အဒစ်ဘာဘာ၊ ဒီဇင်ဘာ ၁၉ ။              ။ ဘူရွန်ဒီနိုင်ငံတွင် ဖြစ်ပေါ်နေသည့် အကြမ်းဖက်တိုက်ခိုက်မှုများ ရပ်တန့်ရန် အာဖရိကသမဂ္ဂက(AU) တပ်ဖွဲ့ဝင် ၅,၀၀၀ တပ်ဖွဲ့တစ်ခုကို စေလွှတ်မည်ဖြစ်ရာ ဘူရွန်ဒီနိုင်ငံအနေဖြင့် သဘောတူညီရန် လေးရက်ကြာအချိန်ရမည်ဟု အဖွဲ့ဝင် ၅၄ နိုင်ငံပါအဖွဲ့၏ ကြေညာချက်တစ်ခုတွင် ဖော်ပြထားသည်။

AU တပ်ဖွဲ့တွင် ကနဦး စစ်နှင့် ရဲတပ်ဖွဲ့ဝင် ၅,၀၀၀ပါရှိမည်ဖြစ်ကြောင်း ဒီဇင်ဘာ ၁၈နေ့နောက်ပိုင်းက AU ၏ ငြိမ်းချမ်းရေးနှင့် လုံခြုံရေးကောင်စီ(PSC)၏ ကြေညာချက်တစ်ခုတွင် ဖော်ပြထားသည်။

ထို့အပြင် ၎င်းတို့၏ လက်ရှိဆုံးဖြတ်ချက်ကို တားဆီးပိတ်ဆို့သူ မည်သူမဆို မည်သည့်အဖွဲ့မဆို သင့်လျော်သည့် အရေးယူဆောင်ရွက်သွားမည်ဟုလည်း AU ကြေညာချက်တွင် သတိပေးထားသည်။

ကုန်းတွင်ပိတ်နိုင်ငံငယ်လေး ဘူရွန်ဒီတွင် ဧပြီလကတည်းက အကြမ်းဖက်တိုက်ခိုက်မှုများဖြစ်ပေါ်နေခဲ့မှု အပေါ် နိုင်ငံတကာက စိုးရိမ်ထိတ်လန့်နေစဉ် AU ၏အစီအစဉ်ပေါ်လာသည်။

ဘူရွန်ဒီသည် ပြည်တွင်းစစ်နုတ်ခမ်းတွင် ရှိနေပြီဟု ကုလသမဂ္ဂအတွင်းရေးမှူးချုပ်ဘန်ကီမွန်းက ယခုသီတင်းပတ်အစောပိုင်းက သတိပေးခဲ့သည်။