တအာင်းအဖွဲ့ ဖမ်းထားသည့် ရှမ်းအမျိုးသမီး၏ မိသားစုဝင်များ ဆန္ဒထုတ်ဖော်မည်

.

မိသားစုထံမှ ရရှိသည့် နန်းမိုဟွမ် ဓာတ်ပုံ

တအာင်းပလောင် လက်နက်ကိုင်တပ်ဖွဲ့က ဖမ်းဆီးထားသည့် ရှမ်းအမျိုးသမီး ပြန်လည် လွတ်မြောက်လာရေးအတွက် မိသားစုဝင်များကလာမည့် စက်တင်ဘာလ ၇ ရက်နေ့တွင် ရှမ်းပြည်နယ် နမ့်ခမ်းမြို့၌ ဆန္ဒဖော်ထုတ်မည်ဟုမိသားစုဝင်တစ်ဦးကပြောသည်။

ရှမ်းပြည်နယ်မြောက်ပိုင်းနမ့်ခမ်းမြို့၊ ဟိုနောင်ရပ်ကွက်တွင် ကုန်မာဆိုင်ဖွင့်ထားသည့် အသက် ၄၀ ဝန်းကျင်ရှိနန်းမိုဟွမ်ကိုပလောင် ပြည်နယ် လွတ်မြောက်ရေးတပ်ဦး (PSLF/TNLA) က လွန်ခဲ့သည့်တစ်လနီးပါးခန့်က ဖမ်းဆီးသွားခဲ့ပြီးနောက် အဆက်အသွယ်လုံးဝမရခြင်းနှင့် ပြန်လွတ် မြောက်လာခြင်းမရှိခြင်းကြောင့် ဆန္ဒဖော်ထုတ်ရခြင်းဖြစ်သည်ဟုအဖမ်းခံထားရသူ၏ အစ်မနန်းမိုခမ်းကပြောသည်။

နန်းမိုဟွမ်သည် ဩဂုတ်လ ၁၇ ရက် နံနက်က ၎င်း၏ကလေးငယ်များကိုထမင်းကျွေးနေစဉ် TNLA အဖွဲ့က “အခွန်”ဟုသုံးနှုန်းသည့် ငွေကြေးကောက်ခံသည့်ကိစ္စ တိုင်ကြားခြင်းကြောင့်ဟု စွပ်စွဲကာလက်နက် ကိုင်ဆောင် ထားသည့် TNLA တပ်ဖွဲ့ဝင်များကပါဂျဲရိုးကားဖြင့် နေအိမ်ခြံဝင်းအတွင်းသို့ ဝင်ရောက်ပြီးသေနတ်များဖြင့် ချိန်ကာဖမ်းဆီးခေါ်ဆောင်သွားခြင်း ဖြစ်သည်ဟုမိသားစုဝင်များနှင့် လွတ်မြောက် လာစေရန်ကူညီပေးနေသည့် ဒေသခံအဖွဲ့ များမှ တာဝန်ရှိသူများကယနေ့ နေ့ခင်းပိုင်းက Myanmar Now ကိုပြောသည်။

“ကျွန်မညီမကအရမ်းကြောက်တတ်တယ်။ မိသားစုရှိတော့ ထိခိုက်မှာပိုစိုးရိမ်လို့ သူတို့ငွေလာကောက်တိုင်းအမြဲပေးတာ။ သူတို့ (TNLA)စွပ်စွဲသလိုတိုင်ဖို့မပြောနဲ့ မိသားစုဝင်အချင်းချင်းမေးရင်တောင် ဘယ်သူစာလာပို့လဲဆိုတာတောင် လုံးဝမဟဘူး။ အဲလိုလူကိုဖမ်းထားတာလည်းကြာပြီ၊ မိသားစုကိုအကြောင်းကြားဆက်သွယ် တာဘာမှလည်းမရှိသေးဘူး။ ကလေးတွေ ကျန်ခဲ့တဲ့အပြင် လူကိုလည်းလုံးဝမမြင်ရသေးတော့ သူ့ကျန်းမာရေးကိုလည်းအရမ်းစိုးရိမ်နေပြီ။ ဒါကြောင့် အပြစ်မရှိတဲ့ ကျွန်မညီမကိုအမြန်လွှတ်ပေးဖို့ဆန္ဒထုတ် ဖော်မှာပါ”ဟု ၎င်း၏အစ်မနန်းမိုခမ်းကပြောသည်။

လက်ရှိအချိန်တွင် နန်းမိုဟွမ်၏ အမျိုးသားမှာ အသက်အန္တရာယ်ရှိသောကြောင့် တိမ်းရှောင်နေပြီးအသက် ၁၀ နှစ်အောက် ကလေးငယ်နှစ်ဦးနှင့် ဆယ်ကျော်သက်အရွယ်ကလေးတစ်ဦးရှိကြောင်း သိရသည်။

သက်ဆိုင်ရာအုပ်ချုပ်ရေးမှူးများထံမှ ဆန္ဒထုတ်ဖော်ရန် ခွင့်ပြုမိန့်ကျပြီးသောကြောင့် နမ့်ခမ်းမြို့၊ မြို့လယ် ဘုရားကျောင်းရှေ့တွင် ၇ ရက်နေ့ နံနက် ၉ နာရီမှစတင်ကာနန်းမိုဟွမ်၏ မိသားစုဝင် ၁၀ ဦးကဦးဆောင်၍ဆန္ဒထုတ်ဖော်မည်ဖြစ်သည်။

