ချင်းမိုင်၊ ဒီဇင်ဘာ ၆ ။ ။ ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ(UNFC)က လက်ရှိ ရွေးကောက်ပွဲနှင့် ငြိမ်းချမ်းရေးဖြစ်စဉ်များနှင့် ပတ်သက်၍ အလုပ်ရုံဆွေးနွေးပွဲကို ထိုင်းနိုင်ငံ ချင်းမိုင်မြို့တွင် ဒီဇင်ဘာလ ၆ ရက်က ကျင်းပနေသည်။
“ရွေးကောက်ပွဲနှင့် ငြိမ်းချမ်းရေးဖြစ်စဉ်-စိန်ခေါ်မှုများနှင့် အခွင့်အရေးများ”ခေါင်းစဉ်ဖြင့် ကျင်းပနေသော အလုပ်ရုံ ဆွေးနွေးပွဲတွင် Sea-Change အဖွ့ဲမှ တာဝန်ခံ Keith Fitzgerald က သီရိလင်္ကာ၊ ဖိလစ်ပိုင်၊ မြောက်အိုင်ရာလန်နှင့် တောင်အာဖရိက စသည့် နိုင်ငံများမှ ငြိမ်းချမ်းရေးဖြစ်စဉ်များကို ဆွေးနွေးတင်ပြခဲ့သည်။
“ဒီမနက်ပိုင်းက ရွေးကောက်ပွဲနဲ့ ပတ်သက်တဲ့ကိစ္စတွေ ဆွေးနွေးမယ်။ အရင်က ချမှတ်ထားတဲ့ ပေါ်လစီရေးရာ အထောက်အကူပြုဖို့ လေ့လာထားတဲ့ဟာတွေ ဆွေးနွေးမယ်”ဟု UNFC ၏ ဒုဥက္ကဋ္ဌ နိုင်ဟံသာက ပြောသည်။
ရှမ်းတိုင်းရင်းသားများ ဒီမိုကရေစီအဖွဲ့ချုပ်မှ စိုင်းညွန့်လွင်က ရွေးကောက်ပွဲနှင့် ငြိမ်းချမ်းရေးဖြစ်စဉ်- စိန်ခေါ်မှုနှင့် အခွင့်အရေးများကို ဆွေးနွေးတင်ပြခဲ့သည်။ ထို့ပြင် လက်ရှိ အစိုးရနှင့် အပစ်အခတ် ရပ်စဲထားသော တိုင်းရင်းသား လက်နက်ကိုင် အဖွဲ့အစည်း ၈ ဖွဲ့တို့၏ ငြိမ်းချမ်းရေးဆွေးနွေးမှုအပေါ် ဆွေးနွေးမည် ဖြစ်ကြောင်း သိရသည်။
ဒီဇင်ဘာလ ၇ ရက်တွင် UNFC ၏ နှစ်ပတ်လည် အစည်းအဝေးကို စတင်ကျင်းပမည် ဖြစ်ပြီး ထိုအစည်းအဝေးတွင် တစ်နှစ်လုံး လုပ်ဆောင်ခဲ့သော လုပ်ငန်းများကို ပြန်လည် သုံးသပ်ခြင်း၊ လက်ရှိ နိုင်ငံရေးအခြေအနေများကို သုံးသပ်ခြင်း၊ ဖြစ်ပေါ်နေသည့် နိုင်ငံရေးအခြေအနေနှင့် ရှေ့လုပ်ငန်းစဉ်များကို ချမှတ်ခြင်းများ ဆွေးနွေးသွားမည် ဖြစ်ကြောင်း နိုင်ဟံသာက ပြောသည်။
တိုင်းရင်းသား လက်နက်ကိုင် အဖွဲ့အစည်း ၈ ဖွဲ့နှင့် အစိုးရတို့ ငြိမ်းချမ်းရေးဆွေးနွေးမှုအပေါ် ပြန်လည် သုံးသပ်ကြမည် ဖြစ်ပြီး မကြာသေးမီက ချင်းအမျိုးသားတပ်ဦး(CNF) နှင့် ပအိုဝ်းအမျိုးသား လွတ်မြောက်ရေးအဖွဲ့ချုပ်(PNLO) တို့အား UNFC အဖွဲ့ဝင် အဖြစ်မှ ယာယီရပ် ဆိုင်းထားမှုနှင့် ပတ်သက်၍လည်း ထပ်မံ ဆွေးနွေးသွားမည် ဖြစ်ကြောင်း သိရသည်။
UNFC ကို တိုင်းရင်းသား လက်နက်ကိုင် အဖွဲ့အစည်း ၁၂ ဖွဲ့ဖြင့် စတင်ဖွဲ့စည်းခဲ့ခြင်းဖြစ်သည်။
