အကြမ်းဖက်မှုပြောဆိုချက်ကို မေးခွန်းထုတ်သည့် ပြင်သစ်သတင်းထောက်ကို တရုတ်နိုင်ငံက နှင်ထုတ်

အကြမ်းဖက်မှုပြောဆိုချက်ကို မေးခွန်းထုတ်သည့် ပြင်သစ်သတင်းထောက်ကို တရုတ်နိုင်ငံက နှင်ထုတ်

ပေကျင်း၊ ဒီဇင်ဘာ-၂၇ ။             ။ တရုတ်နိုင်ငံအနောက်ပိုင်း မွတ်စလင်ဒေသတွင် လူမျိုးရေးအကြမ်းဖက်မှုကို ကမ္ဘာနှင့်အဝန်းဖြစ်ပွားနေသည့် အကြမ်းဖက် တိုက်ခိုက်မှုများနှင့်   နှိုင်းယှဉ်ချိန်ထိုးမှု အပေါ် မေးခွန်းထုတ်သည့်အတွက် သူမကို မီဒီယာများက ပြင်းပြင်းထန်ထန် ဆန့်ကျင်လာပြီးနောက်တွင် တရုတ်နိုင်ငံက ဒီဇင်ဘာ၂၆ရက်နေ့က ပြင်သစ်ဂျာနယ်လစ်တစ်ဦးကို ဂျာနယ်လစ်ဗီဇာ သက်တမ်း ထပ်တိုးမပေးတော့ဘဲ နှင်ထုတ်ပစ်ခဲ့သည်။

ပြင်သစ် သတင်းမဂဇင်း L’Obs ၏ ဝါရင့်ဂျာနယ်လစ်တစ်ဦးဖြစ်သည့် အာဆူလာ ဂေါ်သီရာက နှင်ထုတတော့မည်ကို ကြိုတင်မျှော်လင့်ထားပြီးဖြစ်သောကြောင့် သောကြာနေ့ နှောင်းပိုင်းကတည်းက တရုတ်နိုင်ငံမှ ထွက်ခွာရန်ပြင်ဆင်နေကြောင်း ပြောကြားခဲ့သည်။

အကယ်ရျ် ဒီဇင်ဘာ ၃၁ရက်နေ့တွင် သူမ ထွက်ခွာသွားခဲ့ပါက သူမမှာ ၂၀၁၂ခုနှစ်နောက်ပိုင်းတွင် တရုတ်နိုင်ငံမှ နှင်ထုတ်ခံရသည့် ပထမဆုံးသော နိုင်ငံခြားဂျာနယ်လစ် ဖြစ်လာမည်ဖြစ်သည်။ Al Jazeera အတွက် အလုပ်လုပ်ပေးနေသည့် အမေရိကန်နိုင်ငံသား မီလစ်ဆာ ချန်းမှာ ၂၀၁၂ခုနှစ်က တရုတ်နိုင်ငံမှ နှင်ထုတ်ခံရဖူးသည်။

သူတို့က ကျမ မရေးခဲ့တာအတွက် ဝန်ချတောင်းပန်စေချင်ကြတယ်။ ကျမ မရေးခဲ့တာကို ရေးတယ်ဆိုပြီး စွပ်စွဲနေကြတယ်ဟု ဂေါ်သီရာက ပြောကြားခဲ့သည်။

တရုတ်နိုင်ငံခြားရေးဝန်ကြီးဌာန ပြောခွင့်ရပုဂိုလ် လူ ကန်းကမူ ဂေါ်သီရာမှာ အရပ်သားများကို သေဆုံးစေခဲ့သည့် အကြမ်းဖက်မှုနှင့် ရက်စက်သော လုပ်ရပ်များကို ထောက်ခံပြီး။ သူမ၏ စကားများအတွက် ဝန်ချတောင်းပန်ရန်လည်း ငြင်းဆန်နေသောကြောင့် တရုတ်မြေပေါ်တွင် အလုပ်လုပ်ခွင့် မပြုသင့်တော့ဟု ပြောကြားခဲ့သည်။

နိုင်ငံခြားမီဒီယာတွေနဲ့ နိုင်ငံခြားသတင်းထောက်တွေရဲ့ နိုင်ငံအတွင်း သတင်းယူခွင့်ကို တရုတ်နိုင်ငံက အမြဲတမ်း အကာအကွယ်ပေးခဲ့ပေမယ့်လည်း အကြမ်းဖက်မှုကို အားပေးအားမြှောက်လုပ်တာကိုတော့ သည်းမခံနိုင်ပါဘူးဟု လူက ကြေညာချက်တစ်စောင်တွင် ပြောကြားခဲ့သည်။

