နယူးယောက်၊ ဒီဇင်ဘာ-၂၅ ။ ။ iPhone ၏ ဒီဇိုင်းနှင့် မူပိုင်ခွင့်ကို တုပချိုးဖောက်သည့်အတွက် ဆမ်ဆောင်းက Apple ကို ကန်ဒေါ်လာ ၅၄၈သန်းကျော် နစ်နာကြေးပေးပြီးလို့ ရက်သတ္တတစ်ပတ်ကျော်အကြာတွင် Apple က ၎င်း၏ အကြီးမားဆုံး စမတ်ဖုန်းပြိုင်ဘက်ကို နောက်ထပ်ပိုမိုပေးရေး တွန်းအားပေးရန် အမေရိကန် ရုံးတော်သို့ တောင်းဆိုခဲ့သည်။
ဗုဒ္ဓဟူးနေ့က ရုံးတော်သို့ တင်သွင်းခဲ့သည့် စာရွက်စာတန်းများထဲတွင် Apple Inc က နောက်ထပ် အကျိုးစီးပွား ထိခိုက်နစ်နာမှုများအတွက် Samsung Electronics Co Ltd က ကန်ဒေါ်လာ သန်း၁၈၀နီးပါး ပေးရန် ကျန်ရှိနေသေးသည်ဟု ပြောကြားထားသည်ဟု ဆိုသည်။
နောက်ထပ် ထိခိုက်နစ်နာမှုများမှာ ၂၀၁၂ခုနှစ်တွင် ဂျူရီက အငြင်းပွားမှုတွင် ဆမ်ဆောင်း၌ တာဝန်ရှိကြောင်း ဆုံးဖြတ်ခဲ့ပြီးနောက်တွင် ရောင်းချခဲ့သည့် Apple၏ မူပိုင်ခွင့်များကို ချိုးဖောက်ထားသော ဆမ်ဆောင်း၏ ကိရိယာ ၅ခုနှင့် ဆက်နွယ်နေသည်ဟု ဆိုသည်။
သို့ရာတွင် ဆမ်ဆောင်းနှင့် Apple မှ ကိုယ်စားလှယ်များကိုမူ ချက်ချင်း ဆက်သွယ်မေးမြန်းနိုင်ခြင်း မရှိခဲ့ပေ။
၂၀၁၁ခုနှစ်ကတည်းကပင် Apple က iPhone၏ အသွင်ပြင်ကို တုပပြီး မူပိုင်ခွင့်များကို ချိုးဖောက်သည်ဟု ဆိုကာ တောင်ကိုရီးယား အီလက်ထရွန်းနစ်ကုမ္ပဏီကြိး ဆမ်ဆောင်းကို တရားစွဲခဲ့သည်။ ၂၀၁၂ခုနှစ်တွင် ဆမ်ဆောင်းက Appleကို ကန်ဒေါ်လာ သန်း၉၃၀ နစ်နာကြေးပေးရန် တရားရုံးက စီရင်ဆုံးဖြတ် အမိန့်ပေးခဲ့သည်။
သို့ရာတွင် မေလကမူ Apple အနေဖြင့် ဖုန်းသွင်ပြင်ကို ကုန်အမှတ်တံဆိပ်များဖြင့် မကာကွယ်နိုင်ခဲ့ဟု ဆိုကာ အမေရိကန် အယူခံရုံးတော်က စုစုပေါင်းထဲမှ ကန်ဒေါ်လာ ၃၈၂သန်းကို ဖြတ်တောက်လျှော့ချပေးခဲ့သည်။ ဒီဇင်ဘာ ၁၄ရက်နေ့တွင် စီရင်ဆုံးဖြတ်ချက်အတိုင်း ဆမ်ဆောင်းက Appleသို့ ကန်ဒေါ်လာ ၅၄၈.၂သန်း ပေးချေခဲ့သည်။
ကမ္ဘာနှင့်အဝန်း စမတ်ဖုန်းစစ်ပွဲ၏ စံနမူနာတစ်ခုဖြစ်လာခဲ့သည့် ဤအမှုတွင် Appleနှင့် ဆမ်ဆောင်းမှာ ရှေ့လျှောက် ဆက်လက် တိုက်ခိုက်နေကြရဦးမည်ဖြစ်သည်။
