနှစ်နိုင်ငံ ပူးပေါင်းကျင်းပခဲ့ပြီး ယခုနှစ် - ၂၀၁၇ စက်တင်ဘာလ ၂၃ ရက်နေ့တွင် ဇုန်ဖွင့်ပွဲအခမ်းအနား ၂ နှစ်ပြည့်ပြီဖြစ်သည်။

ယခုအခါ သီလ၀ါအထူးစီးပွားရေးဇုန်အကျယ်အ၀န်းစုစုပေါင်း ဟက်တာ ၂၄၀၀ တွင် ဇုန်-A အဖြစ် ၄၀၅ ဟက်တာကို အကောင်အထည်ဖော်ထားပြီးဖြစ်ရာ ယင်းတွင် ရင်းနှီးမြှုပ်နှံရန် ဂျပန်အပါအ၀င် နိုင်ငံတကာမှ ကုမ္ပဏီ ၈၅ ခု လည်ပတ်ရန် ခွင့်ပြုထားသည်။

အဆိုပါ ကုမ္ပဏီ ၈၅ ခုတွင် စက်ရုံ ၃၅ ရုံကလည်ပတ်နေပြီး ၎င်းစက်ရုံများတွင် ပြည်တွင်းဝန်ထမ်းပေါင်း ၅၀၀၀ ခန့် ၀င်ရောက်အလုပ်လုပ်ကိုင်နေပြီး ၈၀ ရာခိုင်နှုန်းလောက်သည် သန်လျင်နှင့် ကျောက်တန်းမြို့နယ်ဒေသခံများဖြစ်သည်ဟု သီလ၀ါအထူးစီးပွားရေးဇုန်စီမံခန့်ခွဲမှုကော်မတီက ပြုစုထားသော သတင်းအချက်အလက်များအရ သိရသည်။

သီလ၀ါအထူးစီးပွားရေးဇုန်သည် စီးပွားရေးမြို့တော်ရန်ကုန်၏ အရှေ့တောင်ဘက် ကီလိုမီတာ ၂၀ အကွာအဝေးတွင် တည်ရှိပြီး လူဦးရေ (လေးသိန်း) နေထိုင်လျက်ရှိ်သော သန်လျင်မြို့နယ်နှင့် ကျောက်တန်းမြို့နယ်အတွင်းမှာ တည်ရှိသည်။