ဂေါ်သီရာကမူ စွပ်စွဲချက်များမှာ ယုတ္တိမတန်ကြောင်း ငြင်းပယ်ခဲ့ပြီး အကြမ်းဖက်မှုကို အားပေးအားမြှောက်လုပ်သည်ဆိုသည်မှာ ကျင့်ဝတ်အရရော ဥပဒေအရပါ မှားယွင်းကြောင်းနှင့် ထိုသို့ဖြစ်ခဲ့လျှင်လည်း သူ့ကို တရားစွဲသင့်ကြောင်း ပြောကြားခဲ့သည်။

ဒါတွေအားလုံးက စကားလှအောင် ပြောနေတာပါ။ တကယ်က အနာဂတ်ပေကျင်းမှာ နိုင်ငံခြားသတင်းထောက်တွေကို ဟန့်တားဖို့ ရည်ရွယ်တာပါဟု ဂေါ်သီရာက ပြောကြားခဲ့သည်။

သောကြာနေ့က ပြင်သစ်နိုင်ငံခြားရေးဝန်ကြီးဌာနက ထုတ်ပြန်ခဲ့သည့် ကြေညာချက်တွင်မူ မဒမ် အာဆူလာ ဂေါ်သီရာ၏ ဗီဇာကို သက်တမ်းတိုးမပေးသည့်အတွက် ဝမ်းနည်းကြောင်း၊ ကမ္ဘာနှင့်အဝန်းရှိ ပြင်သစ်ဂျာနယ်လစ်များ၏ အခန်းကဏ္ဍကို အလေးထားကြောင်း ပြောကြားထားသည်။  

တရုတ်နိုင်ငံ၏ နိုင်ငံခြားသတင်းထောက်များကလပ်ကမူ ဂေါ်သီရာက အကြမ်းဖက်မှုကို ထောက်ခံသည်ဟူသော စွပ်စွဲချက်မှာ အခြေအမြစ်မရှိသည့် ပုဂိုလ်ရေးစော်ကားမှုတစ်ခုသာ   ဖြစ်သည်ဟု   ပြောကြားခဲ့သည်။ ဆုံးဖြတ်ချက်ကြောင့် အလွန်အမင်း စိတ်ပျက်ရပြီး၊ ပေကျင်းက ဗီဇာကိုကိုင်ရျ် နိုင်ငံခြားဂျာနယ်လစ်များကို ခြိမ်းခြောက်နေသောကြောင့် စိုးရိမ်မိကြောင်းလည်း ပြောကြားခဲ့သည်။

ပါရီတိုက်ခိုက်မှုအပြီး ထွက်ရှိလာသည့် ဂေါ်သီရာ၏ နိုဝင်ဘာ ၁၈ရက် ဆောင်းပါးနှင့် ပတ်သက်ပြီး ပေကျင်းမီဒီယာများနှင့် အချင်းများရခြင်းပင် ဖြစ်သည်။ ပေကျင်းက ပါရီနှင့် တစ်သွေးတစ်သားတည်းရှိသည်ဟု ပြောခြင်းမှာ ရည်ရွယ်ချက်ရှိကြောင်း၊ ပေကျင်းက ရှင်ကျန်းမွတ်စလင်ဒေသမှ လူမျိုးရေးအကြမ်းဖက်မှုကို ကမ္ဘာနှင့်အဝန်း အကြမ်းဖက်မှုကွန်ရက်၏ အစိတ်အပိုင်းအဖြစ် နိုင်ငံတကာ အသိုင်းအဝိုင်းက ထောက်ခံလာရန် ကြိုးစားနေကြောင်း ဂေါ်သီရာက ရေးသားခဲ့သည်။

ဝီဂါလူနည်းစုများ ပါဝင်ပတ်သက်နေသည့် အကြမ်းဖက်တိုက်ခိုက်မှုအချို့မှာ နိုင်ငံတကာ အဖွဲ့အစည်းများနှင့် ဆက်သွယ်နေသည့် အထောက်အထား မတွေ့ရှိရသောကြောင့်   ဒေသတွင်းသဘောသာ   ဆောင်သည်ဟု နိုင်ငံတကာ ကျွမ်းကျင်သူများက ယူဆထားကြောင်းလည်း ဂေါ်သီရာက ရေးသားခဲ့သည်။

လူ့အခွင့်အရေးအုပ်စုများကမူ အကြမ်းဖက်မှုများမှ ပေကျင်း၏ ဖိနှိပ်သည့်ပေါ်လစီများကို တုန့်ပြန်သည့် လုပ်ရပ်ဖြစ်ဖွယ်ရှိသည်ဟုပင် ပြောကြားကြသည်။

Mizzima Weekly