မုံရွာ၊ ဖေဖော်ဝါရီ ၈ ။ ။ လက်ပံတောင်းတောင် ဒေသခံများ တစ်နှစ်စာသီးနှံလျော်ကြေးရရှိရန် အတွက် ဦးပိုင်ကုမ္ပဏီ၊ ဝမ်ပေါင်ကုမ္မဏီ နှင့် ရဲတပ်ဖွဲ့တို့အား နာရေးချသည့်သရုပ်ဖော်မှုများဖြင့် ဖေဖော်ဝါရီ ၈ ရက် မွန်းလွှဲ ၂ နာရီခန့်က တောင်းဆိုခဲ့ကြသည်။
ပုသိမ် မုံရွာ လမ်းဆုံတွင် ယင်းသို့ တောင်းဆိုခဲ့ကြခြင်းဖြစ်ပြီး မြန်မာဝမ်ပေါင်ကုမ္ပဏီသို့ သွားရောက် တောင်းဆိုမည်ဖြစ်သော်လည်း သွပ်ဆူးကြိုးများဖြင့် ကာရံကာလမ်းပိတ်ဆို့ထားသည့် အတွက် ယင်းနေရာ၌သာ ဆန္ဒထုတ်ဖော်ခဲ့ခြင်းဖြစ်ကြောင်း ဒေသခံများကပြောသည်။
"တစ်နှစ်စာသီးနှံလျော်ကြေးရရှိဖို့ စီမံကိန်းက တာဝန်ရှိသူတွေနဲ့တွေ့ဆုံဖို့ လာရောက်ခဲ့ကြခြင်းဖြစ်ပါတယ်။ လမ်းဆုံမှာ သွပ်ဆူးကြိုးတွေနဲ့ ကာရံထားတဲ့အတွက် ဒီနေရာမှာပဲ ဆန္ဒပြကြွေးကြော်ခဲ့ကြပါတယ်။ အကြိမ်ကြိမ်တောင်းဆိုခဲ့ပေမဲ့ ဒေသခံတွေကို လာရောက်ညှိနှိုင်းခြင်း မရှိခဲ့ပါဘူး။ ကုမ္ပဏီနဲ့အတူ လမ်းပိတ်ဆို့ခဲ့တဲ့ ရဲတွေဟာ ဒေသခံတွေအတွက် သေဆုံးသွားခဲ့ပါပြီ။" ဟု တုံကျေးရွာဒေသခံ မစန္ဒာက ပြောသည်။
ထို့ပြင် ပုသိမ် မုံရွာလမ်းဆုံတွင် စီမံကိန်းလုပ်ဆောင်နေသော ကုမ္ပဏီအား ငှက်ပျောပွဲများဖြင့် ကျိန်စာတိုက်ခဲ့ကြပြီး ကြေးနီစီမံကိန်း ဖျက်သိမ်းပေးရန်အတွက် ကြွေးကြော်ခဲ့ကြသည်။
ဇန်နဝါရီလအတွင်းမှ စတင်ကာ တစ်နှစ်စာသီးနှံလျော်ကြေးရရှိရန်အတွက် ဆန္ဒပြတောင်းဆိုခဲ့ကြသော်လည်း လျော်ကြေးမရရှိခဲ့သည့်အတွက် ထပ်မံဆန္ဒပြ တောင်းဆိုခဲ့ခြင်းဖြစ်ကြောင်း သိရသည်။
ဇန်နဝါရီလအတွင်းက ဆန္ဒထုတ်ဖော်ခဲ့ကြသည့် ဒေသခံများအား ပုဒ်မ ၁၈ဖြင့် အမှုဖွင့်လှစ်ခြင်းများလည်း ရှိခဲ့သည်။