နန်းမိုဟွမ်ကိုအမြန်ဆုံးပြန်လွှတ်ပေးရန် မေတ္တာရပ်ခံစာကိုနမ့်ခမ်းမြို့ခံသံဃာတော်များ၊ ပြည်သူလူထုများနှင့် အရပ်ဘက် လူမှုအဖွဲ့ အစည်းများစုပေါင်း၍ နိုင်ငံတော်သမ္မတရုံး၊ တပ်မတော်ကာကွယ်ရေးဦးစီးချုပ်၊ တအာင်းသံဃာအဖွဲ့ အစည်းနှင့် ပြည်ထောင်စု ငြိမ်းချမ်းရေးဆွေးနွေးရေးကော်မတီမြောက်ပိုင်းမဟာမိတ်အဖွဲ့ FPNCC တို့ထံသို့ စက်တင်ဘာလ ၂ ရက်တွင် ပို့ခဲ့ကြောင်းသိရသည်။

သို့သော် TNLA အနေဖြင့် အကြောင်းပြန်ကြားခြင်းမရှိသည့်အပြင် နန်းမိုဟွမ်ကိုအပြစ်စီရင်မည်ဟုထုတ်ပြန်လာခြင်းကြောင့် ရှမ်းလူမျိုးနှင့် တအာင်းလူမျိုးအကြားလူမျိုးရေးပဋိပက္ခ အသွင် ဆောင် လာမည်ကိုဒေသခံများအနေဖြင့် စိုးရိမ်နေကြသည်ဟုနမ့်ခမ်းလူငယ်ကွန်ရက်မှ လူထုဆက်ဆံရေးတာဝန်ခံစိုင်းသိန်းရွှေက ပြောသည်။

“ကျွန်တော်တို့ စာပို့ထားတဲ့အပေါ်မှာဘာမှအကြောင်းပြန်တာမရှိဘဲမဖြစ်သင့် မဖြစ်ထိုက်တဲ့ ပုံစံမျိုးနဲ့ ကြေညာစာထုတ်လာတဲ့အတွက် စိတ်မကောင်းဘူး။ ဘယ်သူ့မှ ဘဝင်မကျဘူး။ ဒါရဲ့ အကျိုးဆက်ကြောင့် တအာင်းလူငယ်တွေရော၊ ရှမ်းလူငယ်တွေရောလာမယ့်မျိုးဆက်သစ်တွေမှာစိတ်ဒဏ်ရာတွေရှိသွားမှာအစိုးရိမ်ဆုံးပါဘဲ”ဟု ၎င်းကဆိုသည်။

TNLA ၏ ယခုလ ၃ ရက်နေ့ကထုတ်ပြန်ချက်တွင် နန်းမိုဟွမ်သည် TNLA ၏ အကောက်ခွန်ဝန်ထမ်းများလုပ်ငန်းတာဝန်ထမ်းဆောင်စဉ် အပြင်းအထန်ထိခိုက်သေဆုံးသည်အထိဝတ္တရား နှောင့်ယှက်ခဲ့သည်ဟုတိုင်ကြားခံရသောကြောင့် ဖမ်းဆီးခြင်းဖြစ်ပြီး TNLA အဖွဲ့၏ “ရာဇသတ်ကြီး”ဥပဒေပုဒ်မ ၃၃၃ အရ TNLA ဗဟိုတရားရုံး၌ အမှုကိုလက်ခံစစ်ဆေးနေကာနန်းမိုဟွမ်၏ ဆွေမျိုးများနှင့် အများပြည်သူရှေ့တွင် စီရင်ချက် ချနိုင်ရန်စီစဉ်သွားမည်ဟုဖော်ပြထားသည်။

RFA သတင်းဌာနနှင့် အင်တာဗျူးတစ်ခုတွင် TNLA တို့၌ ၎င်းတို့ကိုယ်ပိုင် သီးခြားဥပဒေရှိသည်ဟုဖြေထားပြီးအသေးစိတ်ကိုထုတ်ဖော်ရန်ငြင်းဆိုသွားသည်။

Myanmar Now အနေဖြင့် ထိုကိစ္စနှင့်ပတ်သက်၍ TNLA သို့ ဆက်သွယ် သော်လည်းအဆက်အသွယ်မရပေ။

(ဖြည့်စွက်ချက်။ ။TNLA ကြေညာချက်ပါ ရာဇသတ်ကြီးပုဒ်မ ၃၃၃ ဆိုသည်မှာလက်ရှိ မြန်မာနိုင်ငံ၏ ရာဇသတ်ကြီးကိုဆိုလိုခြင်းဟုတ်မဟုတ် မရှင်းလင်းပါ။ မြန်မာ့ ရာဇသတ်ကြီးပုဒ်မ ၃၃၃ အရမူ "ပြည်သူ့ဝန်ထမ်းအဖြစ်ဖြင့် တာဝန်ဝတ္တရားဆောင်ရွက်နေသော ပြည်သူ့ဝန်ထမ်းအားနာကျင်စေလျှင် ၁၀ နှစ်အထိထောင်ဒဏ်အမျိုးမျိုးချမှရမည့်အပြင် ငွေဒဏ်လည်းချမှတ်နိုင်သည်" ဟုပါရှိပါသည်။)

 

Tags: