ကချင်လွတ်လပ်ရေးအဖွဲ့ KIO ၏ အဓိက စခန်းထောက်တစ်ခုဖြစ်သော ကချင်ပြည်နယ်အရှေ့ပိုင်း ပွိုင့် ၇၇၁
တောင်ကုန်းနှင့်ဝန်းကျင်ကို ၂၀၁၂ ခုနှစ်ဒီဇင်ဘာ ၃၀ ရက်တွင် လေကြောင်းအကူအညီ အသုံးပြု၍ အစိုးရတပ်က
သိမ်းယူခဲ့သည်ဟု ဇန်န၀ါရီ ၃ ရက်နေ့ထုတ် နိုင်ငံပိုင် သတင်းစာများတွင် ဖေါ်ပြသည်။
သိမ်းယူရာတွင် စခန်းအတွင်းမှ ၁၂၀ မမ စိန်ပြောင်းတစ်လက်၊ ၆၀ မမ စိန်ပြောင်းတစ်လက်၊ လက်နက်မျိုးစုံ ၁၃ လက်၊ လက်ပစ်ဗုံးမျိုးစုံ အလုံး ၂၇၀၊ မိုင်းမျိုးစုံ ၅၂ လုံး၊ ကျည်မျိုးစုံ အတောင် ၄,၀၀၀၊ ယမ်းကြိုးနှစ်ခွေတို့ သိမ်းဆည်းခဲ့သည်ဟု ဖေါ်ပြထားသည်။
သတင်းစာက လက်လက်ကိုင်အဖွဲ့ ၁၀ ဖွဲ့နှင့် ငြိမ်းချမ်းရေး ဆွေးနွေးမှုများရှိခဲ့ပြီးဖြစ်သော်လည်း KIO နှင့်လည်း ၁၁ ကြိမ်ဆွေးနွေးပြီးဖြစ်သည်။ ဆွေးနွေးမှုများအတွင်း KIO ၏ တောင်းဆိုမှုအရ ထိရောက်စွာ ညှိနှိုင်း
ဆောင်ရွက်နိုင်ရန် အစိုးရတပ်မှ ဒုတိယဗိုလ်ချုပ်ကြီးတစ်ဦး အဖွဲ့ဝင်အဖြစ် စေလွှတ်ပေးခဲ့သော်လည်း တစ်ဖက်မှ တက်ရောက်ရန်ပျက်ကွက်ခဲ့သည်ဟုလည်း သတင်းစာကရေးသားသည်။
အစိုးရ တပ်ဖွဲ့များသည် မိမိကိုယ်ကို ခုခံကာကွယ်ခြင်းမှလွှဲ၍ စခန်းများအား စတင်တိုက်ခိုက်ခဲ့ခြင်း မပြုခဲ့
သော်လည်း လဂျာယန်းစခန်းသို့ ရိက္ခာပို့သည့် လမ်းကြောင်းရှိ မြစ်ကြီးနား - ဗန်းမော်ကားလမ်းကို အဓိကပိတ်ဆို့ တိုက်ခိုက်နေခြင်းကြောင့် ၇၇၁ တောင်ကုန်းကို တိုက်ခိုက် သိမ်းပိုက်ရခြင်းဟုလည်း သတင်းစာက ရေးသားသည်။
