ဇွန်-၁
မန္တလေးမြို့၊မဟာအောင်မြေမြို့နယ်၊ဟေမမာလာတောင်ရပ်ကွက်၊၇၈လမ်း၊၄၁လမ်းနဲ့၄၂လမ်းကြားမှာရှိတဲ့မြန်မာ့စီးပွားရေးကော်ပိုရေးရှင်းစက်သုံးဆီအရောင်ဆိုင်မှာ ဇွန် ၁ရက်၊မွန်းလွဲ ၁နာရီခန့်က ဗုံးပေါက်ကွဲမှုဖြစ်ပွားခဲ့ပြီး ဝန်ထမ်း အမျိုးသား နှစ်ဦးသေဆုံးခဲ့တယ်လို့သိရပါတယ်။
ဆီဖြည့်နေတဲ့နေရာမှာ ရပ်ထားခဲ့တဲ့ ဆိုင်ကယ်က ပေါက်ကွက်မှုဖြစ်ပွားခဲ့တာဖြစ်ပြီး ဆီဆိုင်ဝန်ထမ်းတွေဖြစ်တဲ့ အသက် ၃၅နှစ်အရွယ် အမျိုးသားနဲ့အသက် ၁၈နှစ်အမျိုးသားတစ်ဦးတို့ သေဆုံးခဲ့တာလည်း ဖြစ်ပါတယ်။
ဒီနေ့မန္တလေးမြို့မှာ ပေါက်ကွဲ ပစ်ခတ်မှုတွေ နေရာအတော်များများဖြစ်ပွားခဲ့ပြီး နေ့လယ်ပိုင်းကလည်း ပြည်ကြီးတံခွန်မြို့နယ်၊တံခွန်တိုင် မီးပွိုင့်အနီး အမှတ် ၃၂ အခြေခံပညာအထက်တန်းကျောင်းရှေ့ လုံခြုံရေးယူထားတဲ့ စစ်ကောင်စီလက်နက်ကိုင်အဖွဲ့ကို ကားတစ်စီးနဲ့လာရောက်ပစ်ခတ်လို့ စစ်ကောင်စီလက်နက်ကိုင်တစ်ဦးသေဆုံးပြီး တစ်ဦး ဒဏ်ရာရသွားတယ်လို့လည်း မျက်မြင်တွေ့ခဲ့သူတစ်ဦးကပြောပါတယ်။
"ဗုံးနဲ့အရင်ပစ်ပြီးမှ သေနတ်နဲ့ပစ်သွားတယ်။တစ်ယောက်သေတယ်။တစ်ယောက်ကတော့ ဒဏ်ရာနဲ့အော်နေတာမြင်တယ်။"လို့ပြောပါတယ်။
ပြည်ကြီးတံခွန်မြို့နယ်၊ တောင်မြင့်ရပ်ကွက်အုပ်ချုပ်ရေးမှူးရုံးရှေ့မှာ လုံခြုံရေးယူထားတဲ့ စစ်ကောင်စီလက်နက်ကိုင်အဖွဲ့လည်း ပစ်ခတ်ခဲ့ရတယ်လို့သိရပါတယ်။
ဒီနေ့မနက်ပိုင်းမှာလည်း ၃၇လမ်း၊၃၈လမ်းနဲ့၇၈လမ်း၊၇၉လမ်းလမ်းကြားရှိအ.မ.က.(၉)ကျောင်းရှေ့လမ်းမပေါ်မှာ ပေါက်ကွဲမှု တစ်ခုဖြစ်ပွားခဲ့ပြီး၆၅လမ်းနဲ့၄၃လမ်းဒေါင့်မှာလည်းပေါက်ကွဲမှု့တစ်ခုဖြစ်ပွားခဲ့ပါတယ်။