ရန်ကုန်၊ ဒီဇင်ဘာ ၃၀ ။ ။ အမျိုးသားဒီမိုကရေစီအဖွဲ့ချုပ်က မဲဆွယ်စည်းရုံးခဲ့သည့် "ပြောင်းလဲချိန်တန်ပြီ" ဆိုသည့် စကားလုံးသည် ဘဝင်မြင့်စိတ်ကြီးဝင်သူစိတ်ဟုဆိုကာ အဘိဓမ္မာ(ဂုဏ်ထူးဆောင်) ပထမအဆင့် စာမေးပွဲ မေးခွန်းအတွင်း ဒီဇင်ဘာ ၂၅ရက်တွင် သာသနာရေးဦးစီးဌာနက ထည့်သွင်းမေးမြန်းခဲ့သည်။
ဒီဇင်ဘာ ၂၅ရက်နေ့၊ သာသနာရေးဝန်ကြီးဌာန၊ သာသနာရေးဦးစီးဌာနကပြုလုပ်သည့် အဘိဓမ္မာ (ဂုဏ်ထူးဆောင်)ပထမအဆင့် စာမေးပွဲမေးခွန်းနံပါတ် ၁တွင် အောက်ပါအတိုင်းထည့်သွင်းမေးမြန်းခြင်း ဖြစ်သည်။
"ပြောင်းလဲချိန်တန်ပြီ" ဟူသောစကားနှင့်အညီအမှန်တကယ်ပြောင်းလဲခွင့်ရမည့်အချိန်ကို မျှော်လင့်လျက် ဘဝင်မြင့်စိတ်ကြီးဝင်နေသူ သန္တာန်၌ဖြစ်သောစိတ်ကို အတိအကျဖော်ပြ၍၊ မနော၌ပေါ်သည်-ဟုဆိုလျှင် လူတိုင်းစိတ်ဝင်စားသော 'မနောဓာတ်' ၏ အဓိပ္ပါယ်ကိုလည်း ဖြေဆိုပါ။ ဟုဖြစ်သည်။
"မေးခွန်းကို သာသနာရေးကမထုတ်ပါဘူး။ မဟာသံဃာ့နာယကအဖွဲ့ကသြဝါဒပေးပြီး၊ တာဝန်ပေးတဲ့ သံဃာတွေကပဲ ထုတ်တာပါ။ အဲဒီထဲမှာပါတဲ့စာသားတွေဘာတွေကို စိစစ်ပြီး ဖြတ်တောက်တာတွေကို ကျွန်တော်တို့မလုပ်ပါဘူး" ဟု သာသနာရေးဦးစီးဌာန ညွှန်ကြားရေးမှူးချုပ် ဦးမိုးဇော်ရွှေက မဇ္ဈိမကိုပြောသည်။
အဘိဓမ္မာ (ဂုဏ်ထူးဆောင်)ပထမအဆင့် စားမေးပွဲများသည် သံဃာတော်များအတွက်ဖြေကြားရသည့် စားမေးပွဲမဟုတ်ဘဲ လူပုဂ္ဂိုလ်များကို စစ်ဆေးသည့် စားမေးပွဲများသားဖြစ်ကြောင်းနှင့် ဒီဇင်ဘာ ၂၅ရက်တွင် စစ်ဆေးခဲ့ပြီးဖြစ်သည်ဟု ဒဂုံမြို့သစ်အရှေ့ပိုင်း အမျိုးဘာသာသာသနာစောင့်ရှောက်ရေးအဖွဲ့ ဥက္ကဋ္ဌ ဆရာတော် ဦးနေမိန္ဒက မိန့်သည်။
"ဦးဇင်းတို့သိတာတော့ အဲဒီစာမေးပွဲကိုလူပုဂ္ဂိုလ်တွေအတွက် အဓိကလုပ်တာ၊ ဘုန်းကြီးတွေအများစုမဖြေပါဘူး။ မေးခွန်းကိုလည်း ကမ္ဘာအေးက သာသနာရေးဦးစီးဌာနက၊ စာမေးပွဲဌာနကနေထုတ်တာ၊ သံဃာ့မဟာနာယက ကအဓိကသြဝါဒပေးတဲ့ သံဃာတွေက မေးခွန်းထုတ်ကြတာပါပဲ၊ သာသနာရေးကတော့ စာရွက်စာတမ်းပြုစု ဒီလောက်ပဲ။" ဟု ၎င်းကဆက်လက်မိန့်ကြားသည်။
၂၀၁၅ခုနှစ်ရွေးကောက်ပွဲမှ တစ်ဆင့်အမှန်တစ်ကယ်ပြောင်းလဲနိုင်ရေးအတွက် ဆောင်ရွက်မည့် အဓိပ္ပါယ်နှင့် ဆုံးဖြတ်ချက်ချမှတ်ဆောင်ရွက်နိုင်ရေးအတွက် "ပြောင်းလဲချိန်တန်ပြီ" ဆိုသည့်စာသားကို သတ်မှတ်ကာ အမျိုးသားဒီမိုကရေစီအဖွဲ့အချုပ်က မဲဆွယ်စည်းရုံးခဲ့ခြင်းသာဖြစ်သည်ဟု ပါတီဗဟိုအလုပ်အမှူဆောင် ဦးညီပုက မဇ္ဈိမကိုပြောသည်။
"ဒီကိစ္စနဲ့ပက်သက်ပြီးသေချာလည်းမသိသေးဘူး။ လုပ်တဲ့သူတွေကပဲဘာအတွက်လုပ်တယ်ဆိုတာကို သိနိုင်လိမ့်မယ်။ ဒေါ်အောင်ဆန်းစုကြည်ပြောထားသလို နိုင်ငံရေးမှာ ဘာသာရေးကို ခုတုံးလုပ်မှာမဟုတ်ဘူး။ ကျွန်တော်တို့ကတော့ နိုင်ငံရေးအရပြောသင့်တာ၊ ဆုံးဖြတ်သင့်တာကို ပြောခဲ့တာပါပဲ။" ဟု ၎င်းကပြောသည်။
ယင်းအပြင် နိုင်ငံရေးကို ဘာသာရေးနှင့် ရောယှက်၊ ခုတုံးလုပ်ခြင်းမရှိစေရဟူသည့် ပါတီမူဝါဒအတိုင်း အဖွဲ့ချုပ်က ဆောင်ရွက်နေသည်ဟုလည်း ဦးညီပု ကဆိုသည်။
၂၀၁၅ခုနှစ်၊ နိုဝင်ဘာ ၈ရက်တွင် ကျင်းပခဲ့သည့် အထွေထွေရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်က ၈၀ရာခိုင်နှုန်းကျော် အနိုင်ရရှိထားသည့် ပါတီတစ်ခုလည်းဖြစ်သည်။
