မတ် ၂၉

ကချင်ပြည်နယ် အတွင်းက တိုက်ပွဲများကြောင့်၊ နမ္မတီးမြို့ကို စစ်ရှောင်လာကြသည့် ကဆုန် နှင့် ဇွပ်မိုင်ရွာက စစ်ရှောင်ပြည်သူများသည်၊ ရာသီဥတုအပြောင်းအလဲကြောင့် စစ်ရှောင်စခန်းအတွင်း ဖျားနာလျက်ရှိကြသည်။ အထူးသဖြင့် ကလေးသူငယ်များ နှင့် သက်ကြီးရွယ်အိုအချို့သည်၊ ရာသီဥတုအပြောင်းအလဲ ဒဏ်ကြောင့် နေမကောင်းဖြစ်ကြခြင်းဖြစ်သည်။

သို့ရာတွင်၊ စစ်ရှောင်စခန်းအတွင်းတွင်၊ ကျွမ်းကျင်သူနာပြု နှင့် ဆေးပေးခန်းမရှိခြင်း၊ လုံလောက်သည့် ဆေးဝါးထောက်ပံ့မှုအခြေအနေမရှိခြင်း တို့ကြောင့် ပြင်ပဆေးရုံဆေးခန်းများသို့ မိမိတို့အစီအစဉ်ဖြင့်သာ သွားလာရသည်ဟု သိရသည်။

စစ်ရှောင်များကို ကမ္ဘာ့စားနပ်ရိက္ခာထောက်ပံ့ရေးအဖွဲ့ (WFP) နဲ့ ဂရုဏာအဖွဲ့များက ထောက်ပံ့ကူညီမှုများ လုပ်ဆောင်နေ သော်လည်း၊ လူဦးရေများလာသည်နှင့်အမျှ စားနပ်ရိက္ခာ နှင့် ဆေးဝါးထောက်ပံ့မှုများ လိုအပ်နေခြင်း ဖြစ်သည်။

အဆိုပါ ကဆုန် နှင့် ဇွပ်မိုင် စစ်ရှောင်များသည် ကချင်လွတ်လပ်ရေးတပ်မတော် (KIA) နှင့် အာဏာသိမ်းစစ်ကောင်စီ ၏ တပ်များ မကြာခဏ တိုက်ပွဲဖြစ်ပွားလေ့ရှိသည့် နေရာဒေသများမှ ခိုလှုံလာကြခြင်းဖြစ်သည်။