ရေနံဈေးနှုန်း ထိုးကျ၊ စွမ်းအင်ကုမ္ပဏီများ အလုပ်နေရာများ လျှော့ချ၍ ရင်းနှီးမြှုပ်နှံမှုများကို ဆိုင်းငံ့ထား

.

လန်ဒန်၊ ဇန်န၀ါရီ - ၁၃ ။           ။ ရေနံဈေး ထိုးကျသွားပြီး ဆက်လက်ကျဆင်းဖွယ်ရှိနေသောကြောင့် ကမ္ဘာ့အကြီးဆုံး ရေနံကုမ္ပဏီများက အလုပ်နေရာများ ဖြတ်တောက်လျှော့ချပြီး ကြီးကြီးမားမား ရင်းနှီးမြှုပ်နှံမှုများကိုလည်း ဆိုင်းငံ့ထားကြသည်ဟု ဆိုသည်။

ရေနံဈေးနှုန်းမှာ ၁၂နှစ်တာအတွင်း အနိမ့်ဆုံးသို့ ထိုးကျသွားခဲ့ပြီး လပေါင်း၊ နှစ်ပေါင်းများစွာကြာအောင် ပြန်လည် နာလံထူဦးမည့် လက္ခဏာမရှိသောကြောင့် ဇန်န၀ါရီ ၁၂ရက်နေ့က အလုပ်နေရာ ၄၀၀၀ဖြတ်တောက်လျှော့ချခဲ့ကြောင်း ပြောကြားခဲ့သည့် BPနှင့် အလားတူ ရေနံကုမ္ပဏီများမှာ ရေနံဈေးနှုန်းကျဆင်းမှုကို ကာမိအောင် နည်းနည်းနှင့် ကြဲကြဲဝိုင်းလာခဲ့ကြသည်။

ပြီးခဲ့သည့် ဆောင်းရာသီက ကယ်လီဖိုးနီးယားအခြေစိုက် Chevron က အလုပ်နေရာ ၇၀၀၀ကို ဖျက်သိမ်းမည်ဟု ပြောကြားချိန်တွင် ပြိုင်ဘက် Shell ကလည်း ၀န်ထမ်း ၆၅၀၀ကို ထုတ်ပယ်ပစ်မည်ဟု ကြေညာခဲ့သည်။

ရေနံထုတ်လုပ်သည့် ကုမ္ပဏီကြီးများတွင်သာမဟုတ်ဘဲ၊ ၄င်းတို့နှင့် အလုပ်လုပ်နေသည့် တူးဖော်ရေး ကန်ထရိုက်တာများနှင့် စက်ကိရိယာထောက်ပံ့ရေးကုမ္ပဏီများသည်လည်း အလားတူ ရေနံဈေးကျဆင်းမှုဒဏ်ကို ခံစားနေကြရသည်။

ရေနံဈေးနှုန်း ထိုးကျမှုမှာ မော်တော်ယာဉ်များ၊ လေကြောင်းလိုင်းများနှင့် လောင်စာအပေါ် အကြီးအကျယ် မှီခိုနေကြရသည့် အခြားစီးပွားရေးလုပ်ငန်းများအတွက် သတင်းကောင်းဖြစ်သော်လည်း စွမ်းအင်ကဏ္ဍတွင်မူ ၂၀၁၅ခုနှစ် တစ်နှစ်တည်းမှာပင် အမေရိကန်အခြေစိုက် ကုမ္ပဏီများမှာ အလုပ်နေရာပေါင်း ၉၅၀၀၀ခန့် ဆုံးရှုံးခဲ့ရသည်ဟု အကြံပေးကုမ္ပဏီ Challenger, Gray & Christmas မှ သတင်းအချက်အလက်များအရ သိရှိရသည်။ ယင်းမှာ ယမန်နှစ် ၁၄၀၀၀ အရေအတွက်နှင့်စာလျှင် သိသိသာသာ မြင့်မားလာခဲ့ခြင်းပင် ဖြစ်သည်။   

၂၀၀၈ခုနှစ်က တစ်စည်လျှင် ဒေါ်လာ ၁၀၀အထိ အမြင့်ဆုံးတက်သွားချိန်တွင် စွမ်းအင်ကုမ္ပဏီများမှာ ကြီးထွားပြန့်ကားလာခဲ့ကြပြီး၊ ယခုဆယ်စုနှစ်၏ အစောပိုင်းကာလများ၌ ထိုအနေအထားတွင် ဆက်ရှိနေခဲ့သော်လည်း လွန်ခဲ့သည့် နှစ်နှစ်တွင်မူ ရောင်းလိုအားများလာပြီး ၀ယ်လိုအား နည်းလာသောကြောင့် ဈေးနှုန်းမှာ ထိုးဆင်းသွားခဲ့သည်။

ယခုနှစ်သစ် အစတွင်လည်း ရေနံဈေးနှုန်းမှာ ထူးပြီး တက်မလာခဲ့ပါ။ အင်္ဂါနေ့အရောက်တွင်မူ တစ်စည်လျှင် ၃၁ဒေါ်လာအောက်အထိ ကျဆင်းသွားခဲ့သောကြောင့် ၂၀၀၄ခုနှစ် နောက်ပိုင်းတွင် အနိမ့်ဆုံး ဈေးနှုန်းဖြစ်လာခဲ့သည်။

ဝေဖန်သုံးသပ်သူများက တစ်စည်လျှင် ၁၀ဒေါ်လာနီးပါးအထိ ကျဆင်းမည်ဟု ခန့်မှန်းထားကြသောကြောင့် ကုမ္ပဏီများအနေဖြင့် ရှေ့တွင် ပိုမိုကျပ်တည်းလာမည့်သဘောပင် ဖြစ်သည်။

‘ဈေးကွက်မှာ အနိမ့်ဆုံးဆိုတာက ကျလာတဲ့ဓားကို ဖမ်းရသလိုပဲ အန္တရာယ်ကြီးမားတယ်။ ဒါပေမယ့် ပိုပြီးနိမ့်ကျသွားဦးမယ့် ဈေးနှုန်းပြိုလဲသံတွေ ကြားနေရပြီ။ အချက်ပေးခေါင်းလောင်းသံတွေ စမြည်လာတော့မယ်။ ပိုပြီး သတိကြီးကြီးနဲ့ ချဉ်းကပ်ရပါလိမ့်မယ်’ဟု CMC Markets မှာ ဈေးကွက် ဝေဖန်သုံးသပ်သူ မိုက်ကယ် ဟူးဆန်က ပြောကြားခဲ့သည်။