ဘန်ကောက်၊ ဇန်နဝါရီ ၇ ။ ။ ထိုင်းနိုင်ငံ၌ ဖေ့ဘုတ်ကတစ်ဆင့် စစ်တပ်သုံး လက်နက်များ ဝယ်ယူမှုဖြင့် လူငါးဦးအား ဖမ်းဆီးရမိကာ ရှာဖွေမှုတွင် ဗုံးလောင်ချာများနှင့် အခြားလက်နက် ခဲယမ်းများကို သိမ်းဆည်းရမိခဲ့သည်။
ဖမ်းမိသူငါးဦးမှာ အသက် ၅၅ နှစ်မှ ၁၉ အထိ ရှိသူများ ပါဝင်ပြီး ခွင့်ပြုချက်မရှိဘဲ လက်နက်ခဲယမ်း အရောင်းအဝယ်ပြုမှုဖြင့် ဖမ်းဆီးတရားစွဲထားကြောင်း အမျိုးသားရဲတပ်ဖွဲ့ လက်ထောက်အကြီးအကဲ သီရိဝါနာရန်စီဘရက်မန်နာကူးက ဇန်နဝါရီ ၇ ရက်က သတင်းစာရှင်းလင်းပွဲ၌ ပြောခဲ့သည်။
ထိုဖမ်းဆီးထားသူများထံမှ လောင်ချာများနှင့်အတူ ထိပ်ဖူးတပ်ဗုံးများ၊ သေနတ်များကို သိမ်းဆည်းရမိခဲ့သည်။
ပြီးခဲ့သည်လအတွင်းကလည်း ဘူရီရမ်တွင် ဖေ့ဘုတ်ပေါ်မှ လက်နက်ရောင်းချမှုဖြင့် ဆယ်ကျော်သက်နှစ်ဦးကို ရဲနှင့် စစ်တပ်က ဖမ်းဆီးခဲ့သည်။ နောက်ပိုင်း၌ အာဏာပိုင်များက ကွင်းဆက် ဆက်လိုက်ရာမှ ယခုသံသယရှိသူ ငါးဦးအား ဖမ်းဆီးရမိခြင်းဖြစ်ကြောင်း သီရိဝါနာက ပြောသည်။
ဇန်နဝါရီ ၆ ရက်က လမ်ပန်တွင် နှစ်ဦးကို ဖမ်းဆီးရမိခြင်းဖြစ်ပြီး ကျန်သုံးဦးကို ချင်းရိုင်၌ ဖမ်းဆီးရလိုက်ခြင်းဖြစ်သည်။ ထိုလက်နက်များကို မည်သည့်အတွက် အသုံးချရန် ကြံစည်နေခြင်းအား အာဏာပိုင်များ ဆက်လက်စစ်ဆေးနေကြောင်း ၎င်းက ပြောသည်။ လောင်ချာလက်နက်များ မည်သည့်နေရာမှ လာသည်ကို အိမ်နီးချင်းနိုင်ငံတစ်နိုင်ငံနှင့် ဆက်ဆံရေးအပေါ်တွင် ထိခိုက်မှုဖြစ်လာမည် စိုး၍ မပြောလိုကြောင်း ၎င်းက ငြင်းဆိုခဲ့သည်။