ချင်းမိုင်။    ။ စင်ကာပူနိုင်ငံ မြန်မာသံရုံးတွင် အခြေခံ ဥပဒေ မူကြမ်းအပေါ် ဆန္ဒမဲ ပေးရက်များအတွင်း သံရုံးလုပ်ငန်းတချို့ ရပ်နားထားမည် ဖြစ်သည်။

ဧပြီ ၂၅ ရက်မှ ၂၉ ရက်အထိ သံရုံးတွင် မြန်မာနိုင်ငံသားများထံမှ ဆန္ဒမဲ ကောက်ခံခြင်း လုပ်ဆောင်မည် ဖြစ်သည့်အတွက် မြန်မာပြည်သို့ အလည်အပတ် သွားရောက်လိုသူများ ဗီဇာလျှောက်ခြင်းနှင့် မြန်မာနိုင်ငံသားများ ပတ်စ်ပို့ သက်တမ်းတိုးသည့် လုပ်ငန်းများကို ရပ်ဆိုင်းထားသည်။

"ပြည်လုံးကျွတ် ဆန္ဒခံယူပွဲ ကြိုတင်ဆန္ဒမဲပေးရန် ကိစ္စများ ဆောင်ရွက်ရန် ရှိ၍ အဆိုပါနေ့များတွင် သံရုံးလုပ်ငန်းများကို ခေတ္တ ရပ်နားထားမည်" ဟု သံရုံး၏ ကြေငြာစာတွင် ဖော်ပြထားသည်။

ယနေ့ နံနက် ၉ နာရီမှ စတင်၍ ဖိတ်ခေါ်စာ ရထားသူများ မဲပေးခဲ့ကြသည်။

"ထောက်ခံတာတွေ၊ ကန့်ကွက်တာတွေ ပြောမနေနဲ့။ အလွယ်ဆုံး ပြောလိုက်မယ်။ လူထုကို ကိုယ်စားပြုတဲ့ ကိုယ်စားလှယ်တွေ ရေးဆွဲထားတဲ့ အခြေခံဥပဒေ မဟုတ်လို့ ကန့်ကွက်တယ်။ ဒါပါပဲ" ဟု မဲပေးခဲ့သူတဦးက ပြောသည်။

သို့သော်လည်း ထောက်ခံမဲ ထည့်သူများလည်း ရှိသည်။ "အခြေခံ ဥပဒေမူကြမ်းကို ထောက်ခံလားဆိုတော့ ကျမတို့က အမှန်ပဲ ခြစ်ခဲ့တယ်။ ကျမတို့မှ မသိမှ မသိတာ။ သူများက ထောက်ခံတယ် ဆိုတော့လည်း ထောက်ခံလိုက်တာပေါ့" ဟု အခြားမဲ ပေးခဲ့သူတဦးက ပြောသည်။

မဲပေးလိုသူသည် သံရုံးမှ ပို့လိုက်သော မဲပေးရန် ဖိတ်ခေါ်စာအပြင် အမည်၊ နိုင်ငံကူးလက်မှတ်နှင့် နိုင်ငံသားဖြစ်ကြောင်း အထောက်အထားများ လိုအပ်သည်။

သံရုံးမှ အကြောင်းကြားစာ ပို့ထားသူ လူဦးရေ ၁၃၀၀၀ ရှိသည်ဟု ပြောသော်လည်း ယနေ့တွင် လာရောက်သူ အများစုမှာ အကြောင်းကြားစာ မရကြဟု ပြောဆိုကြသည်။